រតនគិរី ៖ យោងតាមរបាយការណ៍របស់លោកវេជ្ជបណ្ឌិត អ៊ុង រតនា ប្រធានមន្ទីរសុខាភិបាលខេត្តឲ្យដឹងថា នៅក្នុងឆ្នាំ២០១៧ កន្លងមកនេះ មានប្រជាពលរដ្ឋប្រមាណ ១៨៤. ២៩៤ នាក់ បានមកទទួលសេវាសុខភាពពីសេវាសុខាភិបាលរបស់រដ្ឋនៅតាមមន្ទីរពេទ្យបង្អែកខេត្ត និងមណ្ឌលសុខភាពនានាទូទាំងខេត្ត ។
លោកបន្តថា មន្ត្រីសុខាភិបាលបានខិតខំយកចិត្តទុកដាក់ក្នុងការងារផ្តល់សេវាសុខាភិបាលជូនប្រជាពលរដ្ឋ និងការងារប្រយុទ្ធនឹងជម្ងឺឆ្លងផ្សេងៗ ដែលបច្ចុប្បន្នកំពុងស្ថិតនៅលើមាគ៌ាវឌ្ឍនភាព ជាក់ស្តែងការប្រយុទ្ធប្រឆាំងជម្អឺគ្រុនចាញ់ក្នុងឆ្នាំ២០១៧ មានអត្រាស្លាប់០% ដែលវឌ្ឍនភាពនេះនឹងបន្តឈានទៅសំរេចគោលដៅរបស់រាជរដ្ឋាភិបាលក្នុងការលុបបំផាត់ជម្ងឺគ្រុនចាញ់នៅឆ្នាំ២០២៥ ។
នាព្រឹក ថ្ងៃទី២ ខែមេសា ឆ្នាំ២០១៨ លោក ស៊ឹម សនឡៃ សមាជិកក្រុមប្រឹក្សាខេត្ត និងលោក គិត ទ្រី អភិបាលខេត្តស្តីទី បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីបើកសន្និបាតបូកសរុបការងារឆ្នាំ២០១៧ និងទិសដៅការងារឆ្នាំ២០១៨ របស់មន្ទីរសុខាភិបាលខេត្តរតនគិរី ដែលពិធីនេះប្រារព្ធធ្វើឡើងសាលប្រជុំមន្ទីរសុខាភិបាលខេត្ត ។
អភិបាលខេត្តស្តីទី លោក គិត ទ្រី និងលោក ស៊ឹម សនឡៃ សមាជិកក្រុមប្រឹក្សាខេត្ត បានថ្លែងនូវការកោតសរសើរ និងវាយតម្លៃខ្ពស់ចំពោះលទ្ធផលការងារដែលមន្ទីរសុខាភិបាលខេត្ត សម្រេចបាននៅក្នុងឆ្នាំ២០១៧ កន្លងទៅ ដែលលទ្ធផលទាំងនេះគឺជាការឆ្លុះ បញ្ចាំងពីការខិតខំប្រឹងប្រែងរបស់មន្ត្រីសុខាភិបាល និងអ្នកពាក់ព័ន្ធគ្រប់ផ្នែក នៅក្នុងការងារលើកកម្ពស់សុខុមាលភាពរបស់ប្រជា ពលរដ្ឋ ស្របតាមគោលនយោបាយរបស់រដ្ឋាភិបាលកម្ពុជា ។ លោក បន្តថា សុខភាពគឺជាកត្តាសំខាន់នៅក្នុងការជម្រុញកំណើនសេដ្ឋកិច្ចជាតិ និងការកាត់បន្ថយភាពក្រីក្រ នៅពេលដែលប្រជាពលរដ្ឋមានសុខភាពល្អ នឹងមានលទ្ធភាពពេញលេញនៅក្នុងសកម្មភាពសេដ្ឋកិច្ច ដើម្បីលើកស្ទួយជីវភាពរស់នៅរបស់គ្រួសារ និងគុណភាពជីវិត ។ ទន្ទឹមនឹងនោះនៅក្នុងបរិបទកំណែទម្រង់មន្ត្រីសុខាភិបាលគ្រប់រូប ត្រូវបន្តពង្រឹងសមត្ថភាពចំណេះដឹង ពង្រឹងកាងារផ្តល់សេវាជូនប្រជាពលរដ្ឋប្រកបដោយវិជ្ជាជីវៈ ស្នាមញញឹម ត្រូវប្រកាន់ភ្ជាប់ឥរិយាបទជាអ្នកបម្រើ និងវប្បធម៌សេវាសាធារណៈ ស្គាល់អំពីតួនាទី ភារកិច្ច របស់ខ្លួន និងចេះរៀបចំផែនការសម្រាប់អនុវត្តនៅក្នុងកិច្ចការងារ ។
សូមបញ្ជាក់ថា នៅក្នុងខេត្តរតនគិរី មានមន្ត្រីសុខាភិបាលសរុបចំនួន៤៣៩ នាក់ មានមន្ទីរពេទ្យបង្អែកចំនួន ២ មណ្ឌលសុខភាព ២៥ និងប៉ុស្តិ៍សុខភាពមួយចំនួនទៀត ៕ ដោយ ៖ បញ្ញាស័ក្តិ