បន្ទាយមានជ័យ ៖ មន្ត្រីកាំកុងត្រូលសាខាខេត្តបន្ទាយមានជ័យ និយាយថា ទោះបីធ្វើតេស្តបឋមមិនឃើញសារធាតុគីមីហាមឃាត់ ឬទំនិញអាហារខូចគុណភាព តែចាំបាច់យកសំណាកទៅពិនិត្យនៅមន្ទីរពិសោធន៍ទៀត។
មន្ត្រីធ្វើដូច្នេះក្រោយពីចុះត្រួតពិនិត្យគុណភាព សុវត្ថិភាព ទំនិញចំណីអាហារ បន្លែ ផ្លែឈើនៅផ្សារ ហ៊ុយ ឡេង នៅសង្កាត់អូរបីអំបិល ក្រុងសិរីសោភ័ណ កាលពីថ្ងទី២ ខែមេសា ឆ្នាំ២០១៨ នាឱកាសមុនបុណ្យចូលឆ្នាំថ្មីឆ្នាំចប្រពៃណីជាតិខ្មែរ ហើយរឹងរឹតតែតម្រូវអោយសមត្ថកិច្ចកាំកុងត្រូលពង្រឹងការងារនេះ។
លោក ហុង លៀង អនុប្រធានសាខាកាំកុងត្រូលខេត្តបន្ទាយមានជ័យបានឲ្យដឹងថា ៖ លោក សាន វិជ្ជាសារ៉ាវុធ ប្រធានសាខាកាំកុងត្រូលខេត្តបន្ទាយមានជ័យ បានបញ្ជួនលោកនិងមន្ត្រីជំនាញ សហការនឹងមន្ត្រីមន្ទិរពាណិជ្ជកម្មខេត្តចុះត្រួតពិនិត្យគុណភាពទំនិញនិងចំណីអាហារដែលលក់ តាមផ្សារឬតូបតៀមលក់ក្នុងខេត្តបន្ទាយមានជ័យ ។
មន្ត្រីជំនាញរបស់បានធ្វើតេស្តលើសាច់ក្រក សសៃគុយទាវ ប្រហុកផ្អក ណែម និងបន្លែ ផ្លែឈើមួយចំនួន ដើម្បីរកសារធាតុគីមីហាមឃាត់ តែជាលទ្ធផលមន្ត្រីជំនាញរបស់លោក រកមិនឃើញមានសារធាតុគីមីហាមឃាត់អ្វីនោះទេ ។
ប៉ុន្តែទោះបីជា គេរកមិនឃើញថាគ្មានសារធាតុគីមីហាមឃាត់ ឬមានបញ្ហាគុណភាពនៅក្នុងចំណីអាហារដែលបានធ្វើតេស្តនៅនឹង កន្លែងក្តី តែមន្ត្រីជំនាញរបស់លោកនៅតែបានយកបន្លែ ផ្លែឈើ និងសាច់ មួយចំនួន ទៅមន្ទីពិសោធន៍ តូចនៅប៉ោយប៉ែតដើម្បីធ្វើពិសោធន៍បន្តទៀត៕ ដោយ ៖ បន្ទាយ