ភ្នំពេញ ៖ រដ្ឋបាលរាជធានីភ្នំពេញ បានរៀបចំកិច្ចប្រជុំផ្សព្វផ្សាយជាមួយអាជ្ញាធរខណ្ឌ-សង្កាត់ ស្តីពីការស្រង់ឈ្មោះប្រជាពលរដ្ឋដល់អាយុចុះឈ្មោះបោះឆ្នោត ត្រៀមសម្រាប់ការចុះឈ្មោះបោះឆ្នោត នៅខែកញ្ញា ឆ្នាំ២០១៨ ដែលពិធីនេះធ្វើនៅសាលារាជធានីភ្នំពេញ នាថ្ងៃទី២ ខែមេសានេះ ក្រោមអធិបតីភាពលោកមាន ចាន់យ៉ាដា អភិបាលរងរាជធានីភ្នំពេញ និងលោក លន់ ឆេងកៃ ប្រធានគ.ជ.ប រាជធានីភ្នំពេញ។
លោកមាន ចាន់យ៉ាដា អភិបាលរងរាជធានីភ្នំពេញបានថ្លែងស្នើសូមបងប្អូនដែលមានកូនចៅដល់អាយុបោះឆ្នោត ឱ្យទៅចុះឈ្មោះឱ្យបានគ្រប់ៗគ្នា។ លោកបន្តថា ការផ្សព្វផ្សាយនេះ មានគោលដៅសំខាន់២ គឺទី១៖ដើម្បីធ្វើបច្ចុប្បន្នភាពចំនួនប្រជាពលរដ្ឋប៉ាន់ស្មាន សម្រាប់ការបោះឆ្នោត នៅឆ្នាំ២០២២ និង២០២៣ ក្រោយការបោះឆ្នោតសកលអាណត្តិទី៦ ក្នុងខែកក្កដា ឆ្នាំ២០១៨ រួចយើងនឹងបំពេញការងារបន្ត លើការចុះឈ្មោះអ្នកបោះឆ្នោតថ្មី ដែលត្រូវធ្វើនៅខែកញ្ញា។ គោលការណ៍ទី២ គឺ៖ដើម្បីបន្ស៊ីគ្នា ក្រោយធ្វើបច្ចុប្បន្ន ភាព នៃមានសិទ្ធិបោះឆ្នោត គឺត្រូវមានតួលេខតែមួយ រវាងនគរបាលប៉ុស្តិ៍ និងអាជ្ញាធរសង្កាត់កុំឲ្យខុសគ្នា លើការងារគ្រប់គ្រងស្ថិតិប្រជាពលរដ្ឋ ព្រោះកន្លងមក ធ្លាប់មានទម្រង់២ខុសគ្នា រវាងនគរបាលប៉ុស្តិ៍ និងចៅសង្កាត់។
ក្នុងឱកាសនោះ លោកអភិបាលរង បានជំរុញដល់នគរបាលប៉ុស្ដិ៍ និងចៅសង្កាត់ ស្រង់ស្ថិតិប្រជាពលរដ្ឋ ទៅតាមការណែនាំ និងតាមទម្រង់របស់គ.ជ.ប និងពិនិត្យទិន្នន័យឲ្យបានឲ្យបានច្បាស់លាស់ ហើយត្រូវបញ្ជូនទិន្នន័យដែលពិនិត្យរួច ទៅគណៈកម្មាធិការជាតិរៀបចំការបោះឆ្នោតរាជធានីភ្នំពេញ ឲ្យបានមុន ឬយ៉ាងយូរ ត្រឹមថ្ងៃទី៦ ខែមេសា ឆ្នាំ២០១៨៕ ដោយ ៖ កូឡាប