ភ្នំពេញ៖ ព្រះរាជអាជ្ញារងអយ្យការអមសាលាដំបូងរាជធានីភ្នំពេញ បានសម្រេចចេញដីកាបើកការស៊ើបអង្កេតចំពោះបណ្ដឹងរបស់កញ្ញា ធី សុវណ្ណថា និងដាក់ឲ្យស្ថិតនៅក្រោមការឃុំខ្លួនបណ្តោះអាសន្ន ឈ្មោះសុខ សុវណ្ណ វឌ្ឍនាសាប៊ុង ហៅសុខ សុវណ្ណ វឌ្ឍនាសារពង្ស ដែលជាម្ចាស់ Facebook ឈ្មោះ William Guang ពីបទបរិហារកេរ្តិ៍ជាសាធារណៈ និងបទញុះញង់ឲ្យមានការរើសអើង។
បើយោងតាមដីកាសន្និដ្ឋានបញ្ជូនរឿងឲ្យស៊ើបសួរ របស់លោក សឿន មុនីរ័ត្ន ព្រះរាជអាជ្ញារង នៃអយ្យការអមសាលាដំបូង រាជធានីភ្នំពេញ កាលពីថ្ងៃទី២៨ ខែមីនា ឆ្នាំ២០១៨នេះ។
លោក សឿន មុនីរ័ត្ន បានថ្លែងថា ក្រោយពីបានឃើញសំណុំរឿងព្រហ្មទណ្ឌរបស់ កញ្ញា ធី សុវណ្ណថា បានដាក់ពាក្យប្តឹង លោក William Guang កាលពីថ្ងៃទី៤ ខែធ្នូ ឆ្នាំ២០១៧ របស់អយ្យការអមសាលាដំបូងរាជធានីភ្នំពេញ ដោយចោទបុគ្គលរូបនេះ កាលពីពាក់កណ្តាលឆ្នាំ២០១៦ នៅក្នុងគេហទំព័រហ្វេសប៊ុក(Facebook) របស់ឈ្មោះ សុខ សុវណ្ណ វឌ្ឍនាសាប៊ុង ហៅសុខ សុវណ្ណ វឌ្ឍនាសារពង្ស ដែលជាម្ចាស់គណនីបណ្តាញសង្គមទំនាក់ទំនងសង្គម (Facebook) ឈ្មោះ William Guang បានបង្ហោះរូបភាពភ្ជាប់ជាមួយនិងការសរសេរបរិហាកេរ្តិ៍ ទៅលើដើមបណ្តឹងរដ្ឋប្បវេណី ឈ្មោះ ធី សុវណ្ណថា ថា ៖ “បិសាច, ជាមនុស្សអស់តម្លៃ , ជាសិស្សគេចពីការប្រឡង” ។ ម្យ៉ាងទៀត ឈ្មោះឈ្មោះសុខ សុវណ្ណ វឌ្ឍនាសាប៊ុង ហៅសុខ សុវណ្ណ វឌ្ឍនាសារពង្ស មានចេតនាញុះញង់ ឲ្យមានការរើសអើង ការព្រឹត្តបទល្មើសដោយប្រើពាក្យថា ៖ “សមនឹងត្រូវមួយស្បែកជើង” , “គាំទ្រទេ បើខ្ញុំចង់ផ្តាច់ផ្លូវនយោបាយរបស់នាងច្រមក់នេះ”? , “មានតែស្លាប់ និងរត់ចោលមាតុភូមិ”។ លោកព្រះរាជអាជ្ញារង បានបញ្ជាក់ក្នុងដីកាបន្តថា ការណ៍សរសេរបែបនេះបានធ្វើឲ្យប៉ះពាល់ដល់កិត្តិយស សេចក្តីថ្លៃថ្នូរ សុវត្ថិភាព របស់បុគ្គល និងបានបញ្ជាក់អំពីចេតនាទុច្ចរិត បង្កជាការញុះញង់ បំផុសបំផុល បញ្ឆេះកំហឹងដល់មហាជនដែលអាចឲ្យកើតមានចលាចលក្នុងសង្គម។ អំពើខាងលើជាបទល្មើស បទរិហាកេរ្តិ៍ជាសាធារណៈ និងបទញុះញង់ឲ្យមានការរើសអើង ប្រព្រឹត្តនៅរាជធានីភ្នំពេញ កាលពីពាក់កណ្តាលឆ្នាំ២០១៦ តាមមាត្រា៣០៥ និងមាត្រា៤៩៦ នៃក្រមព្រហ្មទណ្ឌ។
ឈ្មោះសុខ សុវណ្ណ វឌ្ឍនាសាប៊ុង ហៅសុខ សុវណ្ណ វឌ្ឍនាសារពង្ស ដែលជាម្ចាស់ Facebook ឈ្មោះ William Guang ភេទប្រុស ឆ្នាំកំណើតថ្ងៃទី១៤ ខែមីនា ឆ្នាំ១៩៧៧ កាលលិខិតឆ្លងដែនលេខ N00787366 ចុះថ្ងៃទី៣១ខែមីនា ឆ្នាំ២០១៧ ទីកន្លែងកំណើតនៅខេត្តតាកែវ ទីលំនៅបច្ចុប្បន្នផ្ទះលេខ១៧ សង្កាត់វាលវង់ ខណ្ឌ៧មករា រាជធានីភ្នំពេញ។
ព្រះរាជអាជ្ញារងអយ្យការអមសាលាដំបូងរាជធានីភ្នំពេញ ក៏បានសម្រេចស្នើឲ្យបើការស៊ើបសួរលើអង្គហេតុខាងលើ និងដាក់ឲ្យស្ថិតនៅក្រោមការពិនិត្យ លើឈ្មោះសុខ សុវណ្ណ វឌ្ឍនាសាប៊ុង ហៅសុខ សុវណ្ណ វឌ្ឍនាសារពង្ស ដែលជាម្ចាស់ Facebook ឈ្មោះ William Guang ពីបទ បរិហារកេរ្តិ៍ជាសាធារណៈ និងបទញុះញង់ឲ្យមានការរើសអើង ។ ដាក់ឲ្យស្ថិតនៅក្រោមការត្រួតពិនិត្យតាមផ្លូវតុលាការ និងដាក់ឲ្យស្ថិតនៅក្រោមការឃុំខ្លួនបណ្តុះអាសន្ន ដើម្បីបញ្ចប់បទល្មើសនិងបង្ការបទល្មើសកុំឲ្យមានការកើតជាថ្មី រក្សាភស្តុតាង ឬតម្រុយជាសម្ភារៈ និងធានារក្សាជនត្រូវចោទទុកជូនតុលាការចាត់ការតាមនីតិវិធី៕ ដោយ ៖ បញ្ញាស័ក្តិ