ភ្នំពេញ៖ ដើម្បីបានជាប្រយោជន៍ ដល់សេដ្ឋកិច្ច និងប្រជាជននៃប្រទេស កម្ពុជានិងតួកគី តាមរយៈឯកអគ្គរដ្ឋទូតដ្ឋតួកគី និងរដ្ឋមន្ត្រីក្រសួងសេដ្ឋកិច្ច បានឯកភាពគ្នា ដោយជំរុញកិច្ចសហប្រតិបត្តិការ ក្នុងការបង្កើនទំហំពាណិជ្ជកម្មទ្វេភាគីឲ្យដល់ ៥០០ លានដុល្លារ នៅក្នុងឆ្នាំ ២០២០ ។
លោកបណ្ឌិត សភាចារ្យ អូន ព័ន្ធមុនីរ័ត្ន ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានទទួលជួបពិភាក្សាការងារ ជាមួយលោកស្រី Ayda Unlu ក្នុងខណៈដែលលោកស្រីត្រូវបានតែងតាំងជាឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋតួកគីថ្មី ប្រចាំព្រះរាជណាចក្រកម្ពុជា នៅព្រឹកថ្ងៃទី៣ ខែ មេសា ឆ្នាំ ២០១៨ នៅទីស្ដីការក្រសួងសេដ្ឋកិច្ច និងហិរញ្ញវត្ថុ ។
ជំនួបនេះ ផ្តោតជាសំខាន់ទៅលើ ការខិតខំ បន្តពង្រឹងកិច្ចសហប្រតិបត្តិការ ឲ្យកាន់តែទូលំទូលាយ និងស៊ីជំរៅថែមទៀត រវាងប្រទេសទាំងពីរ។
លោកបណ្ឌិត សភាចារ្យ អូន ព័ន្ធមុនីរ័ត្ន ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានសម្តែងនូវការស្វាគមន៍ និងអបអរសារទរចំពោះ លោកស្រី Ayda Unlu ដែលត្រូវបានតែងតាំង ជាឯកអគ្គរដ្ឋទូតតួកគីថ្មីប្រចាំនៅកម្ពុជា ហើយបានគូសបញ្ជាក់ថា តាមរយៈវត្តមាន និងបេសកកម្មការទូត របស់លោកស្រី កិច្ចសហប្រតិបត្តិការទ្វេភាគី រវាងប្រទេសទាំងពីរ កម្ពុជា-តួកគី នឹងត្រូវបានពង្រឹង និងពង្រីកថែមទៀត នៅលើគ្រប់វិស័យ។ លោកបណ្ឌិតទេសរដ្ឋមន្ត្រី ក៏បានជម្រាបជូនភាគីមិត្ត អំពីការផ្លាស់ប្តូរមុខមាត់ថ្មី នៃប្រទេសកម្ពុជា នៅក្នុងឆាកអន្តរជាតិ ពិសេស កម្ពុជា ជាប្រទេសឯកទគ្គករកំណើនទាំង៨នៅក្នុងពិភពលោក ដែលមានកំណើនរឹងមាំ ក្នុងរយៈពេល២ទសវត្សរ៍កន្លងមកនេះ និងជាខ្លាសេដ្ឋកិច្ចថ្មី នៅអាស៊ី ដែលភាពរឹងមាំនេះ នឹងរុញប្រទេសកម្ពុជា ឆ្ពោះទៅកាន់គោលដៅ ជាប្រទេសចំណូលមធ្យម កម្រិតខ្ពស់នៅឆ្នាំ ២០៣០ និងជាប្រទេសចំណូលខ្ពស់នៅឆ្នាំ២០៥០។
លោកស្រីឯកអគ្គរដ្ឋទូត បានទទួលស្គាល់ពីការរីកចម្រើន និងផ្លាស់ប្តូរគួរឲ្យកត់សម្គាល់របស់កម្ពុជានា បរិការណ៍បច្ចុប្បន្ន ហើយលោកស្រី នឹងខិតខំបន្តជំរុញ ពង្រឹង និងពង្រីក កិច្ចសហប្រតិបត្តិការបន្ថែមទៀត រវាងរដ្ឋាភិបាល និងប្រជាជន នៃប្រទេសទាំងពីរ។ ក្នុងន័យពង្រឹងកិច្ចសហប្រតិបត្តិការ ឲ្យកាន់តែស៊ីជំរៅ និងទូលំទូលាយ ថែមទៀត។ លោកស្រី បានបញ្ជាក់ថា តួកគីមានបំណង និងកំពុងសិក្សា អំពីលទ្ធភាពក្នុងការ ឲ្យមានជើងយន្តហោះ ហោះហើរត្រង់ពីប្រទេសតួកគីមកកម្ពុជា។ លោកស្រី នឹងបន្តការពិភាក្សា ជាមួយស្ថាប័នជំនាញ ពាក់ព័ន្ធបន្ថែមទៀត អំពីលទ្ធភាពនេះ។ ជាមួយគ្នានេះ តួកគីមានបំណងអញ្ជើញថ្នាក់ដឹកនាំនៃរាជរដ្ឋាភិបាលកម្ពុជា ក៏ដូចជាធុរជនកម្ពុជា ទៅទស្សនកិច្ចស្វែងយល់អំពីដំណើរការធុរកិច្ចតួកគី ដើម្បីរឹតចំណងមិត្តភាព លើកកម្ពស់កិច្ចសហប្រតិបត្តិការ រវាងប្រទេសទាំងពីរ។
លោកបណ្ឌិតទេសរដ្ឋមន្ត្រី បានស្វាគមន៍ចំពោះការផ្តួចផ្តើមទាំងនេះ ហើយដូចដែលបានឯកភាពគ្នា បានស្នើឲ្យគ្រប់ភាគីពាក់ព័ន្ធ ខិតខំបន្តជំរុញកិច្ចសហប្រតិបត្តិការ ក្នុងការបង្កើនទំហំពាណិជ្ជកម្មទ្វេភាគីឲ្យដល់ ៥០០ លានដុល្លារអាមេរិក នៅក្នុងឆ្នាំ ២០២០ ដើម្បីបានជាប្រយោជន៍ ដល់សេដ្ឋកិច្ច និងប្រជាជននៃប្រទេសទាំងពីរ៕ ដោយ ៖ បញ្ញាស័ក្តិ
