ភ្នំពេញ ៖ ដោយមើលឃើញពីកំណើនសេដ្ឋកិច្ចកម្ពុជា មានភាពរឹងមាំនោះ តំណាងអង្គការពាណិជ្ជកម្មក្រៅស្រុកជប៉ុន បានសន្យាថានឹងជំរុញអ្នកវិនិយោគិនបរទេសទាំងអស់ មិនថាតែជប៉ុន ឲ្យមកបណ្តាក់ទុនបន្ថែមនៅកម្ពុជាឲ្យបានកាន់តែច្រើនបន្ថែមទៀត។
លោកបណ្ឌិត សភាចារ្យ អូន ព័ន្ធមុនីរ័ត្ន ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានទទួលជួបពិភាក្សាការងារជាមួយលោក Masashi KANO ប្រធានតំណាងអង្គការពាណិជ្ជកម្មក្រៅស្រុកជប៉ុន “Japan External Trade Organization-JETRO” ប្រចាំនៅកម្ពុជា ពិភាក្សាអំពីសក្តានុពល និងឱកាសវិនិយោគនៅកម្ពុជា សម្រាប់ វិនិយោគិនបរទេស នៅព្រឹកថ្ងៃទី២ ខែមេសា ឆ្នាំ២០១៨ នៅទីស្ដីការក្រសួងសេដ្ឋកិច្ច និងហិរញ្ញវត្ថុ ។
លោកបណ្ឌិត សភាចារ្យ អូន ព័ន្ធមុនីរ័ត្ន បានសម្តែងនូវការស្វាគមន៍ និងកោតសរសើរចំពោះ Masashi KANO ដែលបានខិតខំប្រឹងប្រែងទាំងកម្លាំងកាយ និងកម្លាំងចិត្តក្នុងការជួយទាក់ទាញអ្នកវិនិយោគិន ដែលមានសក្តានុពលខ្ពស់របស់ជប៉ុន ឲ្យមកបណ្តាក់ទុកជាបន្តបន្ទាប់នៅកម្ពុជា ។ លោកបណ្ឌិតសភាចារ្យ បានបញ្ជាក់ថា ដើម្បីទាក់ទាញវិនិយោគិនបរទេសឲ្យកាន់តែមានទំនុកចិត្តមកបណ្តាក់ទុននៅកម្ពុជា ។ បន្ថែមលើគោលនយោបាយនៃការអនុគ្រោះ និងគាំពារវិនិយោគពីបរទេសដែលកំពុងអនុវត្តន៍ ។ បច្ចុប្បន្ន កម្ពុជាបាននិងកំពុងខិតខំកែទម្រង់និងរៀបចំបរិយាកាសធុរកិច្ចអំណោយផល ( Friendly Business Enviroment) ចំពោះវិនិយោគិនបរទេសទាំងអស់ រួមមានការលើកទឹកចិត្តបន្ថែមទៀត និងបង្កលក្ខណៈឲ្យអ្នកវិនិយោគិនបរទេសគ្រប់រូប ឲ្យមកបណ្តាក់ទុន នៅកម្ពុជា ប្រកបដោយភាពទុកចិត្ត ស្របពេលដែលប្រទេសកម្ពុជា កំពុងមានសុខសន្តិភាពពេញលេញ។
លោក Masashi KANO បានជម្រាបថា ដោយមើលឃើញពីកំណើនសេដ្ឋកិច្ចកម្ពុជា មានភាពរឹងមាំ សម្រាប់រយៈពេលមធ្យមទៅមុខ អ្នកវិនិយោគិនជប៉ុន បានចាត់ទុកប្រទេសកម្ពុជា ជាប្រទេសដែលមានទីផ្សារបើកចំហរខ្លាំង និងមានបរិយាកាសវិនិយោគអំណោយ ផលច្រើន ដែលជាកត្តាជំរុញ និងលើកទឹកចិត្តអ្នកវិនិយោគិនបរទេសទាំងអស់ មិនថាតែជប៉ុន ឲ្យមកបណ្តាក់ទុនបន្ថែមនៅកម្ពុជា។ ទឡ្ហីករទាំងនេះ ជំរុញលំហូរវិនិយោគពីក្រៅប្រទេសមកកម្ពុជា នឹងបានរុញសេដ្ឋកិច្ចកម្ពុជាឲ្យកាន់តែមានសន្ទុះខ្លាំងក្លាថែមទៀត។ លោកបានបញ្ជាក់ថា បច្ចុប្បន្នមានអ្នកវិនិយោគិនជប៉ុនថ្មីៗ មួយចំនួន បាននិងកំពុងពិភាក្សាលម្អិតជាមួយ JETRO ប្រចាំនៅកម្ពុជា អំពីចំណាប់អារម្មណ៍ និងឱកាសវិនិយោគនៅកម្ពុជា ហើយលោកសន្យាថា នឹងព្យាយាមពន្យល់ ផ្សព្វផ្សាយ អំពី ឱកាសវិនិយោគនៅកម្ពុជា ដើម្បីទាក់ទាញ វិនិយោគិនជប៉ុនទាំងនោះ ឲ្យមកបណ្តាក់ទុននៅកម្ពុជា ប្រកបដោយ ភាពជឿជាក់។
សូមជម្រាបជូនថា JETRO គឺជាអង្គភាពមួយ ស្ថិតក្រោមចំណុះក្រសួងសេដ្ឋកិច្ច ពាណិជ្ជកម្ម និងឧស្សាហកម្មជប៉ុន ដែលត្រូវបានបង្កើតឡើងក្នុងឆ្នាំ១៩៥៨ ។ JETRO មានបណ្តាញការិយាល័យចំនួន ៧៤ នៅក្នុងប្រទេសចំនួន ៥៥ លើពិភពលោក និងមានការិយាល័យចំនួន ៤៤ នៅក្នុងប្រទេសជប៉ុន។ តាមរយៈបណ្តាញរបស់ខ្លួន ដែលមាននៅស្ទើរតែ ពាសពេញពិភពលោក JETRO បានចូលរួមចំណែក ក្នុងការពង្រីកពាណិជ្ជកម្ម និងការវិនិយោគ រវាងប្រទេសជប៉ុន និងប្រទេសដទៃទៀត នៅលើសកលលោក ។ ការិយាល័យ JETRO នៅព្រះរាជាណាចក្រកម្ពុជា ត្រូវបានបង្កើតឡើងនៅក្នុងឆ្នាំ២០១០ ដែលបានធ្វើការសម្របសម្រួល និងទាក់ទាញក្រុមហ៊ុនដែល មានសក្តានុពលខ្ពស់របស់ជប៉ុនមួយចំនួនដូចជា Mineabea ផ្សារទំនើប AEON ជាដើម ឲ្យមកបណ្តាក់ទុន នៅកម្ពុជា៕ ដោយ ៖ បញ្ញាស័ក្តិ
