យុវជនអាយុ១៨ឆ្នាំម្នាក់ ត្រូវបានចាប់ខ្លួនកាលពីថ្ងៃចន្ទ បន្ទាប់ពីរូបគេត្រូវបានគេថតកំពុងធ្វើសកម្មភាពបៀតបៀនកេរ្តិ៍ខ្មាសក្មេងស្រីម្នាក់ នៅទីកន្លែងសាធារណៈ បានបង្កឲ្យជនជាតិចិនរាប់លាននាក់ផ្ទុះកំហឹងយ៉ាងខ្លាំងក្លា នៅលើអ៊ីនធើរណេត ។
តាមរយៈរូបភាពដែលត្រូវបានបង្ហោះឡើងអ៊ីនធើរណេត បានបង្ហាញឲ្យឃើញយុវជនរងការចោទប្រកាន់នោះ បានយកដៃឆ្វេងរបស់ខ្លួន ចូលក្នុងអាវរបស់ក្មេងស្រីនោះ និងដាក់នៅស្ងៀមលើដើមទ្រូងរបស់នាង នៅក្នុងមន្ទប់រង់ចាំមានមនុស្សកកកុញ ស្ថិតក្នុងស្ថានីយ៍រថភ្លើង Namjing South ។
យោងតាមនារីម្នាក់ដែលបានថតរូបភាពនេះ មានឈ្មោះថា Chen បានឲ្យដឹងថា ឪពុកម្តាយរបស់យុវជននោះ បានកំពុងអង្គុយជាប់នឹងរូបគេ ហើយសាច់ញាតិដទៃទៀត ក៏ស្ថិតនៅក្បែរនោះផងដែរ ។
Chen ដែលនិស្សិតម្នាក់បាននិយាយថា នាងពុំអាចរាយការណ៍ទៅប៉ូលីសភ្លាមៗនោះទេ ខណៈគ្រួសារយុវជននោះមានចំនួនច្រើននាក់ ។ នាងបានបន្តនិយាយរឿងនេះទៅកាន់អ្នកដទៃនៅលើរថយន្តផង និងព្យាយាមថតរូបផង ប៉ុន្តែ គ្មាននរណាម្នាក់បញ្ចេញប្រតិកម្មបញ្ឈប់យុវជននោះ ដែលកំពុងដាក់ដៃនៅលើដើមទ្រូងរបស់ក្មេងស្រីនេះបានទេ ។
ទោះយ៉ាងណា Chen បានផ្ញើរូបថតទាំងនោះ ទៅកាន់ Chen Lan ជាអ្នកនិពន្ធ និងជាបុគ្គលិកអង្គការក្រៅរដ្ឋាភិបាលម្នាក់ ដែលធ្វើការអស់រយៈពេលច្រើនឆ្នាំ ក្នុងការការពារកុមារត្រូវរំលោភបំពាន ។ Lan បន្ទាប់មក បានផុសរូបភាពទាំងនោះលើអនឡាញ ហើយស្នើឲ្យប៉ូលីសជួយក្មេងស្រីនោះ ។
លោក Mo Jing មន្ត្រីម្នាក់ធ្វើការនៅនាយកដ្ឋានសន្តិសុខសាធារណៈរថភ្លើង Nanjing បាននិយាយថា ប៉ូលីសបានចាត់វិធានការភ្លាមៗ បន្ទាប់ពីទទួលបានព័ត៌មាននេះ ហើយមន្ត្រីត្រូវបានបញ្ជូនទៅកាន់ស្រុកកំណើតរបស់យុវជននោះ ដើម្បីស៊ើបអង្កេត ។
លោក Mo និយាយថា៖ «យើងបានបញ្ជូនប៉ូលីសស្រីរបស់យើង និយាយជាមួយក្មេងស្រីនោះ ដើម្បីឲ្យនាងស្ងប់អារម្មណ៍ និងបាត់ការភិតភ័យតទៅទៀត» ។
យោងតាម Modern Express, យុវជនដែលត្រូវបានឃុំខ្លួននោះ គឺរស់នៅក្នុងខេត្ត Henan និងជានិស្សិតម្នាក់រៀននៅសកលវិទ្យាល័យមួយ ក្នុងទីក្រុង Nanjing ៕ ចន្ទី
