ជួយឲ្យសរីរាង្គស្វ័យកម្ចាត់កោសិកាមហារីកតាមរយៈការជួយដល់ប្រព័ន្ធការពារសរីរាង្គគឺជានិន្នាការព្យាបាលមហារីក ត្រូវបានអ្នកវិទ្យាសាស្ត្រពិភពលោកស្រាវជ្រាវ។
ប្រូតេអ៊ីន ២ ប្រភេទ ដែលរកឃើញក្នុងស្បែកមនុស្សមានរចនាសម្ព័ន្ធស្រដៀងនឹងពិសសត្វពស់ បានកាត់បន្ថយកោសិកាមហារីកពី ៤០%-៧០% ក្នុងការពិសោធន៍អំឡុងពេល១ថ្ងៃប៉ុណ្ណោះ។
នេះគឺជាការស្រាវជ្រាវរកឃើញថ្មីមួយរបស់សកលវិទ្យាល័យ Moscow និងបណ្ឌិតសភាវិទ្យាសាស្ត្ររុស្ស៊ី ដែលអាចរួមចំណែកយ៉ាងធំធេងដល់និន្នាការខាងលើ ៖ “ចងដៃជើង” កោសិកាមហារីក ដោយធ្វើឲ្យវាអសកម្មភាព ទុកពេលឲ្យប្រព័ន្ធការពាររាង្គកាយសាងសង់កម្លាំង ហើយវាយលុកទៅលើដុំពកកាចសាហាវទាំងនោះ ប្រូតេអ៊ីនទាំងពីរប្រភេទនោះគឺ SLURP1 និង SLURP2 មានរចនាសម្ព័ន្ធស្រដៀងនឹងពិសសត្វពស់ និងពពួកល្មូនមួយចំនួន។ ប្រូតេអ៊ីនទាំងពីរនេះ ត្រូវបានគេរកឃើញនៅក្នុងស្បែករបស់មនុស្ស ក៏ដូចជាស្បែករបស់សត្វដែលមានឈាមក្តៅផ្សេងទៀត ។
សណ្ឋានរបស់ SLURP ក្នុងស្បែកមនុស្សពុំបង្កឲ្យមានការពុល តែវាមានប្រសិទ្ធភាពដូចជាពិសរបស់ពស់ ។ ហេតុនេះការចាក់បញ្ចូលបរិមាណ SLURP1 និង SLURP2 ច្រើនមានប្រសិទ្ធភាពស្មើនឹងសញ្ញា “ឈប់ភ្លាម” ! ដែលវានឹងបញ្ជូនទៅកាន់កោសិកាមហារីក។ ដូច្នេះ នៅពេលដែលកោសិកាមហារីកវា “អសកម្ម” នោះ ប្រព័ន្ធការពាររាង្គកាយរបស់មនុស្សបន្តធ្វើការបោសសម្អាតសំណល់ទាំងឡាយជាការស្រេច ។
ក្នុងអត្ថបទចុះផ្សាយលើទស្សនាវដ្តីវិទ្យាសាស្ត្រ British Journal of Pharmacology ក្រុមអ្នកវិទ្យាសាស្ត្រឲ្យដឹងថា ប្រូតេអ៊ីនទាំងពីរនេះ ត្រូវបានសាកល្បងចំពោះកោសិកាមហារីកនៅស្បែក សុដន់ សួត និងពោះវៀនធំ ក្នុងបន្ទប់ពិសោធន៍ ។ លទ្ធផលគឺក្រោយការចាក់បញ្ចូលប្រូតេអ៊ីនទាំងពីរនេះ តែ១ថ្ងៃប៉ុណ្ណោះ បានកាត់បន្ថយកោសិកាមហារីកពី ៤០%-៧០% ។
បណ្ឌិត Mikhail Shulepko នៃវិទ្យាស្ថានជីវគីមីសាស្ត្រចំណុះបណ្ឌិតសភាវិទ្យាសាស្ត្ររុស្ស៊ីឲ្យដឹងថា លោកនិងសហការីនឹងបន្តការសាកល្បងដុំពករបស់មនុស្សដែលក្លូនបញ្ចូលទៅក្នុងរាង្គកាយសត្វមុនពេលធ្វើការសាកល្បងដោយផ្ទាល់លើមនុស្ស ៕ លីសា
