តាំងពីដើររៀងមកយើងទាំងអស់គ្នាតែងគិតថា ទម្រង់ច្រមុះអាស្រ័យលើការតំណពូជ ប៉ុន្តែឥឡូវនេះអ្នកវិទ្យាសាស្ត្របានរកឃើញចំណងទាក់ទងរវាងទ្រង់ទ្រាយច្រមុះនិងអាកាសធាតុ ។
ទម្រង់ច្រមុះរងឥទ្ធិពលដោយសារអាកាសធាតុ លទ្ធផលនៃការស្រាវជ្រាវថ្មីៗនេះ ដឹកនាំដោយអ្នកតំណពូជវិទ្យា Arslan Zaidi នៃសកលវិទ្យាល័យ Pennsylvania រួមជាមួយអ្នកជំនាញការមកពីអាមេរិក Ireland និងបែលហ្ស៊ិក បានធ្វើការសិក្សាស្វែងរកចំណងទាក់ទងរវាងទម្រង់ច្រមុះ និងអាកាសធាតុ។
លទ្ធផលនៃការស្រាវជ្រាវត្រូវបានប្រកាសជាសាធារណៈលើទស្សនាវដ្តីតំណពូជវិទ្យា PloS Genetics ។ តាមនោះគឺក្រុមស្រាវជ្រាវ បានប្រើប្រាស់រូបភាពទម្រង់មុខ 3D របស់អ្នកស្ម័គ្រចិត្ត ៤៧៦នាក់ មកពីបណ្តាតំបន់ដែលមានអាកាសធាតុខុសគ្នា ៖ អាស៊ីខាងត្បូង អាស៊ីបូព៌ា អាហ្រិកខាងលិច និងអឺរ៉ុបខាងជើង ដើម្បីវាស់ទទឹងគម្លាតរន្ធច្រមុះ កម្ពស់ និងប្រវែងក្តោងច្រមុះ។
អ្នករស់នៅកាន់តែជិតខ្សែអេក្ខាទ័រនោះរន្ធច្រមុះកាន់តែធំ
Zaidi ឲ្យដឹងថា ទំហំនៃច្រមុះមានទាក់ទងជាមួយសីតុណ្ហភាព និងកម្រិតសំណើម ក្នុងតំបន់រស់នៅនីមួយៗ ។ លទ្ធផលគឺ ៖ អ្នករស់នៅក្នុងលក្ខខណ្ឌអាកាសធាតុក្តៅ មានរន្ធច្រមុះធំជាង ប្រៀបនឹងអ្នករស់នៅក្នុងអាកាសធាតុត្រជាក់ ។ អ្នករស់នៅកាន់តែកៀកខ្សែអេក្វាទ័រ នោះរន្ធច្រមុះកាន់តែធំ ។ មូលហេតុដែលនាំឲ្យមានទំនាក់ទំនងបែបនេះ ព្រោះថា ភារកិច្ចសំខាន់បំផុតរបស់ច្រមុះគឺសម្របសម្រួលបរិយាកាសឲ្យមានកម្តៅ និងសំណើមគ្រប់គ្រាន់មុនពេលបញ្ជូនទៅកាន់សួតធានាឲ្យមនុស្សអាចសម្របខ្លួនបាននឹងបរិស្ថាន ។
អ្នករស់នៅកន្លែងមានសីតុណ្ហភាពខ្ពស់ច្រើនមានក្តោងច្រមុះទាប ហើយរន្ធច្រមុះធំ។
គេបានលើកឧទាហរណ៍ថា ៖ ប្រសិនបើអ្នករស់នៅក្នុងបរិស្ថានត្រជាក់តែ “ស្ងួតពុំសូវមានសំណើម” នោះខ្យល់ដែលចូលតាមច្រមុះទៅក្នុងសួតគឺជាខ្យល់ដែលត្រជាក់ ហើយស្ងួត ។ ពេលនោះយន្តការនៃផ្លូវដង្ហើមក្នុងច្រមុះមានភារកិច្ចត្រូវធ្វើឲ្យវាក្តៅ និងមានសំណើម មុនពេលបញ្ជូនទៅដល់សួត ។ ហេតុនេះ រន្ធច្រមុះដែលតូចចង្អៀត និងជួយបង្កើនសំណើម ក៏ដូចជាធ្វើឲ្យខ្យល់ដង្ហើមក្តៅកាត់បន្ថយភាពត្រជាក់ ពេលរុញចូលទៅក្នុងសួត ។
ចំណែកអ្នកដែលរស់នៅតំបន់ដែលមានសីតុណ្ហភាពខ្ពស់ ច្រើនមានក្តោងច្រមុះទាប ហើយរន្ធច្រមុះធំដើម្បីងាយស្រួលក្នុងការស្រូបយកខ្យល់បានល្អប្រសើរជាង៕ ចន្ទ្រា