តុលាការកំពូលតម្កល់ទណ្ឌកម្មជនជាតិបារាំង និង ស្រ្តីខ្មែរម្នាក់ ដាក់គុកក្នុងម្នាក់ៗ ០២ ឆ្នាំ ពាក់ព័ន្ធការប្រើប្រាស់ និង ជួញដូរគ្រឿងញៀននៅខេត្តកំពត!!

ភ្នំពេញ ៖ តុលាការកំពូលកាលពីព្រឹកថ្ងៃទី ៣០ ខែ កញ្ញា ឆ្នាំ ២០២១ បានបើកសវនាការ ប្រកាសសាលដីកា លើបណ្ដឹងសាទុក្ខរបស់ ពិរុទ្ធជន ជនជាតិបារាំងម្នាក់ និង ស្រី្តខ្មែរម្នាក់ ដែលត្រូវជាគូសេ្នហ៍នឹងគ្នា ជាប់ពាក់ព័ន្ធនឹងការប្រើប្រាស់ និង ជួញដូរគ្រឿងញៀន ប្រព្រឹត្តនៅភូមិសុវណ្ណសាគរ និង ភូមិ ១ឧសភា សង្កាត់កំពង់កណ្ដាល ក្រុងកំពត ខេត្តកំពត កាលពីថ្ងៃទី០៣ ខែ មិថុនា ឆ្នាំ ២០២០ ។

តុលាការកំពូល បានសម្រេចតម្កល់ សាលដីការបស់តុលាការឧទ្ធរណ៍ រក្សាទុកជាបានការដដែល និង ប្រកាសបិទផ្លូវតវ៉ា។

លោកអឿង សៀង ជាចៅក្រមរបាយការណ៍ បានថ្លែងឲ្យដឹង នៅក្នុង អង្គការសវនាការថា ជនជាប់ចោទទី១ ឈ្មោះ Plasse Steve ភេទប្រុស អាយុ ៤១ ឆ្នាំ ជនជាតិ កាណាដា សញ្ជាតិបារាំង និងទី២ ឈ្មោះ មិញ ស៊ាងលី ភេទ ស្រី អាយុ ៣៥ ឆ្នាំ។ អ្នកទាំងពីរ គឺជាគូរស្នេហ៍នឹងគ្នា។

លោកចៅក្រម បានថ្លែងបន្តថា នៅក្នុងសំណុំរឿងក្តីនេះ, ពួកគេទាំងពីរត្រូវបានតុលាការខេត្តកំពត កាលពីថ្ងៃ ២២ ខែកញ្ញា ឆ្នាំ ២០២០ កាត់ទោស ដាក់ពន្ធនាគារ ក្នុងម្នាក់ៗ កំណត់ ០២ ឆ្នាំ និង ០៦ ខែ ពីបទ ” ប្រើប្រាស់ និងជួញដូរដោយខុសច្បាប់ នូវសារធាតុញៀន” តាមបញ្ញត្តិ មាត្រា ៤០ និង ៤៥ នៃ ច្បាប់ស្តីពីការគ្រប់គ្រងគ្រឿងញៀន

ជនជាប់ចោទ ទាំងពីរនាក់ បានប្តឹងជំទាស់នឹងសេចក្តីសម្រេច របស់តុលាការខេត្តកំពត ទៅកាន់សាលាឧទ្ធរណ៍ខេត្តព្រះសីហនុ។
តែសាលាឧទ្ធរណ៍ ខេត្តព្រះសីហនុ បានតម្កល់សាលក្រម របស់តុលាការខេត្តកំពត រក្សាទុកជាបានការ ដដែល។ ពួកបានបន្តប្តឹងសារទុក្ខ មកកាន់តុលាការកំពូល។

លោកចៅក្រម បានបន្ថែមថា ជនជាប់ចោទទាំងពីរ ត្រូវបានចាប់ខ្លួនកាលពីថ្ងៃទី ០៣ ខែ មិថុនា ឆ្នាំ២០២០ នៅក្នុងចំណុចកើតហេតុខាងលើ។
ក្រោយឃាត់ខ្លួន, សមត្ថកិច្ចនគរបាលប្រឆាំងគ្រឿងញៀន រឹបអូសបាន ថ្នាំញៀនមួយចំនួន ០៤ កញ្ចប់ ពីពួកគេ៕ រក្សាសិទ្ធិដោយ ៖ ចន្ទា ភា