ភ្នំពេញ ៖ ក្នុងកិច្ចប្រជុំពេញអង្គគណៈរដ្ឋមន្ត្រី នាព្រឹកថ្ងៃទី០៨ ខែតុលា ឆ្នាំ២០២១ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងថា ក្នុងឱកាសបុណ្យភ្ជុំបិណ្ឌកន្លងទៅនេះ រាជរដ្ឋាភិបាលកម្ពុជា មិនបានបិទការឈប់សម្រាក និងការដើរលេងកម្សាន្តរបស់ប្រជាពលរដ្ឋខ្មែរនោះឡើយ ដែលនេះគឺជាការសាកល្បងមួយដ៏ធំរបស់កម្ពុជា ហើយបើក្រោយពិធីបុណ្យភ្ជុំនេះ ស្ថានភាពការឆ្លងរាលដាលនៃជំងឺកូវីដ-១៩ ស្ថិតក្នុងកម្រិតក្រោម ២០០នាក់ ក្នុង១ថ្ងៃ គឺកម្ពុជាអាចឈានទៅបើកដំណើរការសេដ្ឋកិច្ច និងសង្គមឡើងវិញគ្រប់វិស័យ។
![](https://cen.com.kh/wp-content/uploads/2021/10/photo_2021-10-08_11-24-00.jpg)
សម្តេចតេជោ ហ៊ុន សែន បានបញ្ជាក់ថា មិនទុកពេលឱ្យយូរតទៅទៀតនោះទេ ប្រសិនបើក្នុងរង្វង់ ១០ ទៅ ១៥ថ្ងៃ ក្រោយពិធីបុណ្យភ្ជុំបិណ្ឌ ស្ថានភាពរបស់យើងនៅនឹងនរ អត្រាឆ្លងត្រឹមប៉ុណ្ណេះដូចរាល់ថ្ងៃ (ក្នុងកម្រិតក្រោម ២០០នាក់/១ថ្ងៃ) និងការស្លាប់ត្រឹមកម្រិតប៉ុណ្ណេះ (ជាង១០នាក់/១ថ្ងៃ) ខ្ញុំគិតថា ដល់ពេលវេលាដែលយើងត្រូវបើកសេដ្ឋកិច្ច និងសង្គមឡើងវិញលើគ្រប់វិស័យហើយ, តែទោះជាយ៉ាងណា ត្រូវរៀនរស់ទៅតាមគន្លងថ្មី ជាមួយវិធានការ ៣កុំ ៣ការពារ វិធានការសុខាភិបាល វិធានការរដ្ឋបាលរបស់អាជ្ញាធរមូលដ្ឋាន និងការគោរពច្បាប់ទប់ស្កាត់ជំងឺកូវីដ-១៩ ដែលនឹងនាំទៅដល់ការងើបឡើងវិញ នៃសេដ្ឋកិច្ចរបស់យើង។
ជាមួយគ្នានេះ សម្តេចតេជោ ហ៊ុន សែន បានមានប្រសាសន៍ថា សូមអរគុណដល់អាជ្ញាធរពាក់ព័ន្ធទាំងអស់ ដែលបានយកចិត្តទុកដាក់រក្សាសន្តិសុខសណ្តាប់ធ្នាប់ និងទប់ស្កាត់ការឆ្លងរាលដាលជំងឺកូវីដ-១៩ ជូនប្រជាពលរដ្ឋក្នុងឱកាសបុណ្យភ្ជុំបិណ្ឌ, និងអរគុណដល់ប្រជាពលរដ្ឋគ្រប់រូប ដែលមានម្ចាស់ការ និងស្វ័យការពារខ្លួនពីគ្រោះថ្នាក់ចរាចរណ៍ និងបង្ការការចម្លងជំងឺកូវីដ-១៩ ពីមនុស្សម្នាក់ទៅមនុស្សម្នាក់ និងពីតំបន់មួយទៅតំបន់មួយ៕ រក្សាសិទ្ធិដោយ ៖ ពិសិដ្ឋ CEN
![](https://cen.com.kh/wp-content/uploads/2021/10/photo_2021-10-02_11-54-29-2-1.jpg)
![](https://cen.com.kh/wp-content/uploads/2021/10/photo_2021-10-02_11-54-29-1.jpg)
![](https://cen.com.kh/wp-content/uploads/2021/10/photo_2021-10-02_11-54-30.jpg)
![](https://cen.com.kh/wp-content/uploads/2021/10/photo_2021-10-08_06-05-41-6.jpg)
![](https://cen.com.kh/wp-content/uploads/2021/10/photo_2021-10-08_11-24-01-2-1.jpg)
![](https://cen.com.kh/wp-content/uploads/2021/10/photo_2021-10-08_11-24-01-3.jpg)
![](https://cen.com.kh/wp-content/uploads/2021/10/photo_2021-10-08_11-24-01.jpg)
![](https://cen.com.kh/wp-content/uploads/2021/10/photo_2021-10-08_11-24-03-1.jpg)
![](https://cen.com.kh/wp-content/uploads/2021/10/photo_2021-10-08_11-26-50.jpg)
![](https://cen.com.kh/wp-content/uploads/2021/10/photo_2021-10-09_08-50-46-2.jpg)
![](https://cen.com.kh/wp-content/uploads/2021/10/photo_2021-10-09_08-50-46-3.jpg)
![](https://cen.com.kh/wp-content/uploads/2021/10/photo_2021-10-09_08-50-46.jpg)