ភ្នំពេញ ៖ ក្រសួងសុខាភិបាល បានសេចក្តីជូនព័ត៌មានការបង្ការជំងឺ និងបញ្ហាសុខភាព ក្នុងអំឡុងពិធីបុណ្យចូលឆ្នាំខ្មែរប្រពៃណីជាតិខាងមុននេះ គឺត្រូវប្រើប្រាស់ទឹកស្អាត និងម្ហូបអាហារដែលស្អាត និងឆ្អិនជានិច្ច និងគោរច្បាប់ចរាចរណ៍ ដើម្បីបញ្ជៀសការគ្រោះថ្នាក់ណាមួយ។
លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានមានប្រសាសន៍ថា ខ្ញុំសូមប្រកាសធ្វើការក្រើនរំលឹក ជូនដល់ប្រជាជនទាំងអស់ ឲ្យមានការប្រុងប្រយ័ត្នក្នុងការរៀបចំអាហារ ដើម្បីចៀសផុតពីបញ្ហាសុខភាព ដូចជា បញ្ញាឈឺពោះ ក្អួត រាករូ ដែលបណ្តាលមកពីការបរិភោគចំណីអាហារមិនមានអានាម័យស្អាត ឬការពុលស្រាបណ្តាលមកពីការទិញស្រាមកពិសា ដែលជាស្រាបានផលិត ឬបានបិត ដោយមិនមានលក្ខណៈបច្ចេកទេសត្រឹមត្រូវ ដែលទាំងអស់គ្នាត្រូវតែមានការប្រុងប្រយ័ត្នខ្ពស់ ជាពិសេស ការបរិភោគចំណីអាហារនិងភេសជ្ជៈក្នុងអំឡុងពេលប្រារព្ធពិធីបុណ្យចូលឆ្នាំខ្មែរខាងមុខនេះ។ បន្ថែមលើនេះខ្ញុំសូមលើកទឹកចិត្តគ្រប់គ្នា ឲ្យចូលរួមអនុវត្តន៍វិធានការប្រុងប្រយ័ត្ន រួមទាំងការពារផ្ទាល់ខ្លួន និងក្រុមគ្រួសាររបស់ខ្លួន ដើម្បីចៀសផុតពីបញ្ហាទាំងនេះជាពិសេសលើការពុលចំណីអាហារ។
បើមានបញ្ហានៃការពុលអាហារ ឬមានរោគសញ្ញានៃការពុលស្រា ដូចជា ឈឺក្បាល ក្អួត ឈឺពោះ វិលមុខ ស្រវាំងភ្នែក សន្លប់ ប្រកាច់ ពិបាកដកដង្ហើម សូមស្វែងរកការពិនិត្យ និងព្យាបាល ជាបន្ទាន់នៅមណ្ឌលសុខភាព ឬទៅមន្ទីរពេទ្យដែលនៅជិតផ្ទះរបស់លោកអ្នក។
ជាមួយគ្នានេះដែរ ក្រសួងសុខាភិបាល សូមណែនាំចំពោះមនុស្សពេញវ័យទាំងអស់ សូមកុំពិសាគ្រឿងស្រវឹងក្នុងពេលបើកបរ ឬក្នុងពេលបញ្ជាគ្រឿងម៉ាស៊ីន ។ សូមបើកបរដោយមានការប្រុងប្រយ័ត្ន ពាក់ខ្សែក្រវាត់ ជាប់ជានិច្ច ក្នុងពេលបើកបរ កុំបើកបរលឿនពេក និងប្រកាន់ខ្ជាប់នូវច្បាប់ចរាចរណ៍ ដើម្បីរួមគ្នាបញ្ជៀសឲ្យបាននូវគ្រោះថ្នាក់លើដងផ្លូវ ក្នុងឱកាសនៃពិធីបុណ្យចូលឆ្នាំថ្មីនេះ៕ ដោយ ៖ បញ្ញាស័ក្តិ
ខ្លឹមសារដើមទាំងស្រុងដូចមានជនភ្ជាប់ខាងក្រោមនេះ ៖
