រតនគិរី ៖ នាព្រឹកថ្ងៃទី១២ ខែតុលា ឆ្នាំ២០២១ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ អញ្ជើញជាអធិបតីដ៏ខ្ពង់ខ្ពស់ ក្នុងពិធីប្រកាសចូលកាន់មុខតំណែងអភិបាល នៃគណៈអភិបាលខេត្តរតនគិរី។
ពិធីប្រកាសចូលកាន់មុខតំណែងនេះ បានប្រារព្ធឡើងបន្ទាប់ពីព្រះករុណាជាអម្ចាស់ជីវិតលើត្បូង ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានត្រាស់បង្គាប់តែងតាំង ឯកឧត្តម ញ៉ែម សំអឿន ជាអភិបាល នៃគណៈអភិបាលខេត្តរតនគិរី ជំនួសឯកឧត្តម ថង សាវុន ដែលត្រូវបានត្រាស់បង្គាប់តែងតាំងជាអភិបាល នៃគណៈភិបាលខេត្តមណ្ឌលគិរី។
ជាកិច្ចចាប់ផ្ដើម ឯកឧត្តម ថង សាវុន បានធ្វើរបាយការណ៍ស្វាគមន៍ជូន សម្ដេចក្រឡាហោម គណៈអធិបតី ព្រមទាំងអង្គពិធី អំពីស្ថានភាពទូទៅរបស់ខេត្តរតនគិរី និងសមិទ្ធផលការងារបំរើជាតិ និងប្រជាជន ដែលរដ្ឋបាលខេត្តរតនគិរីសម្រេចបាន រួមទាំងការបង្ការទប់ស្កាត់ការឆ្លងរីករាលដាលជំងឺកូវីដ-១៩ នៅក្នុងអាណត្តិការងាររបស់ឯកឧត្តមជាអភិបាលខេត្តនាពេលកន្លងមកនេះ។ ជាមួយគ្នានេះ ឯកឧត្តម ញ៉ែម សំអឿន ក៏បានថ្លែងប្ដេជ្ញាចិត្តសម្រាប់ការចូលកាន់មុខតំណែងជាអភិបាល នៃគណៈអភិបាលខេត្តរតនគិរី បន្ទាប់ពីទទួលព្រះរាជក្រឹត្យ និងត្រារដ្ឋបាលខេត្តរតនគិរី ពី សម្ដេចក្រឡាហោម ស ខេង។
អញ្ជើញមានប្រសាសន៍នាឱកាសនោះ សម្ដេចក្រឡាហោម ក្នុងនាមរាជរដ្ឋាភិបាលកម្ពុជា បានថ្លែងអំណរគុណ និងកោតសរសើរ ឯកឧត្តម ថង សាវុន ដែលក្នុងរយៈពេលកន្លងមកបានខិតខំបំពេញភារកិច្ចដឹកនាំ សម្របសម្រួល សហការជាមួយក្រុមប្រឹក្សា មន្រ្តីរាជការស៊ីវិល កងកម្លាំង និងប្រជាពលរដ្ឋ ធ្វើឱ្យខេត្តរតនគិរី មានការអភិវឌ្ឍរីកចំរើន ការពារបានសន្តិភាព សន្តិសុខ សណ្ដាប់ធ្នាប់សារណៈ ពិសេសការផ្ដល់សេវាសាធារណៈជូនប្រជាពលរដ្ឋ ទោះបីចុងក្រោយនេះមានការប្រឈមការរីករាលដាលជំងឺកូវីដ-១៩ ក៏ដោយ។ ជាមួយគ្នានេះ សម្ដេចបានស្នើក្រុមប្រឹក្សា ថ្នាក់ដឹកនាំ មន្ត្រីរាជការ និងប្រជាពលរដ្ឋ ទាំងអស់សូមផ្ដល់ការគាំទ្រ ឯកឧត្តម ញ៉ែម សំអឿន ក្នុងការកិច្ចការបំរើជាតិ និងប្រជាជន ក្នុងឋានៈជាអភិបាលថ្មី នៃគណៈអភិបាលខេត្តរតនគិរី។
សម្ដេច បានផ្ដល់អនុសាសន៍ណែនាំឱ្យរដ្ឋបាលខេត្តរតនគិរី បន្តខិតខំថែរក្សាការពារសុខសន្តិភាព និងសណ្ដាប់ធ្នាប់ ដែលជាគន្លឹះនៃធានាការអភិវឌ្ឍសេដ្ឋកិច្ចសង្គម ព្រមទាំងខិតខំបន្តអនុវត្តវិធានការបង្ការទប់ស្កាត់ការឆ្លងរីករាលដាលជំងឺកូវីដ-១៩ ដែលដាក់ចេញដោយ សម្ដេចតេជោប្រមុខរាជរដ្ឋាភិបាល។ ពាក់ព័ន្ធនឹងស្ថានភាពកូវីដ-១៩ សម្ដេចក្រឡាហោម បានបន្តផ្ដល់ការណែនាំអំពីស្ថានភាព នៃការរៀនរស់ជាមួយនឹងជំងឺកូវីដ-១៩ ដើម្បីធានាប្រក្រតីភាពនៃការបំពេញភារកិច្ច ជាក់ស្ដែងការប្រារព្ធពិធីប្រកាសអភិបាលខេត្ត ដែលរៀបចំនៅទីតាំងបរិវេណខាងក្រៅ កាត់បន្ថយអ្នកចូលរួម ពាក់ម៉ាស់ បាញ់អាល់កុល និងរក្សាគម្លាតនាពេលនេះគឺវិធីរៀនរស់ជាមួយកូវីដ-១៩ហើយ។
សម្ដេចឧបនាយករដ្ឋមន្រ្តី បានណែនាំអភិបាលខេត្តថ្មី រួមទាំងថ្នាក់ដឹកនាំមន្រ្តីរាជការស៊ីវិល និងកងកម្លាំង ពិសេសកម្លាំងការពារព្រំដែន សូមការពារឱ្យបានដាច់ខាតនូវបូរណភាពទឹកដី និងអធិបតេយ្យភាពជាតិ ពង្រឹងកិច្ចសហប្រតិបត្តិការជាមួយខេត្តជាប់ព្រំដែន ដើម្បីជំរុញការអភិវឌ្ឍព្រំដែនឱ្យទៅជាព្រំដែនមានទាំងសន្តិភាព និងរីកចំរើនលើវិស័យសេដ្ឋកិច្ច និងពាណិជ្ជកម្ម ព្រមទាំងខិតខំពង្រឹងកិច្ចសហប្រតិបត្តិការទប់ស្កាត់បទល្មើសឆ្លងដែនគ្រប់ប្រភេទ។ សម្ដេចក៏បានណែនាំឱ្យខិតខំថែរក្សា និងការពារព្រៃឈើ ព្រមទាំងធនធានធម្មជាតិផ្សេងៗទៀត ដែលមានក្នុងខេត្តឱ្យបានល្អ។
ទន្ទឹមនឹងការបន្តលើកទឹកចិត្តឱ្យខិតខំផ្ដល់សេវាសាធារណៈជូនប្រជាពលរដ្ឋឱ្យបានល្អ សម្ដេចក្រឡាហោម ស ខេង បានផ្ដល់ទស្សនៈឱ្យថ្នាក់ដឹកនាំ និងមន្ត្រីចំណុះរដ្ឋបាលខេត្តទាំងអស់ ខិតខំប្រមូល និងដោះស្រាយបញ្ហាប្រជាពលរដ្ឋឱ្យបានល្អ បើកចិត្តឱ្យបានទូលាយដើម្បីទទួលយកមតិរិះគន់កែលម្អរ និងសំណូមពរនានាពីប្រជាពលរដ្ឋ និងពីមជ្ឈដ្ឋាននានា។ ជាមួយគ្នានេះ សម្ដេចបានណែនាំឱ្យយកចិត្តទុកដាក់ផ្ដល់ភាពកក់ក្ដៅជូនប្រជាពលរដ្ឋឱ្យបានល្អ ផ្ដល់សេវាសាធារណៈដោយគ្មានការរើសអើង និងប្រកាន់និន្នាការនយោបាយ។
សម្ដេច ក៏បានបន្តមានប្រសាសន៍អំពីដំណើរការ នៃការធ្វើកំណែទម្រង់វិមជ្ឈការ និងវិសហមជ្ឈការ ពិសេសវឌ្ឍនភាពនៃការផ្ទេរមុខងារ ធនធាន និងសិទ្ធិអំណាច ពីថ្នាក់ជាតិ ទៅថ្នាក់ក្រោមជាតិ ដើម្បីថ្នាក់ដឹកនាំមូលដ្ឋាន មានរាជធានី ខេត្ត ក្រុង ស្រុក ខណ្ឌ ឃុំសង្កាត់ កាន់តែមានលទ្ធភាពក្នុងការបំរើសេវាធារណៈ និងឆ្លើយតបតម្រូវការប្រជាពលរដ្ឋដែលនៅកៀកនឹងខ្លួនឱ្យបានកាន់តែល្អប្រសើរ។ សម្ដេចក្រឡាហោម ក៏បានណែនាំឱ្យមន្រ្តីរាជការមូលដ្ឋានទាំងអស់ សូមខិតខំកៀរគរការគាំទ្រពីប្រជាពលរដ្ឋបានសកម្ម ដើម្បីធានាការអនុវត្តគោលនយោបាយនានា រួមទាំងគោលនយោបាយភូមិឃុំសង្កាត់មានសុវត្ថិភាពឱ្យទទួលបានលទ្ធផលប្រសើរ។
សម្ដេចឧបនាយករដ្ឋមន្រ្តី ក៏បានគូសបញ្ជាក់អំពីការត្រៀមរៀបចំការបោះឆ្នោតជ្រើសរើសសមាជិកក្រុមប្រឹក្សាឃុំសង្កាត់ ឆ្នាំ២០២២ និងដំណើរការបោះឆ្នោតសកល និងអសកលជាបន្តបន្ទាប់ទៀត ដោយបានណែនាំឱ្យមានការចូលរួមធ្វើឱ្យដំណើរការបោះឆ្នោតនេះបានប្រព្រឹត្តទៅដោយរលូន ដ្បិតការបោះឆ្នោតក្រុមប្រឹក្សា ឃុំសង្កាត់ ក្រុងស្រុកខណ្ឌ និងរាជធានីខេត្តនេះ គឺជាផ្នែកមួយយ៉ាងសំខាន់ក្នុងដំណើរការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ។ សម្ដេចបានស្នើឱ្យគណៈអភិបាល និងក្រុមប្រឹក្សា ត្រូវមានកិច្ចសហការគ្នាអនុវត្តភារកិច្ចតាមច្បាប់ឱ្យបានល្អ។
ជាការកត់សំគាល់ ពីវេទិការអធិបតីនេះដែរ សម្ដេចក្រឡាហោម ស ខេង ឧបនាយករដ្ឋមន្រ្តី បានផ្ដល់អនុសាសន៍ឱ្យថ្នាក់ដឹកនាំក្រុមការងារចុះជួយមូលដ្ឋានខេត្ត ក្រុមប្រឹក្សាខេត្ត និងគណៈអភិបាលខេត្តរតនគិរី ត្រូវពិភាក្សាគ្នា ដើម្បីរៀបចំសមាសភាពអភិបាលរងខេត្តម្នាក់មកជំនួស ឯកឧត្តម ញ៉ែម សំអឿន ដែលឡើងពីអភិបាលរងខេត្ត មកធ្វើជាអភិបាលខេត្ត ក្នុងនោះសម្ដេចបានស្នើឱ្យពិនិត្យលទ្ធភាពផ្ដល់អាទិភាពជូនមន្រ្តីជាជនជាតិដើមភាគតិច៕រក្សាសិទ្ធិដោយ ៖ កូលាប
