ភ្នំពេញ ៖ ក្នុងពិធីប្រកាសចូលកាន់តំណែងអភិបាលខេត្តបាត់ដំបង នៅព្រឹកថ្ងៃទី១១ ខែតុលា ឆ្នាំ២០២១ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានបញ្ជាក់ថា ឥឡូវនេះយើងចូលដល់ ខែតុលា ហើយ, បើតាមការសម្រេចរបស់រាជរដ្ឋាភិបាល គឺឆ្នាំនេះយើងមិនបានធ្វើព្រះរាជពិធី បុណ្យអុំទូក បណ្តែតប្រទីប អកអំបុក និងសំពះព្រះខែ ដូចបណ្តាឆ្នាំមុនៗនោះទេ ដោយសារបញ្ហាកូវីដ-១៩ គំរាមកំហែងនេះឯង។
សម្តេចក្រឡាហោម ស ខេង បានកោតសរសើរពីផែនការយុទ្ធសាស្ត្រប្រយុទ្ធប្រឆាំងនឹងជំងឺកូវីដ-១៩ របស់រាជរដ្ឋាភិបាលកម្ពុជា ក្រោមការដឹកនាំរបស់ សម្ដេចតេជោ ហ៊ុន សែន នាយករដ្ឋមន្ត្រី ដែលទទួលបានលទ្ធផលល្អគួរជាទីមោទនៈ ធ្វើឲ្យអត្រាអ្នកឈឺធ្ងន់ធ្ងរត្រូវបានកាត់បន្ថយជាច្រើន និងធ្វើឲ្យអត្រាអ្នកស្លា.ប់ដោយសារជំងឺកូវីដ-១៩ ក៏ត្រូវបានកាត់បន្ថយជាច្រើនដូចគ្នា។
លោកសុខ លូ ត្រូវបានផ្លាស់ពីអភិបាលខេត្តកំពង់ធំ ទៅធ្វើជាអភិបាលខេត្តបាត់ដំបង, លោកបានថ្លែងថា សូមចូលរួមជាមួយបងប្អូនមន្ត្រីរាជការ ប្រជាពលរដ្ឋទាំងអស់ក្នុងខេត្តបាត់ដំបង ដើម្បីបន្តអភិវឌ្ឍន៍ខេត្តមួយនេះឲ្យកាន់តែរីកចម្រើនថែមទៀត។
ក្នុងឱកាសនោះ សម្តេចក្រឡាហោម ថែមទាំងបានបន្តជំរុញប្រជាពលរដ្ឋ ចូលរួមអនុវត្តន៍វិធានការ ៣កុំ និង៣ការពារ ជាពិសេសរៀនរស់តាមគន្លងថ្មី ក្នុងបរិបទទប់ស្កាត់ជំងឺរាតត្បាតកូវីដ-១៩៕ រក្សាសិទ្ធិដោយ ៖ ពិសិដ្ឋ CEN
