កណ្ដាល ៖ បុរសម្នាក់ បានដើរឆ្លងថ្នល់ត្រូវរថយន្ដមួយគ្រឿងបើកលឿន បុកបណ្ដាលឲ្យស្លាប់ភ្លាមៗ នៅម៉ោង២រំលងអធ្រាត្រថ្ងៃទី៩ ខែមេសា ឆ្នាំ២០១៨ លើផ្លូវជាតិលេខ១ ក្នុងចន្លោះគីឡូម៉ែត្រលេខ៣១-៣២ ស្ថិតក្នុងភូមិកណ្តាល ឃុំបន្ទាយដែក ស្រុកកៀនស្វាយ ខេត្តកណ្តាល ។
មន្ដ្រីនគរបាលចរាចរណ៍ស្រុកលើកដែកបានឲ្យដឹងថា ជនរងគ្រោះស្លាប់បាត់បង់ជីវិតមិនស្គាល់អត្ដសញ្ញាណ ភេទប្រុស រីឯរថយន្ដមិនស្គាល់ម៉ាក បើកបរដោយជនមិនស្គាល់អត្ដសញ្ញាណ បើករថយន្ដគេចខ្លួនបាត់ស្រមោល ។
មន្ដ្រីនគរបាលចរាចរណ៍ បានបន្ដថា នៅមុនពេលកើតហេតុជនរងគ្រោះ កំពុងដើរឆ្លងផ្លូវ ក៏មានរថយន្ដមួយគ្រឿងមិនស្គាល់ម៉ាកបើកបរ ដោយល្បឿនលឿន បានជ្រុលទៅបុកជនរងគ្រោះពេញមួយទំហឹង បណ្ដាលឲ្យស្លាប់ភ្លាមៗ ។ ក្រោយពីមានហេតុការណ៍កើត ឡើង សមត្ថកិច្ចជំនាញបានចុះមកធ្វើការវាស់វែងកន្លែងកើតហេតុ រួចកយកសាកសពទៅតម្កល់ទុកដើម្បីស្វែងរកសាច់ញាតិមកទទួលធ្វើបុណ្យតាមប្រពៃណី ៕ ដោយ ៖ បញ្ញាស័ក្តិ
