កោះកុង៖ បុរសម្នាក់ផឹកស្រាស្រវឹងជោកជាំ ជិះម៉ូតូរេចង្កូតបុករបងផ្ទះគេ បណ្តាលឲ្យបាក់របង ស្លាប់ខ្លួនឯង ដោយរបួសបែកមុខមាត់។
នគរបាលក្រុងខេមរភូមិន្ទ នៅថ្ងៃទី៩ខែមេសាឆ្នាំ២០១៨ បានឲ្យដឹងថា នៅយប់ថ្ងៃទី៨ ខែមេសា ឆ្នាំ ២០១៨ វេលាម៉ោង ១១ យប់ មានករណីគ្រោះថ្នាក់ចរាចរ ១ លើក នៅចំណុចភូមិស្មាច់មានជ័យ សង្កាត់ស្មាច់មានជ័យ ជនរងគ្រោះមានឈ្មោះ ឌុល ស្រ៊ាន់ ភេទប្រុស អាយុ២៣ ឆ្នាំ ជនជាតិខ្មែរ ទីលំនៅភូមិស្មាច់មានជ័យ មុខរបរកម្មករសំណង់ បើកម៉ូតូម៉ាក viner ពណ៌ក្រហម គ្មានស្លាកលេខ បានបើកទៅបុកនឹងជញ្ជាំងរបងផ្ទះគេ ដោយខ្លួនឯង បណ្តាលឲ្យបោកផ្ទប់ នឹងរបងថ្ម ស្លាប់នៅនឹងកន្លែង។
នគរបាលមូលដ្ឋាន បានបញ្ជាក់ថា ករណីបុរសម្នាក់ស្លាប់នេះ ដោយសារតែមូលហេតុ អ្នកបើកបរមានជាតិស្រវឹង ក្រោយពីផឹកស្រាជោកជាំ ហើយជិះម៉ូតូ ទើបធ្វើឲ្យបាត់ម្ចាស់ការក្នុងការគ្រប់គ្រងស្មារតី ទើបបណ្តាលឲ្យរេចង្កូតម៉ូតូបុករបងផ្ទះគេ ស្លាប់ខ្លួនឯង៕ ដោយ៖បញ្ញាស័ក្តិ