ភ្នំពេញ៖លោក តារ៉ូ កូណូ (Taro KONO) រដ្ឋមន្ត្រីការបរទេសជប៉ុន បានគូសបញ្ជាក់អំពីអាទិភាពសំខាន់ៗចំនួនបី ដែលរដ្ឋាភិបាលជប៉ុនបន្តជួយដល់កម្ពុជា គឺប្រពន្ធឡូជីស្ទីក (logistic) ការបណ្តុះបណ្តាលធនធានមនុស្ស និងការពង្រឹងមុខងារសេវាទីក្រុង។
នេះបើតាមសេចក្តីថ្លែងការណ៍ របស់ក្រសួងការបរទេស និងសហប្រតិបត្តិការអន្តរជាតិ នាថ្ងៃទី៩ ខែមេសា ឆ្នាំ២០១៨ ។ សេចក្តីថ្លែងការណ៍បានបញ្ជាក់ថា កម្ពុជានិងជប៉ុនបន្តពង្រឹងទំនាក់ទំនងមិត្តភាព និងកិច្ចសហប្រតិបត្តិការលើគ្រប់វិស័យ ដែលផ្តើមចេញពីក្នុងជំនួបពិភាក្សាការងារជាមួយលោកទេសរដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ ជាមួយលោក តារ៉ូ កូណូ (Taro KONO) រដ្ឋមន្ត្រីការបរទេសជប៉ុន នាថ្ងៃទី៨ ខែមេសា ឆ្នាំ២០១៨ នៅវិមានសន្តិភាព។
រដ្ឋមន្ត្រីការបរទេសជប៉ុន និងបានគូសបញ្ជាក់ទៀតថា ដំណើរទស្សនកិច្ចនេះ នឹងរួមចំណែកដ៏សំខាន់ ក្នុងការពង្រឹងបន្ថែមទៀតនូវទំនាក់ទំនងមិត្តភាព និងកិច្ចសហប្រតិបត្តិការពិសេសក្នុងពេលដែលប្រទេសទាំងពីរ កំពុងប្រារព្ធខួបលើកទី៦៥ នៃការបង្កើតទំនាក់ទំនងការទូត ហើយក៏ស្របនឹងឱកាស ដ៏វិសេសវិសាល នៃព្រះរាជដំណើរទស្សនកិច្ចរបស់ព្រះករុណាព្រះមហាក្សត្រកម្ពុជា ទៅកាន់ប្រទេសជប៉ុន ដើម្បីចូលរួមក្នុងខួប អនុស្សាវរីយ៍លើកទី៤ នៃទិវាអន្តរជាតិព្រះពុទ្ធសាសនានៅទីក្រុងកូប៉េ។
លោក តារ៉ូ កូណូ ក៏បានវាយតម្លៃខ្ពស់ចំពោះការវិវត្តដ៏ល្អប្រសើរនៃទំនាក់ទំនងរវាងប្រទេសទាំងពីរ ជាពិសេសបន្ទាប់ពីដំណើរទស្សនកិច្ចការងារផ្លូវការរបស់សម្ដេចតេជោហ៊ុន សែន នាយករដ្ឋមន្ដ្រីកម្ពុជា នៅប្រទេសជប៉ុន ក្នុងខែសីហា ឆ្នាំ២០១៧កន្លងមក ហើយនិងដំណើរទស្សនកិច្ចជាបន្តបន្ទាប់របស់ឥស្សរជនជាន់ខ្ពស់ របស់ក្រសួងការបរទេសជប៉ុន និងទីប្រឹក្សារបស់នាយករដ្ឋមន្ដ្រីជប៉ុន មកកាន់កម្ពុជាថ្មីៗនេះ។
លោករដ្ឋមន្ដ្រីការបរទេសជប៉ុន បានសម្ដែងមនោសញ្ចេតនារីករាយ ដែលបានមកបំពេញទស្សនកិច្ចផ្លូវការជាលើកទី១នៅកម្ពុជា បន្ទាប់ពីចូលកាន់ការងារ ជារដ្ឋមន្ដ្រីការបរទេសហើយ បានសម្ដែងការចាប់អារម្មណ៍ និងកោតសរសើរយ៉ាងខ្លាំង ចំពោះការរីកចម្រើនលើគ្រប់វិស័យ ដែលកម្ពុជាសម្រេចបានដោយប្រៀបធៀបទៅនឹងឆ្នាំ១៩៩២ ដែលលោកបានមកធ្វើទស្សនកិច្ច។
លោករដ្ឋមន្ត្រី បានគូសបញ្ជាក់អំពីជំហររបស់ជប៉ុន ក្នុងការបន្តពង្រឹង និងពង្រីកទំនាក់ទំនងមិត្តភាព និងកិច្ចសហប្រតិបត្តិការ ជាមួយនឹងកម្ពុជាបន្តទៅទៀត។ ក្នុងជំនួបនេះ រដ្ឋមន្ត្រីការបរទេសទាំងពីរ ក៏បានពិភាក្សាគ្នា លើការពង្រឹងកិច្ចសហប្រតិបត្តិការ រវាងប្រទេសទាំងពីរ ទាំងក្នុងក្របខណ្ឌទ្វេភាគី ក្របខណ្ឌមេគង្គ-ជប៉ុន ក្របខណ្ឌអាស៊ាន-ជប៉ុន ព្រមទាំងក្របខណ្ឌអន្តរជាតិ។
ក្នុងក្របខ័ណ្ឌទំនាក់ទំនងទ្វេភាគី លោកទេសរដ្ឋមន្ដ្រី បានវាយតម្លៃខ្ពស់ចំពោះទំនាក់ទំនងមិត្តភាពដ៏យូរលង់ និងភាពជាដៃគូសហប្រតិបត្តិការដ៏រឹងមាំ រវាងកម្ពុជា-ជប៉ុន ព្រមទាំងបានថ្លែងអំណរគុណយ៉ាងជ្រាលជ្រៅ ចំពោះជំនួយដែលជប៉ុនបានផ្ដល់មកកាន់កម្ពុជា ក្នុងដំណើរការស្វែងរកសន្តិភាពនៅកម្ពុជា ក៏ដូចជាក្នុងដំណើរការស្ដារ និងអភិវឌ្ឍន៍ប្រទេសជាតិឡើងវិញ ពិសេសការអភិវឌ្ឍសេដ្ឋកិច្ច-សង្គម អភិបាលកិច្ចល្អ និងរចនាសម្ព័ន្ធរូបវ័ន្ត ដ៏ច្រើនលើសលប់នៅកម្ពុជា។
រដ្ឋមន្ត្រីការបរទេសជប៉ុន បានគូសបញ្ជាក់ថា ជប៉ុនបានចាត់តុកការរីកចម្រើននៅកម្ពុជា មានសារសំខាន់ណាស់ ដោយសារកម្ពុជាមានទីតាំងជាយុទ្ធសាស្ត្រនៅក្នុងតំបន់មេគង្គ និងបានគូសបញ្ជាក់ពីជំហររបស់រដ្ឋាភិបាលជប៉ុនក្នុងការបន្តជួយដល់កម្ពុជា ដើម្បីឲ្យកម្ពុជាសម្រេចបាននូវគោលដៅប្រែក្លាយទៅជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ ៕ ដោយ៖បញ្ញាស័ក្តិ
