ទីភ្នាក់ព័ត៌មាន Reuter របស់អង់គ្លេសឲ្យដឹងថា លោក Zhang Weiqiang សញ្ជាតិចិន ជាអ្នកវិទ្យាសាស្ត្របង្កើតពូជស្រូវ ធ្វើការនៅក្រុមហ៊ុនបច្ចេកវិទ្យាជីវសាស្ត្រ Ventria នៅទីក្រុង Junction រដ្ឋ Kansas ចៅក្រម Carlos Murguia នៅថ្ងៃ ៤ មេសាកន្លងមកបានប្រកាសសាលក្រមជាប់ពន្ធនាគារចំពោះ Zhang Weiqiang អាយុ ៣៦ឆ្នាំ ឲ្យជាប់ពន្ធនាគា ១២១ខែ ។ លោក Zhang បានត្រូវកាត់ទោសពីបទមានឧបាយកលលួចអាថ៌កំបាំងពាណិជ្ជកម្ម និងដឹកជញ្ជូនផលចោរកម្មរបស់សហព័ន្ធ ។
ពលរដ្ឋចិន Zhang Weiqiang
មន្ត្រីម្នាក់នៅក្រសួងយុត្តិធម៌អាមេរិកវាយតម្លៃថា ៖ ទណ្ឌកម្មថ្ងៃនេះបង្ហាញឲ្យឃើញថា វានឹងរង់ចាំក្រុមអ្នកប៉ុនប៉ងលួចការសម្ងាត់ពាណិជ្ជកម្មពីក្រុមហ៊ុនអាមេរិក ។
លោក Zhang បានទទួលសញ្ញាប័ត្របណ្ឌិត និងសកលវិទ្យាល័យ Louisiana ហើយធ្វើការឲ្យក្រុមហ៊ុន Ventria ដែលជំនាញអំពីកម្មវិធីបម្រែបម្រួលហ្សែនស្រូវទុកសម្រាប់បម្រើឲ្យវិស័យវេជ្ជសាស្ត្រ ។
បណ្តាអយ្យការអះអាងថា លោក Zhang បានលួចរក្សាទុកគ្រាប់ពូជរបស់ក្រុមហ៊ុននាគេហដ្ឋានឯកជន ។ នៅឆ្នាំ ២០០៣ លោក Zhang បានអមដំណើរប្រតិភូមួយរបស់វិទ្យាស្ថានស្រាវជ្រាវកសិកម្មនៅប្រទេសចិន ធ្វើទស្សនកិច្ចនៅបណ្តាមូលដ្ឋាននាតំបន់ភាគខាងលិចតំបន់កណ្តាលអាមេរិក ។ ក្រោយមកកងកម្លាំងសមត្ថកិច្ចអាមេរិក បានរកឃើញគ្រាប់ពូជរបស់ក្រុមហ៊ុន Ventria នៅក្នុងវ៉ាលីសរបស់ភ្ញៀវចិនទាំងនោះ ពេលពួកគេត្រៀមវិលត្រឡប់ទៅស្រុកវិញ។
មុននោះឆ្នាំ ២០១៣ ដែរ Mo Hailong អាយុ ៤៦ឆ្នាំ និងពលរដ្ឋចិន ៦រូបទៀត បានត្រូវអាជ្ញាធរអាមេរិក ធ្វើការចោទប្រកាន់ដោយពួកគេទាំងនោះបានលួចជីកយកគ្រាប់ពូជពីកសិដ្ឋាននៅ Iowa កាលពីខែឧសភាឆ្នាំ ២០១១ ហើយប៉ុនប៉ងបញ្ជូនវាទៅកាន់ប្រទេសចិន ។ ច្បាប់របស់អាមេរិកចាត់ទុកករណីបែបនេះគឺជាការគំរាមកំហែងដល់សន្តិសុខជាតិ ពុំមែនជាបទល្មើសធម្មតាទេ៕ សូយន
