ស្ត្រីម្នាក់បានបង្ហោះសារនៅលើបណ្តាញសង្គមហ្វេសប៊ុក កាលពីថ្ងៃទី៤ ខែមេសា ដោយសម្តែងការមិនពេញចិត្ត និងហួសចិត្តយ៉ាងខ្លាំង ចំពោះធនាគារ ABA បន្ទាប់ពីគាត់បានទៅដកប្រាក់ចំនួន ១០០ ដុល្លារ នៅទូ ATM ស្រាប់តែបញ្ចេញនូវក្រដាស ១០០ ដុល្លារ ដែលមានសភាពចាស់ខ្លាំង ហើយពុំអាចចាយវាយបានទៀត ។
អតិថិជនរូបនោះបានសរសេររៀបយ៉ាងវែងជាភាសាអង់គ្លេស នៅលើគណនីហ្វេសប៊ុករបស់ខ្លួនយ៉ាងដូច្នេះថា៖ «ផ្ញើជូនធនាគារ ABA. នេះគឺជាបទពិសោធន៍លើកដំបូងសម្រាប់ខ្ញុំ ដែលខ្ញុំទទួលការបោកប្រាស់ពីទូ ATM របស់ធនាគារ ABA ។ កាលពីថ្ងៃទី៣ ខែមេសា ឆ្នាំ២០១៨ នៅវេលាម៉ោង ៧ និង ៥៨ នាទី ខ្ញុំបានទៅដកលុយ ១០០ ដុល្លារ ពីម៉ាស៊ីន ATM នៃធនាគារ ABA ស្ថិតនៅផ្លូវលេខ ៣៣៧ ហើយវាបានបញ្ចេញក្រដាសប្រាក់ ១០០ ដុល្លារ ប៉ុន្តែ ខ្ញុំពិតជាភ្ញាក់ផ្អើល នៅពេលឃើញវាមានសភាពចាស់ខ្លាំង ដែលដល់ថ្នាក់ពុំអាចចាយបាន ។ ភ្លាមៗនោះ ខ្ញុំបានទាក់ទងទៅកាន់លេខបន្ទាន់ (០៩៨២០៣៣៣៣) ដែលបិទភ្ជាប់នៅនឹង ATM ។ ភ្ញាក់ងារធនាគារបានប្រាប់ខ្ញុំឲ្យនាំយកក្រដាសប្រាក់ ១០០ ដុល្លារ នោះ ទៅកាន់សាខាណាមួយរបស់ ABA ដើម្បីត្រួតពិនិត្យលេខសម្គាល់នៃក្រដាសប្រាក់នោះ និងដោះស្រាយបញ្ហានេះ៖
តើអ្នកដឹងទេថា ដំណោះស្រាយរបស់ពួកគេយ៉ាងម៉េចដែរ?
១- ខ្ញុំបាននាំយកក្រដាសប្រាក់នេះ ទៅកាន់ធនាគារ ABA (សាខាទួលគោក) បន្ទាប់ពីបានទៅដល់ទីនោះ បុគ្គលិក ABA បានបញ្ជូនករណីរបស់ខ្ញុំពីមនុស្សម្នាក់ ទៅកាន់មនុស្សម្នាក់ ។
២- បន្ទាប់ពីខ្ញុំរអ៊ូរទាំខ្លាំងពេក ពួកគេនិយាយថា សូមទុកក្រដាស ១០០ ដុល្លារ នោះ ជាមួយពួកគេសិន ហើយពួកគេនឹងទាក់ទងទៅអ្នកទទួលបន្ទុក ដើម្បីត្រួតពិនិត្យលេខសម្គាល់ក្រដាសប្រាក់នេះ ហើយនឹងជូនដំណឹងមកកាន់ខ្ញុំវិញនៅពេលក្រោយ ។
៣- ខ្ញុំបានរង់ចាំជិត ៤ ម៉ោង ក៏នៅតែគ្មានការជូនព័ត៌មាន រហូតទាល់តែខ្ញុំទាក់ទងទៅម្តងទៀត ហើយនៅពេលនោះ ពួកគេបាននិយាយថា លេខលុយ (serial number) នៃក្រដាសប្រាក់ ១០០ ដុល្លារ នោះ មិនមែនជារបស់ ATM របស់ពួកគេទេ ហេតុដូចនេះ ពួកគេនឹងត្រួតពិនិត្យកាមេរ៉ាសុវត្ថិភាពនៅទីនោះឡើងវិញ ដើម្បីឲ្យប្រាកដករណីនេះ ។ អូខេ! ខ្ញុំស្វាគមន៍រាល់ការស៊ើបអង្កេតរបស់ពួកគេ ប៉ុន្តែ សូមផ្តល់ឲ្យខ្ញុំនូវភាពយុត្តិធម៌ ។ ក្រដាសប្រាក់នោះ ដែលខ្ញុំដកពីធនាគារ ATM របស់អស់អ្នក គឺត្រឹមតែក្រដាស ១០០ ដុល្លារ ប៉ុណ្ណោះ ហើយអ្នកនិយាយថា វាមិនមែនជារបស់អស់អ្នក ។ មកទល់ពេលនេះ ខ្ញុំពុំទាន់ទទួលការឆ្លើយតបពីពួកគេទេ ។
វាជារឿងពិតស្ទើរតែពុំគួរឲ្យជឿសម្រាប់ខ្ញុំ ហើយខ្ញុំពិតជាអស់សង្ឃឹមជាមួយធនាគារនេះ ដែលខ្ញុំតែងជឿទុកចិត្ត និងសហការជាមួយ ។
– អ្នកធ្វើការយឺតយ៉ាវណាស់ ក្នុងការឆ្លើយតបដំណោះស្រាយរបស់អតិថិជន ។
– ការគ្រប់គ្រងសាច់ប្រាក់ និងប្រព័ន្ធសន្តិសុខរបស់អស់អ្នក គឺនៅមានកម្រិត, ហេតុនេះ អ្នកពុំអាចគ្រប់គ្រង និងធានាសុវត្ថិភាពសាច់ប្រាក់ជូនអតិថិជនរបស់អ្នកបាន ជាមួយការបោកប្រាស់លុយរបស់ពួកគេបែបនេះ ។
– យើងផ្ញើលុយរបស់យើងជាមួយអ្នក ហើយយើងប្រើលុយរបស់យើង យើងមិនមែនជាចោរទេ ប៉ុន្តែ អ្នកធ្វើឲ្យយើងបាត់បង់លុយរបស់យើង និងចំណាយពេលវេលាច្រើន ដោយគ្មានដំណោះស្រាយ ។
សំរាប់ខ្ញុំ លុយ ១០០ ដុល្លារ មិនច្រើនទេ ប៉ុន្តែ កេរ្តិ៍ឈ្មោះរបស់អ្នកទៅវិញទេ ។ សូមផ្តល់ភាពយុត្តិធម៌ត្រឹមត្រូវជូនអតិថិជនរបស់អ្នកផង ។ ខ្ញុំសូមអះអាងថា ខ្ញុំជាមនុស្សមានភាពសច្ចៈត្រឹមត្រូវម្នាក់ ហើយអ្វីដែលខ្ញុំបានលើកឡើងក្នុងអត្ថបទនេះគឺជារឿងពិត ដែលបានកើតឡើងមកលើរូបខ្ញុំ ។
ជាទីបញ្ចប់ ខ្ញុំសូមអរគុណអ្នកទាំងអស់គ្នា ដែលបានចែករំលែកបញ្ហារបស់ខ្ញុំ!! ៕ ប្រែសម្រួលដោយ៖ ចន្ទី
