កំពង់ស្ពឺ ៖ ក្រោមការដឹកនាំបញ្ជាផ្ទាល់ពីលោកឧត្ដមសេនីយ៍ទោ សម សាមួន ស្នងការនគរបាលខេត្ដកំពង់ស្ពឺ នៅពីថៃ្ងទី០៥ ខែវិច្ឆិកា ឆ្នាំ២០២១ វេលាម៉ោង០៩និង០០នាទី អធិការនគរបាលស្រុកឧដុង្គ ដឹកនាំដោយលោកវរសេនីយ៍ឯក ខឹម សាម៉ុន បានដឹកនាំកម្លាំងចុះស្រាវជ្រាវនិងឈានទៅឃាត់មុខសញ្ញាក្មេងទំនើងចំនួន០២នាក់ ចំណោមបក្ខពួកជាច្រើនទៀត។
សមត្ថកិច្ចបានឲ្យដឹងថាក្មេងទំនើងទី១-ឈ្មោះ អូន រក្សា ភេទប្រុស អាយុ២៣ឆ្នាំ នៅភូមិត្រាចទង ឃុំក្សេមក្សាន្ដ ស្រុកឧដុង្គ ខេត្ដកពង់ស្ពឺ ជាអ្នកដាវ ក្នុងហេតុការណ៍ខាងលើ។ទី២-ឈ្មោះ អូន លីយ៉ា ភេទប្រុស អាយុ១៧ឆ្នាំ នៅភូមិត្រាចទង ឃុំក្សេមក្សាន្ដ ស្រុកឧដុង្គ ខេត្ដកពង់ស្ពឺ ជាអ្នកដំបងឈើ ក្នុងហេតុការណ៍ខាងលើ។ រីឯបក្ខពួកផ្សេងទៀតគេចខ្លួន(កំពុងស្រាវជ្រាវបន្ដ)។
ប៉ុន្មានថ្ងៃនេះ មានបណ្ដាញសង្គមហ្វេសប៊ុកបានបន្ដផ្សព្វផ្សាយនិងចែកចាយរូបភាព ព័ត៌មានក្មេងទំនើងដែលស្រែកឡូឡារក្នុងរូបភាពកាន់ដំបងឈើ ដាវដែកស្រែករកអ្នកណាជើងខ្លាំងចង់វា.យគ្នានៅក្នុងទិដ្ឋភាព ដែលមានបងប្អូនពលរដ្ឋកំពុងតែបង់ត្រីដោយបង្ហាញអំពីសកម្មភាពអួតក្អេងក្អាងថា អាណាចង់វា.យអញចេញមក។
បច្ចុប្បន្នសមត្ថកិច្ចនគរបាលស្រាវជ្រាវនិងឃាត់ខ្លួន យកមកសាកសួរនៅ អធិការដ្ឋាននគរបាលស្រុកឧដុង្គ ដើម្បីបំពេញនីតិវិធីបញ្ជូនមកការិយាល័យជំនាញ ដើម្បីចាត់ការអនុវត្ដនីតិវិធីបន្ដ៕ រក្សាសិទ្ធិដោយ ៖ កូលាប
