ភ្នំពេញ ៖ ក្នុងជំនួបជាមួយ ឯកឧត្តមសាស្រ្ដាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល នាថ្ងៃទី២៤ ខែវិច្ឆិកា ឆ្នាំ២០២១ លោកស្រី ម៉ារៀ សឺមែន នាយិកាធនាគារពិភពលោក ប្រចាំប្រទេសកម្ពុជា ឡាវ និងមីយ៉ាន់ម៉ា តំបន់អាស៊ីបូព៌ា និងប៉ាស៊ីហ្វិក បានទទួលស្គាល់ថា កម្ពុជាបានអនុវត្តវិស័យសុខាភិបាលរបស់ខ្លួនល្អប្រសើរ ធ្វើឱ្យសុខភាពប្រជាជនបានធូរស្រាល ក៏ដូចជាការការពារ ទប់ស្កាត់ និងឆ្លើយតបជំងឺកូវីដ-១៩ ជាពិសេស ការចាក់វ៉ាក់សាំង ជូនប្រជាពលរដ្ឋកម្ពុជា និងជនបរទេសទាំងអស់ដែលរស់នៅប្រទេសកម្ពុជា បានលើស៨៨% នៃចំនួនប្រជាជនសរុប១៦លាននាក់។
លោកស្រី ម៉ារៀ សឺមែន ក្រោយពិភាក្សាការងាររួចហើយ ក៏បានលើកពីសកម្មភាពនៃកិច្ចសហប្រតិបត្តិការបង្ហាញថា ចាប់តាំងពីឆ្នាំ១៩៩៧មក ធនាគារពិភពលោក បានឧបត្ថម្ភ គាំទ្រដល់វិស័យសុខាភិបាលកម្ពុជា ជាច្រើន ដូចជា ÷
១- គម្រោងប្រយុទ្ធនឹងជំងឺឆ្លង និងការអភិវឌ្ឍន៍សុខាភិបាល មានរយៈពេល ៥ឆ្នាំ។
២- គម្រោងគាំទ្រវិស័យសុខាភិបាល (២០០៣-២០១១)។
៣- គម្រោងគាំទ្រវិស័យសុខាភិបាលជំហានទី២ (២០០៨-២០១៦)។
៤- គម្រោងពង្រឹងគុណភាព និងសមធម៌សុខាភិបាល (២០១៦-២០២២)។
៥- គម្រោងអាហារូបត្ថម្ភនៅកម្ពុជា (២០១៩-២០២៤)។
៦- គម្រោងឆ្លើយតបបន្ទាន់ជំងឺកូវីដ-១៩ (២០២០-២០២២)។
៧- គម្រោងពង្រឹងប្រព័ន្ធអប់រំមុនសេវាសម្រាប់វិជ្ជាជីវៈសុខាភិបាល (២០២០-២០២៦)។
៨- ការរៀបចំគម្រោងពង្រឹងគុណភាព និងសមធម៌សុខាភិបាល ដំណាក់កាលទី២ (២០២២-២០២៧)៕ រក្សាសិទ្ធិដោយ ៖ ពិសិដ្ឋ CEN
