រដ្ឋធានីណៃពិដោរ៖ ក្រោយពេលមានសេចក្ដីរាយការណ៍ ពីពួកយោធាមីយ៉ាន់ម៉ា នៅតែបន្ដចាប់អ្នកភូមិ នាំទៅសម្លាលប់ចោល រួមទាំងកុមារ ហើយអំពើដ៏ព្រៃផ្សៃនេះ ត្រូវសហរដ្ឋអាមេរិក និង អង្គការសហប្រជាជាតិ ថ្កោលទោសមេដឹកនាំរដ្ឋប្រហារយោធា ខណៈតុលាការឧក្រិដ្ឋកម្មអន្ដរជាតិ ហៅកាត់ «ICC» ចោទប្រកាន់ពីបទ ឧក្រិដ្ឋកម្មប្រឆាំងនឹងមនុស្សជាតិ។
ទីភ្នាក់ងារសារព័ត៌មាន AFP បានចេញផ្សាយ កាលពីថ្ងៃទី១០ ខែធ្នូ ឆ្នាំ២០២១ ថា ពួកមីយ៉ាន់ម៉ា បានចាប់ខ្លួនអ្នកភូមិ ចំនួន១១នាក់ នាំចេញពីតំបន់អសន្តិសុខមួយ នៅភាគកណ្តាល ប្រទេស យកទៅសម្លាប់ចោល។ អំពើព្រៃផ្សៃនេះ បានធ្វើឲ្យសហរដ្ឋអាមេរិក និង អង្គការសហប្រជាជាតិ ថ្កោលទោសយ៉ាងខ្លាំង។
ក្រសួងការបរទេសអាមេរិក និង អគ្គលេខាធិការអង្គការសហប្រជាជាតិ កាលពីថ្ងៃទី៩ ខែធ្នូ (វេលានៅសហរដ្ឋអាមេរិក) បានចេញសេចក្តីថ្លែងការណ៍ ថ្កោលទោសដល់រដ្ឋាភិបាលយោធាមីយ៉ាន់ម៉ា។ សេចក្ដីថ្លែងការណ៍នេះ បានកើតឡើង ក្រោយពេលប្រព័ន្ធផ្សព្វផ្សាយក្នុងស្រុក នៃប្រទេសមីយ៉ាន់ម៉ា រួមនឹងសាក្សីមួយចំនួន បានអះអាងថា ពួកយោធាមីយ៉ាន់ម៉ា បានចាប់ខ្លួនប្រជាពលរដ្ឋចំនួន១១នាក់ រស់នៅភូមិដុនថរ (Dontaw) ស្ថិតក្នុងតំបន់សាហ្គេង (Sagaing) នាំទៅសម្លាប់ ខណៈមានការវាយប្រហារដោយគ្រាប់មីន និងគ្រាប់បែកទៅលើក្បួនរថយន្តរបស់ពួកយោធា។
ដោយឡែកប្រព័ន្ធផ្សព្វផ្សាយរដ្ឋរបស់មីយ៉ាន់ម៉ា Global New Light of Myanmar កាលពីថ្ងៃទី១០ ខែធ្នូ បានផ្សាយថា សេចក្តីរាយការណ៍ព័ត៌មានទាំងនេះ ជាព័ត៌មានប្រឌិតសុទ្ធសាធ និងជាភស្តុតាង បង្ហាញឲ្យឃើញពីការគប់គិតគ្នា រវាងបណ្តាញក្នុងស្រុក និងពួកបរទេស។
ប្រទេសមីយ៉ាន់ម៉ា បានធ្លាក់ចូលទៅក្នុងវិបត្ដិយ៉ាងធ្ងន់ធ្ងរ ក្រោយពេលលោកឧត្ដមសេនីយ៍ Min Aung Hlaing ដឹកនាំកម្លាំងយោធា ធ្វើរដ្ឋប្រហារ រឹបអូសអំណាចពីរដ្ឋាភិបាលស៊ីវិល ដែលជាប់ឆ្នោត តាមលទ្ធិប្រជាធិបតេយ្យ និង ចាប់ឃុំខ្លួនលោកស្រី អ៊ោង សាន់ស៊ូជី ហើយមន្រ្ដីជាន់ខ្ពស់របស់លោកស្រី កាលពីថ្ងៃទី១ ខែកុម្ភៈ ឆ្នាំ២០២១។ អំពើរដ្ឋប្រហារនេះ បាននាំឲ្យមានការបះបោរឡើង ហើយពួកយោធាបានសម្លាប់ក្រុមអ្នកតវ៉ាជាង ១ ៣០០នាក់ និងចាប់ឃុំខ្លួនមនុស្សជាង ១០ ០០០នាក់។
រហូតមកដល់ពេលនេះ តុលាការឧក្រិដ្ឋកម្មអន្ដរជាតិ ហៅកាត់ «ICC » ក៏បានចោទប្រកាន់លោកឧត្ដមសេនីយ៍ Min Aung Hlaing មេដឹកនាំរដ្ឋប្រហារ ពីបទ «ឧក្រិដ្ឋកម្មប្រឆាំងមនុស្សជាតិ»ផងដែរ៕
