ភ្នំពេញ ៖ ឯកឧត្តម ប៉ាន សូរស័ក្ដិ រដ្ឋមន្ដ្រីក្រសួងពាណិជ្ជកម្ម បានថ្លែងថា កិច្ចព្រមព្រៀងពាណិជ្ជកម្មសេរី កម្ពុជា-ចិន និងកិច្ចព្រមព្រៀងភាពជាដៃគូសេដ្ឋកិច្ច គ្រប់ជ្រុងជ្រោយតំបន់ (RCEP) នឹងចូលជាធរមាននៅថ្ងៃទី១ ខែមករា ឆ្នាំ២០២២ នឹងក្លាយជាកម្លាំងចលករដ៏សំខាន់ ក្នុងការជំរុញកំណើនពាណិជ្ជកម្ម ទំនិញ សេវាកម្ម និងវិនិយោគ កាន់តែធំជាងមុន ជាពិសេសផ្តល់ទីផ្សារបន្ថែមលើមុខទំនិញថ្មី ចំនួនរាប់រយមុខបន្ថែមទៀត សម្រាប់ការនាំចេញពីកម្ពុជា ។
ការបញ្ជាក់យ៉ាងដូច្នេះ ធ្វើឡើងក្នុងពិធីបិទសន្និបាតបូកសរុបការងារពាណិជ្ជកម្ម ឆ្នាំ២០២១ និងលើកទិសដៅការងារពាណិជ្ជកម្ម ឆ្នាំ២០២២ របស់ក្រសួងពាណិជ្ជកម្ម ក្រោមអធិបតីភាព អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ តំណាងសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នាទីស្ដីការក្រសួង នៅថ្ងៃទី២៣ ខែធ្នូ ឆ្នាំ២០២១នេះ។
ឯកឧត្តម ប៉ាន សូរស័ក្ដិ បានបញ្ជាក់ថា កិច្ចព្រមព្រៀងពាណិជ្ជកម្មសេរីចំនួន២ គឺកិច្ចព្រមព្រៀងពាណិជ្ជកម្មសេរីទ្វេភាគី កម្ពុជា-ចិន និងកិច្ចព្រមព្រៀង ភាពជាដៃគូសេដ្ឋកិច្ច គ្រប់ជ្រុងជ្រោយតំបន់ (RCEP) ត្រូវបានទទួលការអនុម័តយល់ព្រម និងប្រកាសដាក់ឲ្យប្រើប្រាស់ ដោយព្រះរាជក្រម ចុះថ្ងៃទី៥ ខែតុលា ឆ្នាំ២០២១ និងចូលជាធរមាននៅថ្ងៃទី១ ខែមករា ឆ្នាំ២០២២។ កិច្ចព្រមព្រៀងទាំងនេះ នឹងក្លាយជាកម្លាំងចលករដ៏សំខាន់ ក្នុងការជំរុញកំណើនពាណិជ្ជកម្ម ទំនិញ សេវាកម្ម និងវិនិយោគ កាន់តែធំជាងមុន ជាពិសេសផ្តល់ទីផ្សារបន្ថែមលើមុខទំនិញថ្មី ចំនួនរាប់រយមុខបន្ថែមទៀត សម្រាប់ការនាំចេញពីកម្ពុជា បន្ថែមពីលើការផ្ទេរបច្ចេកវិទ្យា ចំណេះដឹង ចំណេះធ្វើ និងជំនាញថ្មីៗពីការវិនិយោគបរទេសផ្ទាល់ (FDI) និងការងារថ្មីៗជូនប្រជាពលរដ្ឋផងដែរ។
ក្នុងឆ្នាំ២០២១នេះ ទោះបីជាកម្ពុជា មានបញ្ហាប្រឈមនឹងជំងឺរាតត្បាតកូវីដ-១៩ ក៏ដោយ ក្រសួងពាណិជ្ជកម្ម បានខិតខំបំពេញការងារយ៉ាងសកម្ម ក្នុងការជំរុញកំណើនវិស័យពាណិជ្ជកម្មកម្ពុជា ទាំងក្នុងក្របខ័ណ្ឌទ្វេភាគី តំបន់ និងសកលលោក ដោយសម្រេចបាន នូវលទ្ធផលគួរជាទីមោទនៈ ជាពិសេសការចរចាបើកច្រកទីផ្សារសម្រាប់ទំនិញកម្ពុជា។
ក្រសួងពាណិជ្ជកម្ម នៅមានបេសកកម្មចរចា បង្កើតកិច្ចព្រមព្រៀងពាណិជ្ជកម្ម សេរីថ្មីៗបន្ថែមទៀត ជាមួយដៃគូពាណិជ្ជកម្មសំខាន់ៗមួយចំនួន មានជាអាទិ៍ ជាមួយសហភាពសេដ្ឋកិច្ចអឺរ៉ុប អាស៊ី ឥណ្ឌា រុស្ស៊ី ជប៉ុន ម៉ុងហ្គោលី ជាដើម។
ក្រុមការងារអន្តរក្រសួងរបស់ពាណិជ្ជកម្ម ជាពិសេសក្រសួងសេដ្ឋកិច្ច និងហិរញ្ញវត្ថុ នឹងបន្តចូលរួមយ៉ាងក្លៀវក្លា ជាមួយក្រសួងពាណិជ្ជកម្ម ក្នុងការធ្វើពិពិធកម្មទីផ្សារ ដើម្បីបង្កើនការនាំចេញ លើកកម្ពស់ជីវភាពប្រជាពលរដ្ឋ និងជំរុញកំណើនសេដ្ឋកិច្ចកម្ពុជា ឲ្យកាន់តែខ្លាំងក្លាបន្ថែមទៀត ស្របតាមយុទ្ធសាស្ត្រ ចតុកោណដំណាក់កាលទី៤ របស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជាមគ្គុទ្ទេសក៍ដឹកនាំដ៏ឆ្នើម។
ក្រសួងពាណិជ្ជកម្ម ក៏បានខិតខំចរចាផងដែរ ដើម្បីកម្ពុជាអាចចុះហត្ថលេខាលើអនុស្សរណៈយោគយល់គ្នាជាច្រើន ជាមួយប្រទេស ជាដៃគូមួយចំនួនដូចជា តួកគី បេឡារុស ហុងគ្រី ប្រទេស អារ៉ាប់រួមមីរ៉ាត់ គុយវែត ម៉ូរីស ជាដើម ដើម្បីជំរុញកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម វិនិយោគកសិកម្ម ទេសចរណ៍ ឧស្សាហកម្ម បច្ចេកវិទ្យា វិទ្យាសាស្ត្រ ជាដើម៕រក្សាសិទ្ធិដោយ ៖ សុទ្ធ លី
