ខេត្តត្បូងឃ្មុំ៖ ថ្លែងទៅកាន់អង្គពិធី និងឆ្លើយតបទៅនឹងកង្វល់របស់ប្រធានមន្ទីរសាធារណការ និងដឹកជញ្ជូនដែលបានអះអាងថាការបង្ក្រាបរថយន្តផ្ទុកទំនិញលើសទំងន់កម្រិតកំណត់មានលក្ខណៈដូចវែកចក លោកទេសរដ្ឋមន្ត្រី បានមានប្រសាសន៍ថា “ដើម្បីកុំឱ្យដូចវែកចក គឺយើងត្រូវយកចកចេញឱ្យអស់” ពោលគឺត្រូវប្រើយន្តការច្បាប់ និងរកប្រភពដើមឱ្យឃើញ និងបិទក្រុមហ៊ុនណាដែលមិនគោរពច្បាប់។
លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន កាលពីរសៀលថ្ងៃអង្គារ ទី២៤ ខែមេសា ឆ្នាំ២០១៨ នៅមន្ទីរសាធារណការ និងដឹកជញ្ជូនខេត្តត្បូងឃ្មុំ ក្នុងពិធីសំណេះសំណាលជាមួយមន្ត្រីរាជការ បុគ្គលិក និងកម្មករ នៃមន្ទីរសាធារណការ និងដឹកជញ្ជូន ខេត្តត្បូងឃ្មុំ។
លោកទេសរដ្ឋមន្ត្រី បានថ្លែងថា ការត្រួតពិនិត្យយានយន្តផ្ទុកទំនិញលើសទំងន់កម្រិតកំណត់ និងការកែច្នៃខុសលក្ខណៈបច្ចេកទេសយានយន្តត្រូវតែបន្តអនុវត្តឱ្យបានជាប្រចាំនិងម៉ឺងម៉ាត់បំផុត ព្រោះថាបើរថយន្តតែមួយគ្រឿងដឹកលើសទម្ងន់កម្រិតកំណត់ ២០តោនគឺស្មើនឹងរថយន្ត ១៦០.០០០គ្រឿងធ្វើចរាចរនៅលើផ្លូវនោះ ដែលធ្វើឱ្យផ្លូវឆាប់ទ្រុឌទ្រោម និងដូចខាត។ ករណីនេះធ្វើឱ្យខាតបង់ថវិកាជាតិរាប់រយលានដុល្លារសម្រាប់ជួសជុលផ្លូវឡើងវិញក្នុងមួយឆ្នាំៗ។
ឆ្លៀតក្នុងឱកាសសំណេះសំណាលនោះផងដែរ លោកទេសរដ្ឋមន្ត្រី បានជម្រាបជូនអង្គពិធី ពីកំណែទម្រង់ស៊ីជម្រៅ របស់ក្រសួងសាធារណការ និងដឹកជញ្ជូន ដើម្បីសម្រួលសេវាសាធារណៈដែលផ្ដោតលើចំណុចសំខាន់ៗបីគឺ ធ្វើឱ្យបានលឿន ធ្វើឱ្យមានតម្លាភាព និងចំណាយតិច ព្រមទាំងបង្ហាញពីសមិទ្ធផលនានាដែលសម្រេចបាននាដើមឆ្នាំ២០១៨ នេះ ជាពិសេស គម្រោងធំៗទាំង៤ដែលបានសម្ពោធឱ្យប្រើប្រាស់មុនបុណ្យចូលឆ្នាំថ្មីប្រពៃណីជាតិខ្មែរ មានដូចជា៖ ការតភ្ជាប់ផ្លូវដែកពីប៉ោយប៉ែតទៅសិរិសោភណ្ឌ ការដឹកជញ្ជូនអ្នកដំណើរតាមផ្លូវទឹកពីស្ពានព្រែកព្នៅទៅក្រុងតាខ្មៅ ការតភ្ជាប់ផ្លូវដែកពីស្ថានីយរថភ្លើងភ្នំពេញទៅអាកាសយាន្តដ្ឋានអន្តរជាតិភ្នំពេញ និងការដាក់ឱ្យប្រើប្រាស់ស្ពានអាកាសផ្សារដីហុយ។
លើសពីនេះទៅទៀតលោកទេសរដ្ឋមន្ត្រី បង្ហាញពីគម្រោងថ្មីៗ ដែលត្រូវអនុវត្តបន្ត រួមមាន៖ ការពង្រីផ្លូវជាតិលេខ៥ និងផ្លូវជាតិលេខ៣ ពី២គន្លងទៅ៤គន្លង ផ្លូវល្បឿនលឿនភ្នំពេញទៅខេត្តព្រះសីហនុ ការពង្រីកកំពង់ផែទឹកជ្រៅខេត្តព្រះសីហនុ ការពង្រីកការដឹកជញ្ជូនអ្នកដំណើរតាមផ្លូវទឹក ការសិក្សាគម្រោងសាងសង់ផ្លូវជាតិពីបាត់ដំបងទៅខេត្តកោះកុង និងគម្រោងផ្សេងៗទៀតជាច្រើន។
លោកទេសរដ្ឋមន្ត្រី បានបន្ថែមទៀតថា៖ សមិទ្ធផលដ៏ឧត្ដុងឧត្ដមទាំងនេះកើតចេញពីសុខសន្តិភាព និងស្ថេរភាពនយោបាយដ៏រឹងមាំ ក្រោមការដឹកនាំដ៏ឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
លោកទេសរដ្ឋមន្ត្រី ក៏បានផ្ដាំផ្ញើឱ្យមន្ត្រីទាំងអស់ រួបរួមសាមគ្គី សហការគ្នា ឱ្យបានរឹងមាំ ហើយសូមកុំឱ្យមានការបែងចែក ជាក្រុម ជាបក្ខពួក ពោលគឺមានតែក្រុមមួយគត់គឺ ក្រុមមហាគ្រួសារក្រសួងសាធារណការ និងដឹកជញ្ជូន ដើម្បីរួមគ្នាកសាងជាតិមាតុភូមិរបស់យើង ឱ្យមានការរីកចម្រើនតាមក្ដីស្រម៉ៃរបស់យើងម្នាក់ៗ ដែលចង់ឃើញប្រទេសកម្ពុជារីកចម្រើនដូចប្រទេសអភិវឌ្ឍន៍ក្នុងសកលលោក៕ ដោយ៖បញ្ញាស័ក្តិ
