សៀមរាប ៖ ការិយាល័យប្រឆាំងការជួញដូរមនុស្ស និងការពារអនីតិជន បានធ្វើការរាយការណ៍ជូនទៅ ឯកឧត្តមព្រះរាជាអាជ្ញា ដោយបានអនុញ្ញាតឱ្យនាំជនសង្ស័យ និងរថយន្តមកការិយាល័យជំនាញដើម្បីសាកសួរ និងបានធ្វើការឃាត់ខ្លួន ឈ្មោះ វាន វិក ភេទ អាយុ៣៨ឆ្នាំ កសាងសំណុំរឿងបញ្ជូនទៅតុលាការ ពីបទការនាំយកចេញដោយមិនស្របច្បាប់ដោយមានគោលដៅ និងករណីដឹកជញ្ជូនដោយមានគោលដៅ (ចេញទៅប្រទេសថៃ) នៅភូមិ គោកស្នួល ឃុំគោកដូង ស្រុកអង្គរជុំ ខេត្តសៀមរាប កាលពីដើមខែមិថុនា ឆ្នាំ២០២១។
ដោយមានការបញ្ជារផ្ទាល់ពី ឯកឧត្តម ទៀ សីហាអភិបាល នៃគណៈអភិបាលខេត្ត និងជាប្រធានគណៈកម្មាធិការខេត្តប្រយុទ្ធប្រឆាំងអំពើជួញដូរមនុស្ស បានធ្វើការណែនាំនិងចង្អុលបង្ហាញដល់លេខាធិការដ្ឋានប្រយុទ្ធប្រឆាំងការជួញដូរមនុស្សខេត្ត និងអ្នកពាក់ព័ន្ធទាំងអស់ក្នុងខេត្ត ត្រូវបង្កើនការគ្រប់គ្រង ការស្រាវជ្រាវ និង ការបង្ក្រាបបទល្មើសនៃការនាំចេញនាំចូលប្រជាពលរដ្ឋដោយខុសច្បាប់ ។
លោកស្រី យូ សុភា អភិបាលរងខេត្ត និងជាអនុប្រធានអចិនន្ត្រៃយ៍ នៃគណៈកម្មាធិការខេត្តប្រយុទ្ធប្រឆាំងជួញដូរមនុស្ស បានមានប្រសាសន៍ថា អនុវត្តទៅតាមបទបញ្ជា និងអនុសាសន៍ណែនាំដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ស្ដីពីការររឹតបន្តឹងនៅតាមច្រកព្រំដែន ដូចជាការនាំចេញនាំចូលពលករទៅក្រៅប្រទេសដោយខុសច្បាប់ ក្នុងដំណាក់កាលដែលប្រទេសជាប់ព្រំដែនមានការបិទខ្ទប់ ដោយសារការឆ្លងរាលដាលជាសកលនៃជំងឺកូវីដ-១៩ ក៏មានការណែរនាំចង្អុលបង្ហាញពីលោកឧត្តមសេនីយ៍ត្រី តេង ចន្ទ័ណាត ស្នងការនគរបាលខេត្ត លោកស្រីឧត្តមសេនីយ៍ត្រី ដួង ថាវរី ស្នងការរង ទទួលផែនការងារប្រឆាំងការជួញដូរមនុស្ស និងការពារអនីតិជន និងការងារយេនឌ័រ និងលោកវរសេនីយ៍ឯក ជា ហេង នាយការិយាល័យប្រឆាំងការជួញដូរមនុស្ស និងការពារអនីតិជនផង ។
ជាក់ស្តែង កាលពីថ្ងៃទី៣០ ខែធ្នូ ឆ្នាំ២០២១ សមត្ថកិច្ចនគរបាលចរាចរណ៍ស្រុកអង្គរជុំ បានធ្វើការអនុវត្តច្បាប់ត្រួតពិនិត្យគោលដៅ ហើយបានផាកពិន័យរថយន្តរបស់ជនសង្ស័យ ដោយបានពិនិត្យឃើញផ្លាកលេខរថយន្តនិងឈ្មោះ វាន វិក ជាមុខសញ្ញាជួញដូរមនុស្ស ក៏បានរាយការណ៍ទៅការិយាល័យប្រឆាំងការជួញដូរមនុស្ស និងការពារអនីតិជន ហើយការិយាល័យជំនាញបានធ្វើការរាយការណ៍បន្តជូនទៅ ឯកឧត្តមព្រះរាជាអាជ្ញា ដោយបានអនុញ្ញាតឱ្យនាំជនសង្ស័យ និងរថយន្តមកការិយាល័យជំនាញដើម្បីសាកសួរ និងបានធ្វើការឃាត់ខ្លួន ឈ្មោះ វាន វិក ភេទ អាយុ៣៨ឆ្នាំ កសាងសំណុំរឿងបញ្ជូនទៅតុលាការ ពីបទការនាំយកចេញដោយមិនស្របច្បាប់ដោយមានគោលដៅ និងករណីដឹកជញ្ជូនដោយមានគោលដៅ (ចេញទៅប្រទេសថៃ) នៅភូមិ គោកស្នួល ឃុំគោកដូង ស្រុកអង្គរជុំ ខេត្តសៀមរាប កាលពីដើមខែមិថុនា ឆ្នាំ២០២១ ។ ការនាំខ្លួនមកសាកសួរនេះ ធ្វើឡើងតាមការបញ្ជារ និងសម្របសម្រួល ពីឯកឧត្តមព្រះរាជអាជ្ញានៃអយ្យការអមសាលាដំបូងខេត្តសៀមរាប។
សមត្ថកិច្ចបានបន្តឱ្យដឹងទៀតថា កាលពីដើមខែមិថុនា ឆ្នាំ២០២១ សមត្ថកិច្ចប្រចាំការនៅច្រកចំការដូង (ព្រំដែនកម្ពុជា-ថៃ) ខេត្តបន្ទាយមានជ័យ បានស្ទាក់ឃាត់ខ្លួនដំណើរពលករចំនួន ១២នាក់ ស្រី ០៦នាក់ ដែលត្រូវបានមេខ្យល់ដឹកជញ្ជូនយកចេញពីភូមិ គោកស្នួល ឃុំគោកដូង ស្រុកអង្គរជុំ ខេត្តសៀមរាប បំណងលួចឆ្លងដែនតាមច្រករបៀងច្បាប់ទៅប្រទេសថៃ ប៉ុន្តែពេលកំពុងធ្វើសកម្មភាពត្រូវបានសមត្ថកិច្ចប្រចាំការនៅទីនោះ ធ្វើការឃាត់ដំណើរបានទាន់ពេល រួចបញ្ជូនពួកគាត់ត្រឡប់មកធ្វើចត្តាឡីស័ក នៅវិទ្យាល័យសម្តេចឪ ក្នុងក្រុង-ខេត្តសៀមរាបវិញ។
ក្នុងចំណោមពលករទាំង១២នាក់ ដែលបានឃាត់ដំណើរបញ្ជូនមកវិញនេះ មានតែពលករចំនួន ០៥នាក់ទេ ដែលឈ្មោះ វាន វិក បានដឹកជញ្ជូនដើម្បីឆ្លងដែនដោយខុសច្បាប់ចូលទៅធ្វើការក្នុងទឹកដីប្រទេសថៃ កាលពីថ្ងៃទី០៣ ខែមិថុនា ឆ្នាំ២០២១ ដោយក្នុងពលករម្នាក់ត្រូវយកថ្លៃដឹកជញ្ជូន ចំនួន ៦,០០០បាត ពេលទៅដល់គោលដៅ ដោយធ្វើការទូរទាត់ពីថៅកែថៃ ហើយពលករត្រូវការធ្វើការកាត់សងថៅកែតាមក្រោយ ។
ជនសង្ស័យខាងលើនេះ ប្រកបមុខរបរបើកឡានតាក់ស៊ីនេះចាប់ពីឆ្នាំ២០១៧ ដែលមានគោលដៅដឹកអ្នកដំណើរពីស្រុកអង្គរជុំខេត្តសៀមរាប ទៅស្វាយ សំឡូត និងតាមផ្លូវបន្ទាត់ព្រំដែនខ្មែរ-ថៃ ដោយប្រើប្រាស់រថយន្តសាំយ៉ុងពណ៌សរ១៥កៅអី ពាក់ផ្លាកលេខ ភ្នំពេញ 2U-5236 ជាកម្មសិទ្ធិផ្ទាល់ខ្លួនរបស់ឈ្មោះ វាន វិក ។
ផ្អែកតាមការបំភ្លឺរបស់ពលករទាំង០៦នាក់ និងផ្អែកតាមការស្តាប់ចម្លើយសារភាព របស់ជនសង្ស័យជាមេខ្យល់ ព្រមទាំងផ្អែកតាមការពិនិត្យលើស្ថានភាពជាក់ស្តែងក្នុងកាឃាត់ដំណើរពលករ ពេលកំពុងធ្វើដំណើររៀបឆ្លងដែន និងការមិនគោរពទៅតាមកិច្ចសន្យា របស់មេខ្យល់ក្នុងការឈប់ប្រព្រឹត្តសកម្មភាព នាំយកពលកចេញដោយខុសច្បាប់ និងការមិនចូលខ្លួនតាមដីកា របស់អយ្យការអមសាលាដំបូងខេត្ត កាលពីខែមិថុនាឆ្នាំ២០២១ និងផ្អែកតាមច្បាប់ ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ ។
ជនសង្ស័យខាងលើ ត្រូវបានសមត្ថកិច្ច ការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្ត បានកសាងសំណុំរឿងបញ្ជូនទៅតុលាការ ដើម្បីចាត់ការទៅតាមនីតិវិធីច្បាប់ ៕រក្សាសិទ្ធិដោយ ៖ សុទ្ធ លី