កាលពីម្សិលមិញ ថ្ងៃទី៣ ខែមករា ឆ្នាំ២០២២ ជឿថាប្រិយមិត្តអ្នកលេងបណ្តាញសង្គមជាច្រើន បានផ្ទុះការភ្ញាក់ផ្អើលរួចហើយ ដែលស្ងាត់ៗ ស្រាប់តែលោក យិន ហេង ហៅ ចំប៉ីខ្មៅ បានបង្ហោះយ៉ាងចំហរប្តឹងមហាទើសលោក ម៉ៃ សុគន្ធ ពីបទប្រមាថមើលងាយមកលើខ្លួនផ្សេងៗ ប្រព្រឹត្តនៅលើបណ្តាញសង្គមហ្វេសប៊ុក និង TikTok ដោយភ្ជាប់ទាំងដីកាកោះហៅឲ្យចូលទៅបំភ្លឺនៅតុលាការនៅថ្ងៃទី៤ ខែមករា នេះថែមទៀតផង។
តែទោះជាយ៉ាងណា ក្រោយឃើញ ចំប៉ីខ្មៅ បង្ហោះប្តឹងខ្លួនបែបនេះ ភ្លាមៗនោះ លោក ម៉ៃ សុគន្ធ ក៏បានឆ្លើយតបគ្មានព្រឺរោមទៅវិញបែបនេះថា៖ «ពូត្រៀមរួចរាល់ហើយ ថា ក្មួយចង់បានអី ចង់ល្បីចាំពូអោយល្បី សុំសួរមួយបងប្អូនដែលរៀនច្បាប់ តើការផុស ដីកាកោះ (ដើមបណ្តឹងរឺចុងបណ្តឹង)ជាសាធារណៈ មានទោសអីដែរ ?»។
ដោយឡែក ចំប៉ីខ្មៅ វិញ នៅពេលឃើញមហាទើស ម៉ៃ សុគន្ធ ឆ្លើយទៅវិញផាំងៗ ក៏បានលុបរូបផុសប្តឹងចេញវិញ (រក្សាតែសំណេរ) តែក៏នៅបានឌឺដងដាក់មហាទើស ថាខ្លួនល្បីស្រាប់ហើយ មិនចង់ឲ្យអ្នកណាធ្វើឲ្យល្បីទេ ដោយអួតបង្ហាញគណនី TikTok របស់ខ្លួនដែលមិនដែលសូវលេងទាំងប៉ុន្មាន គ្រាន់អ្នក Follow និង Liked កប់ៗឯណោះ និងព្រមទាំងបញ្ជាក់ពីលើបន្ថែមថា៖ «ត្រួសៗ ព្រោះខ្ញុំខ្លាចល្បីណាស់ ភ័យណាស់ពេលគេនិយាយថា (ចាំធ្វើឱ្យខ្ញុំល្បី) ភ័យពេកដេកអត់លក់ទេ នេះគ្រាន់តែខ្ញុំមិនសូវចាប់អារម្មណ៍លេងវារល់ថ្ងៃដូចអ្នកផង បើខ្ញុំធ្វើវារាល់ថ្ងៃវិញ អ្នកតាមមិនទាន់ទេ»៕ រក្សាសិទ្ធិដោយ៖ លឹម ហុង
