កាលពីថ្ងៃទី២៤ ខែមេសា បុរសម្នាក់ត្រូវបានគេប្រទះឃើញបើកម៉ូតូ ស្ថិតនៅតាមបណ្តោយផ្លូវមួយកន្លែង ក្នុងទីក្រុង Yunnan ខេត្ត Guangdong ប្រទេសចិន ស្ថិតក្នុងទិដ្ឋភាពដ៏គួរឲ្យរន្ធត់ចិត្តមួយពីអ្នកដំណើរ ខណៈពួកគេបានឃើញក្មេងស្រីម្នាក់ត្រូវបានចងភ្ជាប់នឹងម៉ូតូរបស់បុរសនោះ ។
អ្នកបានថតវីដេអូពីហេតុការណ៍នេះ បាននិយាយថា គាត់ពិតជាមានការស្លុតរន្ធត់យ៉ាងខ្លាំង នៅពេលបានឃើញក្មេងស្រីម្នាក់ ត្រូវបានចងភ្ជាប់នឹងកន្ទុយម៉ូតូបុរសម្នាក់ ។ គាត់បន្តថា បើទោះបីជាក្មេងស្រីនោះបានស្រែកយំយ៉ាងណា ក៏បុរសរូបនោះ ពុំយកចិត្តខ្វល់ខ្វាយ និងឈប់ម៉ូតូនោះទេ ។
ប៉ុន្តែ បន្ទាប់ពីការស៊ើបអង្កេត គេបានដឹងថា អ្នកទាំងពីរគឺជាឪពុក និងកូនស្រីនឹងគ្នាប៉ុណ្ណោះ ។ ហើយមូលហេតុដែលនាំឲ្យឪពុករូបនោះ សម្រេចធ្វើបាបកូនស្រីខ្លួនតាមវិធីបែបនេះ គឺដោយសារតែរូបគាត់ខឹងនាងពុំទៅសាលារៀន ។
ករណីនេះបន្ទាប់មកបានលេចឮដល់ប៉ូលីស ហើយពួកគេក៏បានធ្វើការព្រមានដល់បុរសជាឪពុករូបនេះផងដែរ ឲ្យឈប់ប្រព្រឹត្តទង្វើមិនល្អបែបនេះតទៅទៀត ។
ទន្ទឹមនេះផងដែរ អ្នកលេងអ៊ីនធើរណេតជាច្រើនដែលមិនសប្បាយចិត្តនឹងទង្វើរបស់ឪពុកនេះ បានខមិនលើកឡើងដោយអ្នកខ្លះថា ក្មេងស្រីនេះនឹងអាចប្រឈមនឹងគ្រោះថ្នាក់ជាយថាហេតុណាមួយ ។ ប៉ុន្តែ អ្នកខ្លះថា ទទួលស្គាល់ថា វាជាកិច្ចរបស់គ្រួសារមួយ ដែលអ្នកខាងក្រៅ ពុំត្រូវចេះដឹងរឿងគេឡើយ ។
ទោះយ៉ាងណា អ្នកលេងអ៊ីនធើរណេតភាគច្រើន បានចាត់ទុកថា នេះជាអំពើហិង្សាក្នុងគ្រួសារពុំអាចទទួលយកបាន ។ ហេតុនេះ បុរសជាឪពុកគួរតែជ្រើសរើសវិធីផ្សេងដ៏ល្អ ដើម្បីនិយាយប្រដែប្រដៅកូនឲ្យសមហេតុផល និងត្រូវរកពីមូលហេតុដែលកូនរបស់គាត់ពុំចង់ទៅសាលារៀនយ៉ាងនេះ ៕ ចន្ទី
