ប្រភពព័ត៌មានពីទីភ្នាក់ងារ Yonhap របស់កូរ៉េខាងត្បូង នៅថ្ងៃទី ២៦ ខែមេសា ដែលដកស្រង់សម្តីរបស់នាយកការិយាល័យវិមានប្រធានាធិបតី Im Jong Seok ឲ្យដឹងថា ប្រតិភូជាន់ខ្ពស់ ដែលអមដំណើរមេដឹកនាំគីម ជុងអ៊ុន រួមមានមន្ត្រីជាន់ខ្ពស់ក្នុងបក្ស មន្ត្រីរដ្ឋាភិបាល និងកងទ័ពកូរ៉េខាងជើង។
ក្នុងនោះផងដែរ ក៏មានប្រធានសភា Kim Yong Nam និងប្អូនស្រីបង្កើត លោកគីមជុងអ៊ុន នាង Kim Yo Jong ។
អ្នកស្រី Kim Yo Jong និងលោក Kim Yong Nam នឹងអមដំណើរលោក គីម ជុងអ៊ុន ចូលរួមសន្និសីទកំពូលថ្ងៃនេះ (២៧ មេសា) ។
ក្រៅពីនោះក៏នៅមានអនុប្រធានបក្សពលករកូរ៉េ Kim Yong Chol អនុប្រធានបក្សទទួលបន្ទុកការងារកីឡា លោក Choe Hwi និងលោក Ri Su Yong អនុប្រធានទទួលបន្ទុកការងារអន្តរជាតិ ។ រីឯផ្នែកកងទ័ពវិញរួមមាន ៖ លោក Ri Myong Su នាយអគ្គសេនាកងទ័ពកូរ៉េ លោក Pak Yong Sik មេបញ្ជាការកងប្រដាប់អាវុធកូរ៉េ ។ រដ្ឋមន្ត្រីការបរទេស Ri Yong Ho និងប្រធានគណៈកម្មាធិការឯកភាព និងសន្តិភាព Ri Son Gwon ក៏មានវត្តមានផងដែរ ។
ឥស្សរជនជាន់ខ្ពស់កូរ៉េខាងជើង ដែលចូលរួមសន្និសីទកំពូលអន្តរកូរ៉េ ។
តាមទីភ្នាក់សារព័ត៌មានដដែល កូរ៉េខាងជើងកម្រនាំយកឥស្សរជនកំពូលក្នុងកងទ័ព និងអ្នកការទូត រួមគ្នាចូលរួមក្នុងសន្និសីទកំពូល។ ជាក់ស្តែងមុននេះ ក្នុងសន្និសីទកាលពីឆ្នាំ ២០០០ និង ២០០៧ ឥស្សរជនខាងលើពុំត្រូវបានឲ្យចូលរួមទេ ។
តាមរយៈសមាសភាពឥស្សរជនដែលចូលរួមជំនួបកំពូលដូចខាងលើបញ្ជាក់ថា កូរ៉េខាងជើងបានថ្លឹងថ្លែងសមាសភាពមិនមែនត្រឹមសម្រាប់ជំនួបជាមួយកូរ៉េខាងត្បូងប៉ុណ្ណោះទេ គឺថែមទាំងគិតដល់ជំនួបកំពូលអាមេរិក-កូរ៉េខាងជើង ដែលនឹងប្រព្រឹត្តទៅបន្ទាប់មក ។
គេនៅពុំទាន់ដឹងថា តើអ្នកស្រី Ri Sol Ju ដែលបច្ចុប្បន្ន ត្រូវបានលើកតម្កើងថាជាជំទាវទីមួយនោះ មានអមដំណើរស្វាមីដែរឬទេ?
