វិធីសាស្រ្តបោកប្រាស់ គឺមានច្រើនប្រភេទ ដែលជនដើរបោកប្រាស់គេ តែងតែធ្វើឡើងជារឿយៗ ជាពិសេសការបោកប្រាស់តាមរយៈការលក់ដូរនៅលើអនឡាញតែម្តង។
ដោយឡែក វិធីបោកមួយក្បាច់ថ្មីនេះ តាមរយៈធ្វើជាប្រម៉ូតលក់ទូរស័ព្ទតម្លៃថោកៗ ដោយគ្រាន់តែសូមជួយ Like និង Share ឲ្យបានច្រើនប៉ុណ្ណោះ ដោយមិនដឹងថា បានបោកប្រាស់លុយជនរងគ្រោះអស់ប៉ុន្មាននាក់នោះទេ។
ជាក់ស្តែង បុរសម្នាក់ជាម្ចាស់ហាងទូរស័ព្ទមានសាខាច្រើនកន្លែង ដែលជាជនរងគ្រោះព្រោះចាញ់បោកល្បិចខាងលើទើបតែលើកទី១ក្នុងជីវិតបានសម្រេចចិត្តចេញវីដេអូ ចែករំលែកបទពិសោធន៍មួយនេះ ដើម្បីកុំឲ្យបងប្អូនដទៃបន្តចាញ់បោកដូចគាត់ទៀត ដោយគាត់បានរៀបរាប់ឲ្យដឹងថា ដំបូងឡើយ ផេកមួយហ្នឹង គេ Live ប្រម៉ូតលក់ទូរស័ព្ទតម្លៃ១គ្រឿងៗ 10$ 20$ ដោយគ្រាន់តែសូមចិត្តជួយ Like ជួយ Share ប៉ុណ្ណោះ ហើយដោយឃើញថោកៗបែបនេះ គាត់ក៏សម្រេចចិត្តទិញអស់ជាង ៣០ ម៉ឺនរៀល។
តែទោះជាយ៉ាងណា ក្រោយវេលុយឲ្យរួច ស្រាប់តែផេកនោះ បានប្លុកអាខោនគាត់តែម្តង។ ហើយនៅពេលគាត់ឲ្យកូនចៅគាត់ផ្សេងៗ ឆាតទៅសួរនាំ ម្តងប្រាប់ថានៅកំពង់ឆ្នាំង បន្ទាប់មកទៀតថានៅបាត់ដំបង និងចុងក្រោយថានៅភ្នំពេញ… ចប់។
បុរសខាងលើ ក៏បានបញ្ជាក់ថា អាអ្នកបោកហ្នឹង វាបង្កើតផេកថ្មី «សូមជួយ Like ជួយស៊ែរ ឲ្យលឿនឡើងៗ ប្រម៉ូតលក់ទូរស័ព្ទតម្លៃថោកៗ» ប៉ុន្តែបន្ទាប់ពីបោកបានលុយហើយ នៅពេលយើងគ្រប់គ្នារករឿងតាមដាន ពួកវាក៏លុបផេកចោល ដោយលក់បន្តទៅឲ្យអ្នករកស៊ីតាមអនឡាញតែម្តង។ នេះជាល្បិចបោកសម័យថ្មី ទើបចេញដើមឆ្នាំ២០២២ ដែលបងប្អូនទាំងអស់គ្នាត្រូវគិតពិចារណាឲ្យបានខ្ពស់ មុនសម្រេចចិត្តទិញរបស់ទំនិញតាមអនឡាញ ដែលមានតម្លៃថោកៗដ៏មិននឹកស្មាន ជាក់ស្តែងដូចជាទូរស័ព្ទជាដើម។
ជាមួយគ្នានេះផងដែរ មហាជនជាច្រើនក្រោយពីបានលឺសូរបែបនេះ ក៏បានសម្តែងការហួសចិត្ត និងស្តីបន្ទោសឲ្យបុរសរូបនេះថា «របស់ចឹងៗ មានណាគេលក់ថោកៗទេប្រូ ល្ងង់តែខ្លួនឯងចង់បានពេក, យើងឆោតខ្លួនយើងទេកុំបន្ទោសគេ របស់ដល់ដៃសិនចាំអោយលុយគេ you យល់!។ រីឯអ្នកខ្លះទៀតក៏បានប្រាប់ថា ខ្លួនក៏ចាញ់បោកគេដែរ គឺចាញ់បោកពួកអាលក់នាឡិកា វេលុយអោយហើយមិនផ្ញើរបស់អោយ ថោកទាបមែន,…៕ រក្សាសិទ្ធិដោយ៖ លឹមហុង
