បន្ទាប់ពីពិធីការមានលក្ខណៈជានិមិត្តរូបនៅបន្ទាត់ព្រំដែនបែងចែកកូរ៉េទាំងពីរនាវេលាម៉ោង ១០និង៣០នាទី (ម៉ោងនៅកូរ៉េខាងត្បូង) គឺប្រមាណម៉ោង ៨និង៣០នាទី ម៉ោងនៅកម្ពុជា ថ្ងៃទី ២៧ ខែមេសា ប្រធានាធិបតីកូរ៉េខាងត្បូង Moon និងមេដឹកនាំកូរ៉េខាងជើង Kim បានចាប់ផ្តើមកិច្ចចរចាផ្លូវការជាប្រវត្តិសាស្ត្រ ។
ថ្លែងក្នុងជំនួបនេះ លោកមូន អះអាងថា ដំណើរទស្សនកិច្ចកូរ៉េខាងត្បូង របស់លោក Kim បានធ្វើឲ្យភូមិផ្អាកសង្គ្រាម Panmunjom ប្រែក្លាយជានិមិត្តរូបមួយនៃសន្តិភាព ពុំមែនជាការបែកបាក់ឡើយ ជាការឆ្លើយតបមេដឹកនាំកូរ៉េខាងជើង បានសម្តែងក្តីសង្ឃឹមចំពោះកិច្ចចរចាស្មោះត្រង់ជាមួយលោក Moon និងទទួលបានលទ្ធផលល្អ សំដៅដោះស្រាយបណ្តាបញ្ហាបច្ចុប្បន្ននៅឧបទ្វីបកូរ៉េ ។
ក្នុងជំនួបនេះ ភាគីទាំងសងខាងដំណើរការតាមរបៀបវារៈនៃកម្មវិធី គឺនឹងពិភាក្សាបណ្តាបញ្ហាដ៏សំខាន់ៗ ដូចជាការរំសាយនុយក្លេអ៊ែរនៅឧបទ្វីបកូរ៉េ ការធានាសន្តិសុខដល់កូរ៉េខាងជើង និងការលុបចោលបណ្តាបទបញ្ជាដាក់ទណ្ឌកម្មនៅពេលកូរ៉េខាងជើងអនុវត្តបញ្ហាទាំងនេះ ។ ក្រៅពីនោះ បញ្ហាកែសម្រួលទំនាក់ទំនងទ្វេភាគី កាត់បន្ថយភាពតានតឹងនៅតំបន់ព្រំដែន បញ្ហាក្រុមគ្រួសារដែលត្រូវព្រាត់ប្រាស់ កិច្ចជំរុញបណ្តាគម្រោងសហប្រតិបត្តិការ ការទូតប្រជាជន និងបណ្តាបញ្ហាផ្សេងៗដទៃទៀតក៏នឹងត្រូវបានលើកយកមកពិភាគ្សា។
នៅពេលបញ្ចប់ជំនួបនេះ តាមកម្រោងភាគីទាំងសងខាងនឹងចេញសេចក្តីថ្លែងការណ៍រួម ។ ភាគីទាំងពីរក៏នឹងពិសារអាហារពេលយប់ជាមួយគ្នា។។
នេះជាជំនួបកំពូលអន្តរកូរ៉េលើកទី ៣ គិតចាប់ពេលបញ្ចប់សង្គ្រាមកូរ៉េនៅឆ្នាំ ១៩៥៣ ហើយក៏ជាជំនួបដំបូងរវាងមេដឹកនាំកូរ៉េទាំងពីរក្នុងអំឡុង១ទសវត្សរ៍កន្លងមក៕ សូយន