ភ្នំពេញ ៖ តុលាការកំពូលកាលពីថ្ងៃទី ១៧ ខែ មករា ឆ្នាំ ២០២២ នេះ បានបើកសវនាការជំនុំជម្រះ លើបណ្តឹងសាទុក្ខ របស់អតីតផ្កាយ២ អ៊ុង ចាន់ធួក និង គូកនចំនួន២នាក់ទៀត ជាប់ពាក់ព័ន្ធនឹងការ រារាំងដល់ការអនុវត្តវិធានការសុខាភិបាល និងវិធានការរដ្ឋបាល ការពារការរាតក្បាតជម្ងឺកូវីដ១៩ ប្រព្រឹត្តនៅចំណុច នៅក្នុងភូមិដំណាក់ធំ ២ សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ នៅក្នុងអំឡុងចូលឆ្នាំខ្មែរថ្មី ២០២១ ។
លោក ឃឹម ប៉ុណ្ណ ជាប្រធានចៅក្រមជំនុំជម្រះ បានឲ្យដឹងថា ជនជាប់ចោទ៣នាក់ ខាងលើរូបនេះ មាន ឈ្មោះ ទី១៖ ឈ្មោះ អ៊ុង ចាន់ធួក ភេទប្រុស អាយុ៤៥ឆ្នាំ មាន ឋានៈ អនុប្រធានសេនាធិការនៃអគ្គស្នងដ្ឋានការនគរបាលជាតិ ឋានន្តរស័ក្តិឧត្តមសេនីយ៍ទោ ។ ទី២៖ ឈ្មោះ ឡាយ ភារុណ ភេទ ប្រុស អាយុ២៨ឆ្នាំ មុខរបរបម្រើការងារនៅផ្ទះឈ្មោះ អ៊ុង ចាន់ធួក។ និងទី៣៖ ឈ្មោះ កុក ឃី ភេទប្រុស អាយុ៣៥ឆ្នាំ មុខរបរបម្រើការងារនៅផ្ទះ អ៊ុង ចាន់ធួក។
នៅក្នុងសំណរឿងក្តីនេះ សាលាដំបូងខេត្តរាជធានីភ្នំពេញ កាលពីថ្ងៃទី២៩ ខែ មករាឆ្នាំ ២០២១ បានកាត់ទោស ជនជាប់ចោទ ឈ្មោះ អ៊ុង ចាន់ធួក ដាក់ពន្ធនាគារ កំណត់ ១ ឆ្នាំ កន្លះ និងពិន័យ ៥ លានរៀល ។
ចំណែកឯ ជនជាប់ចោទ ឈ្មោះឡាយ ភារុណ និង ឈ្មោះ កុក ឃី ត្រូវបានតុលាការ ផ្តន្ទាទោស ដាក់គុកក្នុងម្នាក់ៗ កំណត់ម្នាក់ ១ ឆ្នាំ ពិន័យ ៥ លានរៀល សម្រាប់ចូលថវិការដ្ឋ ។
ពួកគេទាំង៣នាក់ ត្រូវជាប់ចោទពីបទ រារាំងដល់ការអនុវត្តវិធានការសុខាភិបាល និង វិធានការរដ្ឋបាល តាមមាត្រា ៤ និង១១នៃ ច្បាប់កូវីត.១៩ ។
ពួកគេទាំង៣នាក់ ត្រូវបានចាប់ឃាត់ខ្លួន កាលពី ថ្ងៃទី ១៦ ខែមេសា ឆ្នាំ ២០២១ នៅក្នុងភូមិដំណាក់ធំ២ សង្កាត់ស្ទឹងមានជ័យ ៣ ខណ្ឌមានជ័យ រាជធានីភ្នំពេញ ។
តុលាការកំពូលនឹងប្រកាសដីកា លើសំណុំរឿងក្តីនេះ នៅព្រឹកថ្ងៃទី២៤ ខែ មករា ឆ្នាំ២០២២ ខាងមុខនេះ ៕ រក្សាសិទ្ធិដោយ ៖ ចន្ទា ភា