រាជធានីភ្នំពេញ ៖ លោក ប៊ុន ធី ចៅក្រមជំនុំជម្រះសាលាដំបូងរាជធានីភ្នំពេញ សម្រេចប្រកាសសាលដោយផ្តន្ទាទោសទៅលើ
នគរបាលជាតិម្នាក់ ដាក់ពន្ធនាគារ១ឆ្នាំ ដោយសារដកកាំភ្លើងបាញ់មេឃ៤គ្រាប់ព្រោះខឹងប្រពន្ធមិនចេញពីក្លឹបកាលពីថ្ងៃទី២៧ មេសា ២០១៨នេះ ។
ចៅក្រមជំនុំជម្រះសាលាដំបូងរាជធានីភ្នំពេញ បានបញ្ជាក់ថា ជនត្រូវចោទឈ្មោះ ឡេង ធារ៉ា ភេទប្រុស អាយុ២៧ឆ្នាំ មុខរបរនគរបាលជាតិ ដាក់ពន្ធនាគារ១ឆ្នាំ តែតម្រូវឲ្យអនុវត្តន៍ក្នុងពន្ធនាគារ ៦ខែ១៥ថ្ងៃ ទោសសល់ប៉ុន្មានព្យួរទាំងអស់។ កាលពីល្ងាចថ្ងៃទី២៧ ខែមីនា ឆ្នាំ២០១៨ ចៅក្រមជំនុំជម្រះ នៃសាលាដំបូងរាជធានីភ្នំពេញលោក ប៊ុន ធី និងតំណាងអយ្យការលោក ងិន ពេជ្រ បានបើកសវនាការលើសំណុំរឿងបុរសម្នាក់ ដកកាំភ្លើងបាញ់មេឃចំនួន៤គ្រាប់។
ឈ្មោះ ឡេង ធារ៉ា ភេទប្រុស អាយុ២៧ឆ្នាំ ជានគរបាលជាតិ ស្នាក់នៅសង្កាត់ទឹកល្អក់៣ ខណ្ឌទួលគោក រាជធានីភ្នំពេញ ជាប់ចោទពីបទ កាន់កាប់ ឬដឹកជញ្ជូនអាវុធដោយគ្មានការអនុញ្ញាត ប្រព្រឹត្ដកាលពីថ្ងៃទី២៤ ខែតុលា ឆ្នាំ២០១៧ នៅចំណុចមុខសណ្ឋាគារហូលីដេ ក្នុងសង្កាត់ស្រះចក ខណ្ឌដូនពេញ តាមមាត្រា៤៩០ នៃក្រមព្រហ្មទណ្ឌ។ គួររំលឹកថា កាលពីវេលាទៀបភ្លឺថ្ងៃទី២៤ ខែតុលា ឆ្នាំ២០១៧ ជនជាប់ចោទខាងលើ បានបើករថយន្តម៉ាកឡិចស៊ីស LS450 ពណ៌ខ្មៅ ដល់ចំណុចផ្លូវលេខ៧៥ កែងផ្លូវលេខ៨៤ ទល់មុខសណ្ឋាគារ ហូលីដេ ស្ថិតក្នុងសង្កាត់ស្រះចក ខណ្ឌដូនពេញ រាជធានីភ្នំពេញ ក៏បានដកកាំភ្លើងបាញ់ទម្លាយកញ្ចក់មុខរថយន្តចំនួន៤គ្រាប់ បង្កការភ្ញាក់ផ្អើល និង ត្រូវកម្លាំងសមត្ថកិច្ចកងរាជអាវុធហត្ថខណ្ឌដូនពេញឃាត់ខ្លួនភ្លាមៗ រួចបានប្រគល់ជនជាប់ចោទ ទៅកានើទីបញ្ជាការកងរាជអាវុធហត្ថរាជធានីភ្នំពេញ។ បន្ទាប់មកទៀតជនជាប់ចោទត្រូវបាន កសាងសំណុំរឿងទៅសាលាដំបូងរាជធានីភ្នំពេញតាមនីតិវិធី និងបានឃុំខ្លួនក្នុងពន្ធនាគារ៕ ដោយ៖បញ្ញាស័ក្តិ
