ខេត្តកណ្តាល៖ ក្នុងករណីគ្រោះថ្នាក់ចរាចរ រវាងរថយន្ត នឹងរថយន្ត បណ្ដាលអោយស្លាប់១នាក់ និងរបួសធ្ងន់១នាក់ ព្រមទាំងខូចខាតរថយន្ត២គ្រឿង និងសម្ភារៈប្រជាពលរដ្ឋមួយចំនួនទៀត កាលពីថ្ងៃសុក្រ ទី២៧ ខែមេសា ឆ្នាំ២០១៨ វេលាម៉ោង១៧និង៥០នាទី នៅចំណុច ផ្លូវលេខ២១ ស្ថិតក្នុងភូមិឫស្សីដាច់ ឃុំព្រែកអំបិល ស្រុកស្អាង ខេត្តកណ្តាល ។
សមត្ថកិច្ចចរាចរណ៍ បន្តថា មុនពេលហេតុការណ៍នេះ គឺមានរថយន្តម៉ាកវីស្តូ ពណ៌ ទឹកប្រាក់ ពាក់ស្លាកលេខ ភ្នំពេញ 2AE-8952 បើកបរដោយឈ្មោះ លឿង ថៃឡឺយ ភេទប្រុស អាយុ៣០ឆ្នាំ ជនជាតិវៀតណាម មានទីលំនៅ ឃុំខាន់អាង ស្រុកអាន់ភូ ខេត្តអាងយ៉ាង ប្រទេសវៀតណាម បានធ្វើដំណើរក្នុងទិសដៅពីត្បូងមកជើង ។លុះពេលមកដល់ចំណុចកើតហេតុខាងលើ ក៏បានវេចង្កូតចូលទៅបុករថយន្តធំម៉ាកហ៊ីយ៉ាន់ដាយ ពណ៌ស ពាក់ស្លាកលេខ ព្រះសីហនុ 3A-5568 បើកបរដោយឈ្មោះ ណុល ម៉េងហុង ភេទប្រុស អាយុ១៩ឆ្នាំ មុខរបរបើកបររថយន្ត រួមដំណើរជាមួយឈ្មោះ គា ឆាង ភេទប្រុស អាយុ១៩ឆ្នាំ ជាព្រូរថយន្ត មានទីលំនៅភូមិព្រែកស៊ឹង ឃុំសំពៅពូន ស្រុកកោះធំ ខេត្តកណ្ដាល ខណៈដែលរថយន្តហ៊ីយ៉ាន់ដាយកំពុងបើកបញ្ច្រាសទិសគ្នា ពីជើងមកត្បូង បណ្ដាលឲ្យ អ្នកបើកបររថយន្តម៉ាកវីស្តូគៀបស្លាប់ភ្លាមៗនៅក្នុងរថយន្ត និងធ្វើឲ្យរថយន្តធំ ជ្រុលទៅប៉ះឈ្មោះ ម៉ាន់ ម៉ុន ភេទប្រុស អាយុ៦៥ឆ្នាំ មុខរបរ កសិករ មានទីលំនៅភូមិឫស្សីដាច់ ឃុំព្រែកអំបិលុំ ស្រុកស្អាង ខេត្តកណ្ដាល ដែលកំពុងឈរទទួលភ្ញៀវរោងការ នៅលើចិញ្ចើមផ្លូវខាងកើត រងរបួសធ្ងន់ និងខូចខាតម៉ាសីុនថតវីដេអូ, ភ្លើង LED, កៅអីកាត់សក់, ជើងថតវីតដេអូ មួយចំនួនទៀត ។
ក្រោយកើតហេតុនេះភ្លាម សមត្ថកិច្ចជំនាញបានចុះពិនិត្យទីកន្លែងកើតហេតុ និងវាស់វែងយកវត្ថុតាងមករក្សាទុកនៅអធិការដ្ឋាននគនរបាលស្រុកស្អាង ដើម្បីកសាងសំណុំរឿងទៅតាមនីតិវិធីនៃច្បាប់ ។
ចំណែកជនរងគ្រោះត្រូវបានក្រុមគ្រួសាដឹកយកទៅសង្គ្រោះនៅមន្ទីរពេទ្យកាល់ម៉ែត រាជធានីភ្នំពេញ រីឯសាកសពបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ចំពោះអ្នកបើករថយន្តធំបាននាំយកមកសាកសួរនៅអធិការដ្ឋាននគរបាលស្រុលស្អាង ។
សមត្ថកិច្ចបានបញ្ជាក់ថា ករណីនេះ បង្កឡើងដោយអ្នកបើកបររថយន្តធុនតូចវីស្តូ បើកចូលស្ដាំរបស់រថយន្តធុនធំ ដោយការធ្វេសប្រហែស ខ្វះការប្រុងប្រយ័ត្ន ចំណែកអ្នកបើកបររថយន្តធំ បើកក្នុងល្បឿនលឿន ខ្វះការប្រុងប្រយ័ត្ន ទើបបង្កឲ្យមានគ្រោះថ្នាក់កើតឡើង ៕ ដោយ ៖ បញ្ញាស័ក្តិ
