ស្វាយរៀង ៖ ដើម្បីធានាបានសុវត្ថិភាពចំណីអាហារ លោកផឹង និល ប្រធានសាខាកាំកុងត្រូលខេត្តស្វាយរៀង នៅព្រឹកថ្ងៃទី៣០ ខែមេសា ឆ្នាំ២០១៨ បានដឹកនាំមន្ត្រីចុះពិនិត្យមុខទំនិញបានជាច្រើនមុខនៅក្នុងផ្សាវាលយន្តក្រុងស្វាយរៀង តែពុំបានរកឃើញសារធាតុគីមីដាក់ក្នុងម្ហូបអាហារនោះទេ ។
លោកផឹង និល បានមានប្រសាសន៍ថាៈ ដោយមានការណែនាំពីលោក ប៉ានសូរស័ក្ក រដ្ឋមន្ត្រីក្រសួងពាណិជ្ជកម្មនិងលោកម៉ក់ពេជ្ជរិទ្ធប្រតិភូរាជរដ្ឋាភិបាលទទួលបន្ទុកជាអគ្គនាយកកាំកុងត្រូល ក្នុងនោះកាំកុងត្រូលខេត្តស្វាយរៀងតែងតែបន្តចុះពិនិត្យមុខទំនិញបានជាច្រើនលើកហើយការចុះពិនិត្យមុខទំនិញនៅថ្ងៃនេះ ក្នុងគោលបំណងធានាបានសុវត្ថិភាពម្ហូបអាហារ ព្រោះវាមានសារសំខាន់ចាំបាច់ណាស់ក្នុងសង្គម និងជីវភាពប្រចាំថ្ងៃ។ លោកបានបន្តថា ការទទួលខុសត្រូវលើ សុវត្ថិភាពម្ហូបអាហារ គឺជាការទទួលខុសត្រូវរួមគ្នា ទាំងស្ថាប័នជំនាញ ទាំងអ្នកនាំចូល អ្នកផលិត អ្នកចែកចាយ និងអ្នកទាំងអស់គ្នាជាអ្នកប្រើប្រាស់ផងដែរ ព្រោះសុខភាពគឺជាកត្តាចំបងនៃភាពរស់រាននៃជីវិត។
លោកបានថ្លែងបញ្ជាក់ថា មន្ត្រីជំនាញបានធ្វើការពិនិត្យមុខទំនិញបានជាច្រើនមុខ ក្នុងផ្សារវាលយន្តពុំបានរកឃើញសារធាតុគីមីនោះទេ ចំណែកអ្នកលក់ ក៏បានយល់ព្រមបញ្ឈប់ការដាក់លក់ទំនិញដែលខួចគុណភាពហួសការបរិច្ឆេទប្រើប្រាស់ ព្រោះពួកគេទាំងអស់នោះបានយល់ដឹង នូវផលប៉ះពាល់ដល់សុខភាពរបស់ពលរដ្ឋ។
ក្រោយពីបានធ្វើការអំពាវដល់ប្រជាពលរដ្ឋទាំងអស់នៅខេត្តស្វាយរៀង សូមឱ្យមានការប្រយ័ត្នចំពោះការបរិភោគចំណីអាហារ ត្រូវពិនិត្យមើលស្លាកសញ្ញា កាលបរិច្ឆេទឲ្យបានច្បាស់លាស់ មុននឹងទិញយកទៅបរិភោគ ជាពិសេសចំណីអាហារក្មេងៗនិយមបរិភោគត្រូវពិនិត្យមើលអោយបានត្រឹមត្រូវមុននឹងបរិភោគដើម្បីចូលរួមលើកកម្ពស់សុខុមាលភាពទាំងអស់គ្នា ហើយមន្ត្រីកាំកុងត្រូល នឹងបន្តចុះពិនិត្យទំនិញនៅតាមផ្សារនានា នៅក្នុងខេត្តស្វាយរៀងឲ្យបានញឹកញាប់បន្ថែមទៀត៕ វ៉ៃកូ
