នៅថ្ងៃ ៣០ ខែមេសា នេះ ប្រធានាធិបតីហ្វីលីពីន Rodrigo Duterte បានសរសើរលោកគីម ជុងអ៊ុនថា គឺជា “វីរៈជនរបស់មហាជន” ក្រោយពេលមេដឹកនាំកូរ៉េខាងជើងសន្យាសហការណ៍ជាមួយកូរ៉េខាងត្បូង “ដើម្បីរំសាយនុយក្លេអ៊ែរទាំងស្រុង” ពីឧបទ្វីបកូរ៉េ ។
ក្រោយជំនួបកំពូលអន្តរកូរ៉េមេដឹកនាំគីម ជុងអ៊ុង បានក្លាយជានិមិត្តរូបរបស់ប្រធានាធិបតីហ្វីលីពីន Rodrigo ។
តាមនោះលោក Duterte ឲ្យដឹងថា លោកគីម បានក្លាយជា “និមិត្តរូប” របស់ខ្លួន ហើយបើមានឱកាសជួប លោកនឹងនិយាយជាមួយលោក គីម ថា “ខ្ញុំពិតជាចូលចិត្តលោកណាស់” ព្រោះលោកចេះធ្វើការសម្រេចចិត្តត្រូវពេលវេលា ។
លោក Duterte បានវាយតម្លៃអំពីជំនួបកំពូលជាប្រវត្តិសាស្ត្ររបស់កូរ៉េទាំងពីរថា ៖ តាំងពីដើមរហូតទល់ពេលនេះ លោកគីម ច្រើនត្រូវគេពណ៌នាថា ជាមនុស្ស “គ្មានសីលធម៌” ក្នុងសហគមន៍អន្តរជាតិ ។ តាមរយៈជំហានមួយដ៏មហិមា ឥឡូវគាត់បានក្លាយជាវីរៈជនរបស់មហាជន ។ លោកពោលបន្ថែមថា “មើលទៅគាត់ដូចជាមនុស្ស ត្រឹមត្រូវ រីករាយនិងទន់ភ្លន់។ គាត់អាចចាត់ទុកខ្ញុំជាមិត្ត ។ គាត់បាននាំយកនូវឥទ្ធិពលដ៏ធំធេងមួយធ្វើឲ្យស្ថានការណ៍នៅឧបទ្វីបកូរ៉េ ថយចុះភាពតានតឹងយ៉ាងច្រើន ។ ហើយអាចត្រឹមនិយាយបានថា អាចបញ្ចៀសបាននូវសង្គ្រាមមួយដែលគ្មាននរណាចង់ ។
គួររំលឹកថា មុននេះប្រធានាធិបតីហ្វីលីពីន បានរិះគន់យ៉ាងច្រើនចំពោះកូរ៉េខាងជើង ដោយសារតែកម្មវីធីអាវុធនុយក្លេអ៊ែររបស់ប្រទេសនេះ ៕ សូយន