ក្រចេះ៖ របាយការណ៍របស់លោក វ៉ា ថន អភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តក្រចេះ នៅថ្ងៃទី៦ខែឧសភានេះ បានឲ្យដឹងថា សរុបពីថ្ងៃទី៣ដល់ទី៦ខែឧសភានេះ ករណីផ្ទុះជំងឺមានប្រជាពលរដ្ឋចូលសម្រាក ព្យាបាលជំងឺនៅមន្ទីរពេទ្យបង្អែកខេត្តសរុបចំនួន១២១នាក់ ប្រុសចំនួន៥៣នាក់ ប្រជាពលរដ្ឋស្លាប់សរុបចំនួន១០នាក់ ប្រុសចំនួន៣នាក់ ក្នុងនោះបញ្ជូនទៅរាជធានីភ្នំពេញ ចំនួន៩នាក់ បានស្លាប់តាមផ្លូវចំនួន២នាក់ ស្លាប់នៅមន្ទីរពេទ្យរាជធានីភ្នំពេញចំនួនម្នាក់។
លោកអភិបាលខេត្ត បានបញ្ជាក់ថា គណៈបញ្ជាការឯកភាពរដ្ឋបាលខេត្ត ដឹកនាំដោយលោកអភិបាលខេត្ត នៅព្រឹកថ្ងៃទី៦ខែឧសភា បានដឹកនាំកងកម្លាំងចុះពិនិត្យផ្ទាល់ ជាលើកទី២ នៅចំណុចកើតហេតុ និងបានដឹកទឹកសុទ្ធចំនួន២រថយន្ត និងទឹកប្រើប្រាស់ ព្រមទាំងពីដុងទឹកយកទៅចែកជូនប្រជាពលរដ្ឋនៅភូមិកើតហេតុទាំងពីរដើម្បីបរិភោគ និងប្រើប្រាស់។
បើតាមរបាយការណ៍របស់រដ្ឋបាលខេត្តក្រចេះ ដែលគោរពជូនសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅថ្ងៃទី៦ខែឧសភា ឆ្នាំ២០១៧ ករណីប្រជាពលរដ្ឋផ្ទុះជំងឺបណ្តាលឲ្យស្លាប់ជាបន្តបន្ទាប់ នៅចំណុចទេចម្លងឧបសម្ព័ន្ធភូមិស្រែនន និងចំណុចយ៉ែភូមិអាលច ឃុំកន្ទួត ស្រុកចិត្របុរី ខេត្តក្រចេះ។
អ្នកស្លាប់ និងរងគ្រោះកើនឡើងយ៉ាងគំហុក នៅស្រុកចិត្របុរី ខេត្តក្រចេះ ខណៈនៅក្នុងភូមិប្រជាពលរដ្ឋ បានចេញស្ទើរតែអស់ពីផ្ទះ ព្រោះតែការភ័យខ្លាចជំងឺ ដែលមានរោគសញ្ញាដូចជា ឈឺពោះ ក្អួតចង្អោ ឈឺក អស់កម្លាំង ទន់ដៃជើង វិលមុខ ថប់ដង្ហើម បណ្តាលឲ្យស្លាប់ជាបន្តបន្ទាប់។
លោកអភិបាលខេត្ត ក៏បានចាត់កម្លាំងដើម្បីជួយរៀបចំពិធីបញ្ចុះសព និងពិធីបុណ្យ ចំនួន៣សព និងបាត់កម្លាំងស្នងការដ្ឋាននគរបាលខេត្ត កម្លាំងតំបន់ប្រតិបត្តិការសឹករងខេត្ត កម្លាំងបញ្ជាការដ្ឋានកងរាជអាវុធហត្ថខេត្ត ចំនួន៥០នាក់ និងគ្រូពេទ្យចំនួន១៥នាក់ ប្រចាំការជួយសង្គ្រោះ តាមដាន និងចែកទឹកជូនប្រជាពលរដ្ឋ និងបានដាក់កម្លាំងទាំង៣ចំនួន៣០នាក់ គ្រូពេទ្យចំនួន៧នាក់ និងរថយន្តសង្គ្រោះនៅប្រចាំចំណុចភូមិកើតហេតុ។
លោកវ៉ា ថន បានលើកឡើងថា ផ្អែកតាមការសន្និដ្ឋានជាបឋមករណីប្រជាពលរដ្ឋផ្ទុះជំងឺ និងស្លាប់ជាបន្តបន្ទាប់នេះ គឺអាចបណ្តាលមកពីការពុលសារធាតុគីមីនៅក្នុងទឹក ហើយក៏បានចេញសេចក្តីប្រកាសព័ត៌មានដល់ប្រជាពលរដ្ឋដែលរស់នៅភូមិកើតហេតុ និងប្រជាពលរដ្ឋរស់នៅដងព្រែកទេ បញ្ឈប់ប្រើប្រាស់ទឹកព្រែកទេជាបន្ទាន់៕ ដោយ៖បញ្ញាស័ក្តិ