ភ្នំពេញ៖ សមត្ថកិច្ចចម្រុះបានចុះប្រតិបត្តិការ ឆែកឆេរផ្ទះប្រជាពលរដ្ឋ ចំនួន២ល្វែង ដោយបានរកឃើញស្បែក និងឆ្អឹងសត្វព្រៃជាច្រើនគីឡូក្រាម។ ការបង្ក្រាបនេះធ្វើឡើងដោយក្រុមប្រតិបតិ្ដការចល័តរដ្ឋបាលព្រៃឈើ និងកងកម្លាំងរាជអាវុធហត្ថ រួមសហការជាមួយអាជ្ញាធរមូលដ្ឋានខណ្ឌសែនសុខ ក្រោមការដឹកនាំបញ្ជាពីលោក ខាំ សុផារី ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញនៅថ្ងៃទី១០ ខែឧសភា ឆ្នាំ២០១៨នេះ នៅមុខផ្សារដីហុយ ខណ្ឌសែនសុខ។
ជាលទ្ធផលក្នុងការចុះឆែកឆេរ ផ្ទះ២ល្វែងនេះ កម្លាំងសមត្ថកិច្ច បានរកឃើញសំណល់ស្បែកខ្លា ឆ្អឹងខ្លា កន្ទុយខ្លា ភ្លុកដំរី និងកម្ទេចកម្ទីសត្វព្រៃ មានតម្លៃជាច្រើនប្រភេទ ជាច្រើនគីឡូក្រាម។ កម្លាំងសមត្ថកិច្ច បានឃាត់ខ្លួនជនសង្ស័យចំនួន២នាក់ ដែលជាម្ចាស់ផ្ទះល្វែងទាំង២ទីតាំង យកទៅសួរនាំ ដកហូតម៉ូតូមួយគ្រឿង និងបានបិទឃ្លុំបេផ្ទះទាំង២នេះជាបណ្ដោះអាសន្ន៕ ដោយ៖បញ្ញាស័ក្តិ
