ខេត្តស្វាយរៀង ៖ នាព្រឹកថ្ងៃព្រហស្បតិ៍ ១១រោច ខែពិសាខ ឆ្នាំច សំរឹទ្ធិស័ក ព.ស.២៥៦២ ត្រូវនិងថ្ងៃទី១០ ខែឧសភា ឆ្នាំ២០១៨នេះ
លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំទាក់ទំនងជាមួយរដ្ឋសភា ព្រឹទ្ធសភា និងអធិការកិច្ច អស់លោក លោកស្រីជាថ្នាក់ដឹកនាំខេត្តបានរួមអមដំណើរសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា អញ្ជើញជួបសំណេះសំណាលជាមួយកម្មករ កម្មការិនីសរុបចំនួន ១៩,៤៨៩ នាក់ មកពីតំបន់សេដ្ឋកិច្ចពិសេសចំនួនបី គឺតំបន់សេដ្ឋកិច្ចពិសេសតាយសេង តំបន់សេដ្ឋកិច្ចពិសេសនាគរាជ និងតំបន់សេដ្ឋកិច្ចពិសេសសាន់ដុងសាន់សែល និងរោងចក្រ សហគ្រាស ចំនួន៣២ ដែលពិធីនេះធ្វើឡើងនៅបរិវេណតំបន់សេដ្ឋកិច្ចពិសេសអ៊ិនធើវៀ អូតូម៉ូបាល អ៊ិនដាសស្ទ្រី ខមផ្លេកស៍ នៅក្នុងក្រុងបាវិត ខេត្តស្វាយរៀង ។
ក្នុងពិធីនេះក៏មានការអញ្ជើញចូលរួមពីសំណាក់លោក លោកស្រី ជាសមាជិកព្រឹទ្ធសភា រដ្ឋសភា លោក លោក ស្រីជាទេសរដ្ឋមន្ត្រី រដ្ឋមន្ត្រី រដ្ឋលេខាធិការ អនុរដ្ឋលេខាធិការ អគ្គមេបញ្ជាការ អគ្គមេបញ្ជារងកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស អគ្គស្នងការរងនគរបាលជាតិ លោក លោកស្រីសមាជិកក្រុមការងារថ្នាក់ជាតិចុះមូលដ្ឋាននៅខេត្តស្វាយរៀង ក្រុមប្រឹក្សាខេត្ត អភិបាលរងខេត្ត មេបញ្ជាការកងកម្លាំងទាំងបី ប្រធានមន្ទី-អង្គភាព ប្រធានក្រុមប្រឹក្សា និងអភិបាលក្រុង ស្រុកទាំង៨ ព្រមទាំងប្រធានក្រុមហ៊ុន រោងចក្រ សហគ្រាសនានាដែលមានកម្មករ កម្មការិនីចូលរួមក្នុងពិធីសំណេះសំណាលនៅថ្ងៃនេះ ។
ក្នុងឱកាសនោះផងដែរ បន្ទាប់ពីមានមតិសំណេះសំណាលប្រកបដោយអត្ថន័យ និងខ្លឹមសារ ការចុះជួបសួរសុខទុក្ខ និងផ្តល់ថវិកាមួយចំនួនដោយផ្ទាល់ដៃដល់កម្មការិនីមានផ្ទៃពោះចំនួន ៧១៤នាក់ រួចមក សម្ដេចតេជោនាយករដ្ឋមន្ត្រី អមដំណើរដោយលោកស្រីឧបនាយករដ្ឋមន្ត្រី លោក លោកស្រី ទេសរដ្ឋមន្ត្រី រដ្ឋមន្ត្រី រដ្ឋលេខាធិការ អនុរដ្ឋលេខាធិការ និងអភិបាលខេត្ត ក៏បានអញ្ជើញទស្សនកិច្ច និងពិនិត្យមើលសង្វាក់ផលិតកម្ម នៃរោងចក្រដំឡើងរថយន្តរបស់ក្រុមហ៊ុន Daehan Auto Cambodia ជាក្រុមហ៊ុនរបស់ប្រទេសកូរ៉េ ដែលស្ថិតក្នុងតំបន់សេដ្ឋកិច្ចពិសេសអ៊ិនធើវៀ អូតូម៉ូបាល អ៊ិនដាសស្ទ្រី ខមផ្លេកស៍ ។ រោងចក្រដំឡើងរថយន្តនេះ មានកម្មករសរុបចំនួន២៤៣ នាក់ ក្នុងនោះនារី មានចំនួន ៤៣នាក់ បច្ចុប្បន្នកំពុងធ្វើសកម្មភាពដំឡើងរថយន្តផ្ទាល់របស់ខ្លួនសម្រាប់ផ្គត់ផ្គង់តម្រូវការក្នុងស្រុក ដែលក្នុងនោះមានជារថយន្តប្រភេទដឹកកម្មករ ដឹកទំនិញ រថយន្តជាលក្ខណៈគ្រួសារ និងប្រភេទរថយន្តផ្សេងៗទៀត ៕ វ៉ៃកូ
