ភ្នំពេញ ៖ នៅព្រឹកថ្ងៃទី ២ ខែឧសភា ឆ្នាំ ២០២២សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា អញ្ជើញជួបពិភាក្សាការងារជាមួយឯកឧត្តម នាយឧត្តមសេនីយ៍ មីន អោងឡាំង តាមរយ:ប្រព័ន្ធវីដេអូ។
ជំនួបតាមប្រព័ន្ធវីដេអូជាលើកទី២ សម្រាប់ឆ្នាំ២០២២ រវាងសម្តេចតេជោ និងលោក មីន អោងឡាំង មិនទាន់បានបញ្ជាក់ពីគោលបំណង និងរបៀបវារៈ ដែលលើកមកជជែកនៅឡើយនោះទេ។ លទ្ធផលនៃជំនួបនឹងត្រូវផ្សព្វផ្សាយដោយក្រសួងការបរទេសកម្ពុជា។
បើទោះបីជាយ៉ាងមានការមើលឃើញថា ជំនួបនេះ អាចជាការពិនិត្យលើបច្ចុប្បន្នភាព និងការវិវត្តន៍នៃការដោះស្រាយលើវិបត្តិរបស់មីយ៉ាន់ម៉ា។ ជំនួបនេះ ក៏អាចនឹងមានការលើកឡើងពាក់ព័ន្ធកិច្ចប្រជុំកំពូលអាស៊ាន-អាមេរិក ដែលគ្រោងធ្វើឡើងនៅសប្តាហ៍ក្រោយ ក្រោមវត្តមានរបស់សម្តេចតេជោ ហ៊ុន សែន ជាប្រធានអាស៊ាន នៅក្រុងវ៉ាស៊ីនតោន សហរដ្ឋអាមេរិក៕ រក្សាសិទ្ធិដោយ ៖ សុទ្ធ លី
