ភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ជាមួយនិងលោក ចាវ ឃើជឺ (Zhao Kezhi) រដ្ឋមន្ត្រីក្រសួងសន្តិសុខសាធារណៈ នៃសាធារណៈរដ្ឋប្រជាមានិតចិន នាល្ងាចថ្ងៃទី១១ ខែឧសភា ឆ្នាំ២០១៨នេះ នៅទីស្តីការក្រសួងមហាផ្ទៃ បានចុះអនុស្សរណៈយោគយល់គ្នា ស្តីពីការបង្កើនទំនាក់ទំនង សហប្រតិបត្តិការប្រយុទ្ធប្រឆាំងភេរវកម្ម បទឧក្រិដ្ឋកម្មឆ្លងដែន និងបង្កើនកិច្ចសហការឲ្យបានកាន់តែស្អិតល្មួតបន្ថែមទៀត ក្នុងការទប់ស្កាត់នូវឧបាយកលរបស់ពួកអមិត្តគ្រប់ប្រភេទ ដែលប៉ុនប៉ងបំផ្លិចបំផ្លាញខឿនសន្តិសុខជាតិជា ។
ថ្លែងប្រាប់អ្នកយកព័ត៌មានក្រោយពីកិច្ចប្រជុំ និងការចុះហត្ថលេខានោះ លោក ផាត សុផានិត ប្រធាននាយកដ្ឋានទំនាក់ទំនងអន្តរជាតិ ក្រសួងមហាផ្ទៃ និងជាអ្នកនាំពាក្យ នៃកិច្ចប្រជុំបានលើកឡើងថា ក្រសួងមហាផ្ទៃកម្ពុជា និងក្រសួងសន្តិសុខសាធារណៈចិន បានសន្យារួមគ្នាពង្រឹងកិច្ចសហប្រតិបត្តិការទ្វេភាគីឲ្យកាន់តែខ្លាំងក្លាបន្ថែមទៀត ក្នុងការទប់ស្កាត់នូវអំពើភេរវកម្ម ការទប់ស្កាត់ និងបង្ក្រាបនូវចលនាបដិវត្ដន៍ពណ៌ និងបទល្មើសផ្សេងៗទៀតដែលជាកត្តាធ្វើឲ្យអសន្តិសុខជាតិ និងសង្គមជាដើម ។
លោក ផាត សុផានិត បានបន្ថែមទៀតថា នៅក្នុងកិច្ចប្រជុំនោះ សម្តេចក្រឡាហោម ស ខេង និងលោក ចាវ ឃើជឺ (Zhao Kezhi) ក៏បានសន្យាពង្រឹងកិច្ចសហប្រតិបត្តិការបន្ថែមក្នុងការទប់ស្កាត់បទល្មើសដូចជា បទល្មើសតាមអ៊ីនធើណិត រួមគ្នាបង្ក្រាបការជំរិតទារប្រាក់តាមរយៈអ៊ីនធើណែត បទល្មើសសេដ្ឋកិច្ច ការប្រឆាំងការជួញដូរមនុស្ស និងបទល្មើសជាច្រើនទៀត ។ នៅក្នុងកិច្ចប្រជុំ សម្តេចក្រឡាហោ ស ខេង ក៏បានស្នើសុំឲ្យភាគីចិនបន្តបណ្តុះបណ្តាលធនធានមនុស្ស និងជំនាញការទប់ស្កាត់បទល្មើសផ្សេងៗដល់មន្ត្រីក្រសួងមហាផ្ទៃបន្ថែមទៀត ។ បន្តខិតខំជំរុញទំនាក់ទំនងទាំងក្នុងក្របខ័ណ្ឌទ្វេភាគី និងពហុភាគី ជាពិសេសលើការងារពង្រឹងការអនុវត្តន៍ច្បាប់ ។ បន្តគាំទ្រគ្នាទៅវិញទៅមកទាំងក្របខណ្ឌជាតិ-អន្តរជាតិសំដៅការពារការវាយប្រហារតាមរយៈសាធារណៈមតិ ដោយបញ្ហាសិទ្ធមនុស្ស លទ្ធិប្រជាធិបតេយ្យ និងបញ្ហាសង្គមផ្សេងៗធ្វើជាលេស ព្រមទាំងសហការផ្លាស់ប្តូរបទពិសោធន៍ការងារគ្រប់គ្រងអង្គការសង្គមស៊ីវិល និងបណ្តាញផ្សព្វផ្សាយតាមបែបទំនើប ដើម្បីក្តាប់ឲ្យបានហ្មត់ចត់នូវចេតនាបំផ្លិតបំផ្លាញ ដែលមានគោលដៅបង្កអស្ថិរភាពសង្គម និងផ្តួលរំលំរាជរដ្ឋាភិបាលជាដើមនោះ ។
នៅក្នុងដំណើរទស្សនកិច្ចរបស់ លោក ចាវ ឃើជឺ ក៏បានឧបត្ថម្ភនូវសម្ភារៈមួយចំនួន ដល់ក្រសួងមហាផ្ទៃកម្ពុជា ដែលសម្ភារៈទាំងនោះរួមមាន៖ អាវការពារ ចំនួន២០០ ខែលការពារ ចំនួន២០០ វិទ្យុទាក់ទង ចំនួន៩០០គ្រឿង និងប្រព័ន្ធ Repeater (ម៉ាស៊ីនមេ) ចំនួន២០គ្រឿង ៕ ដោយ៖បញ្ញាស័ក្តិ
