តំបន់ជាច្រើននៃអាស៊ីខាងត្បូង បច្ចុប្បន្នកំពុងប្រឈមមុខនឹងរលកកំដៅដ៏ធ្ងន់ធ្ងរដែលបានចាប់ផ្តើមនៅក្នុងខែមីនា នៅពេលដែលសីតុណ្ហភាពបានកើនឡើងជាច្រើនដឺក្រេលើសពីមធ្យមភាគច្រើនឆ្នាំ។
យោងតាមនាយកដ្ឋានឧតុនិយមរបស់ប្រទេសឥណ្ឌា ប្រទេសនេះបានជួបប្រទះនឹងអាកាសធាតុក្តៅបំផុតក្នុងខែមីនា ក្នុងរយៈពេលជាងមួយសតវត្ស។ តំបន់ជាច្រើននៅភាគខាងជើង ខាងលិច និងភាគខាងកើតប្រទេសឥណ្ឌាបានកត់ត្រាសីតុណ្ហភាពកើនឡើងដល់ជាង 40 អង្សាសេ នៅក្នុងខែមេសា។
សីតុណ្ហភាពនៅក្នុងផ្នែកជាច្រើននៃប្រទេសឥណ្ឌា និងប៉ាគីស្ថាន នាពេលថ្មីៗនេះ បានឡើងលើសពី 50 អង្សារសេ ដែលបំផ្លាញដំណាំ និងអាយុជីវិតរបស់ប្រជាជនយ៉ាងធ្ងន់ធ្ងរ។
អាកាសធាតុក្តៅគួបផ្សំនឹងបាតុភូត “សីតុណ្ហភាពអំពូលសើម” កំពុងប្រឈមនឹងដែនកំណត់នៃការអត់ធ្មត់របស់ប្រជាជនឥណ្ឌា។ នៅពេលដែលអំពូលសើមលើសពី 35 អង្សារសេ ខ្យល់មិនអាចស្រូបយកចំហាយទឹកបានច្រើនទេ បណ្តាលឱ្យញើសមិនហួត ធ្វើឱ្យមនុស្សជួបប្រទះនូវបាតុភូតកំដៅដូចជា អស់កម្លាំង រមួលក្រពើ កន្ទួល ជាពិសេសជំងឺដាច់សរសៃឈាមខួរក្បាល ដែលមានហានិភ័យស្លាប់ ក្នុងរយៈពេលប៉ុន្មានម៉ោងប៉ុណ្ណោះ។
ជាក់ស្តែង នៅរដ្ឋ Maharashtra ភាគខាងលិចប្រទេសឥណ្ឌា ត្រូវបានគេរាយការណ៍ពីករណីស្លាប់ដោយសារកំដៅចំនួន ២៥ នាក់ ចាប់តាំងពីចុងខែមីនា ដែលជាចំនួនខ្ពស់បំផុតក្នុងរយៈពេល ៥ ឆ្នាំ មកនេះ។
អ្នកជំនាញបានព្រមានថា ប្រជាជនជាង ១ ពាន់លាននាក់នៅក្នុងប្រទេសឥណ្ឌា និងប៉ាគីស្ថានដែលនៅជិតខាងគ្នា ក៏ងាយរងគ្រោះដោយសារកំដៅខ្លាំងផងដែរ ដោយសារទឹកភ្លៀងមូសុង ត្រូវបានរំពឹងថានឹងលេចឡើងក្នុងខែនេះ។ ហើយការដាច់ភ្លើងកាន់តែញឹកញាប់ទៅៗនៅក្នុងតំបន់ជាច្រើន។
សីតុណ្ហភាពនៅទីក្រុងញូវដេលីនៅពេលថ្ងៃ គឺឡើងដល់ 44 អង្សាសេ ហើយមិនធ្លាក់ក្រោម 30 អង្សាសេ នៅពេលយប់។ ភ្នំសំរាម Bhalswa ដ៏ធំនៅជាយក្រុងភាគខាងជើងនៃទីក្រុង New Delhi បានបន្តឆេះចាប់តាំងពីថ្ងៃទី២៦ ខែមេសា ដែលធ្វើឲ្យខ្យល់អាកាសនៅក្នុងទីក្រុង កាន់តែមានការបំពុលយ៉ាងខ្លាំង៕ រក្សាសិទ្ធិដោយ៖ លឹម ហុង