ភ្នំពេញៈ រថយន្ត LEXUS RX300 មួយគ្រឿងបានទទួលរងការខូចខាតដោយរួញអស់មួយកំណាត់មុខ ហើយអ្នកបើកបរបានរងរបួសក្បាលធ្ងន់ ក្រោយពីបើកបុកគ្នាជាមួយរថយន្តក្រុង រិទ្ធមុនី យ៉ាងពេញទំហឹងនោះ។
ហេតុការណ៍គ្រោះថ្នាក់ចរាចរណ៍ ដែលបង្កការភ្ញាក់ផ្អើលនេះ កើតឡើងនៅវេលាម៉ោង៩៖៤០នាទីយប់ ថ្ងៃសៅរ៍ ១៣រោច ខែពិសាខ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១២ ខែឧសភា ឆ្នាំ២០១៨នេះ ត្រង់ចំណុចភ្លើងស្តុបផ្លូវ៥៩៨ កែងផ្លូវ១៨០០ ដែលស្ថិតក្នុងសង្កាត់ទួលសង្កែ២ ខណ្ឌឫស្សីកែវ រាជធានីភ្នំពេញ។
សាក្សីនៅកន្លែងកើតហេតុបានអោយដឹងថា នៅមុនពេលកើតហេតុ គេបានឃើញរថយន្តក្រុងដឹកអ្នកដំណើររបស់ក្រុមហ៊ុន រិទ្ធមុនី ពាក់ស្លាកលេខ បាត់ដំបង 3A-0244 ធ្វើដំណើរពីត្បូងទៅជើងតាមបណ្តោយផ្លូវ៥៩៨ លុះមកដល់ចំណុចកើតហេតុ ស្តុបផ្លូវ៥៩៨ កែងផ្លូវ១៨០០ រថយន្តក្រុងក៏បានបត់ឆ្វេងឆ្លងផ្លូវ ខណៈបទជិតផុតទៅហើយ ក៏ស្រាប់តែមានរថយន្ត LEXUS RX300 មួយគ្រឿង ពាក់ស្លាកលេខ ភ្នំពេញ 2O-0043 បើកលឿនដូចហោះ ជ្រុលទៅបុកចំកង់ឆ្វេងរថយន្តផ្នែកខាងក្រោយរថយន្តក្រុង លាន់ដូចរន្ទះ បណ្ដាលឲ្យអ្នកបើកបររថយន្តឡិចស៊ីស បោកក្បាលនឹងកញ្ចក់រងរបួស និងរថយន្តខ្ទេចមួយកំណាត់មុខបើកទៅមុខលែងរួច។ ចំណែករថយន្តក្រុង បានផ្ទុះកង់ និងខ្ទេចមួយចំហៀងឆ្វេងខាងក្រោយយ៉ាងដំណំផងដែរ។
ក្រោយពេលកើតហេតុ សមត្ថកិច្ច បានចុះមកដល់កន្លែងកើតហេតុ ដើម្បីធ្វើការវាស់វែង និងយករថយន្តទាំង២គ្រឿង មករក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីធ្វើការដោះស្រាយទៅតាមច្បាប់៕ ដោយ៖បញ្ញាស័ក្តិ