ភ្នំពេញ ៖ លោក ឃួង ស្រេង ប្រធានក្រុមការងារចុះជួយខណ្ឌព្រែកព្នៅ និងជាអភិបាល នៃគណៈអភិបាលរាជធានីភ្នំពេញ បានអំពាវនាវ ឱ្យបង្រជាពលរដ្ឋដែលស្រលាញ់សន្តិភាពនិងស្ថេរភាពសង្គម រួមគ្នាការពារ សន្តិភាព ដែលបានមកដោយលំបាកបំផុតមួយនេះឱ្យគង់វង់ និងការពារ ស្ថាបនិកសន្តិភាព ឱ្យបានល្អ ដើម្បីភាពសុខដុមរមនា និងការអភិវឌ្ឍ ដូចដែលកម្ពុជាកំពុងមានសព្វថ្ងៃនេះ។
លោកប្រធានក្រុមការងារ បានអំពាវនាវបែបនេះ នៅក្នុងពិធីសំណេះសំណាល ជាមួយសមាជិក សមាជិកា បក្សសង្កាត់សំរោង ចំនួន១៥២៩នាក់ កាលពីថ្ងៃទី១២ ខែ ឧសភានេះ នៅទីស្នាក់ការគណបក្សប្រជាជនកម្ពុជាសង្កាត់សំរោង។
ឯកឧត្តម អភិបាលបន្តថា បើបងប្អូនស្រលាញ់សន្តិភាព ត្រូវការពារសន្តិភាព ព្រោះថា សន្តិភាពនេះ មិនមានបរទេសណាលើកយកមកឱ្យកម្ពុជានោះទេ ហើយក៏គ្មានបក្សនយោបាយណាផ្សេង នាំមកឱ្យយើងទាំងអស់គ្នាដែរ ក្រៅពីកិច្ចខិតខំប្រឹងប្រែងបូជាសាច់ស្រស់ឈាមស្រស់របស់ថ្នាក់ដឹកនាំគណបក្សប្រជាជនកម្ពុជានោះ។ ដូច្នេះដើម្បីឱ្យសន្តិភាពនៅគង់វង់យូអង្វែងបានទាល់តែទាំងអស់គ្នារួមគ្នាការពារ ជាពិសេសការពារស្ថាបនិកសន្តិភាព គឺ សម្តេច អគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី ដ៏ឈ្លាសវៃ ដែលបានដាក់ចេញនូវយុទ្ធសាស្ដ្រ ឈ្នះឈ្នះ ធ្វើឲ្យគ្រប់ភាគីខ្មែរទាំងអស់បានត្រូវរ៉ូវគ្នា និងបានផ្លាស់ប្ដូរកម្ពុជា ពីសមរភូមិ នៃសង្គ្រាមរ៉ាំរ៉ៃ ពីការបែកបាក់ជាតិ និងការបែងចែកទឹកដីទៅជាប្រជាជាតិ១ ដែលមានសុខសន្ដិភាព សេរីភាព ឯកភាព ស្ថេរភាព អភិវឌ្ឍន៍ លើគ្រប់វិស័យ ហើយជីវភាពប្រជាជនត្រូវបានលើកកម្ពស់ជាបន្ដបន្ទាប់។
លោកបានរំលឹកផងដែរថា គណៈបក្សប្រជាជនកម្ពុជា មិនត្រឹមតែបានរំដោះប្រទេសជាតិ និងប្រជាជន ពីរបបប្រល័យពូជសាសន៍ប៉ុណ្ណោះទេ គឺថែមទាំងបានដឹកនាំ និង កសាងប្រទេសជាតិតាំងពីបាតដៃទទេររហូតមានសុខសន្តិភាព ស្ថិរភាពនយោបាយពេញលេញនិងមានការអភិវឌ្ឍរីកចំរើន។ប្រមុខដឹកនាំ គឺជាតួអង្គស្ថាបនិក នៃការបង្រួបបង្រួមជាតិ ផ្សះផ្សាជាតិ ធ្វើឲ្យប្រទេសជាតិ មានសុខសន្តិភាព ក្រោមនយោបាយឈ្នះ ឈ្នះ ការស្ដារប្រទេសជាតិ ឲ្យមានកេរ្តិ៍ឈ្មោះ លេចត្រដែតឡើងវិញ លើឆាកអន្តរជាតិ ហើយបាននិងកំពុងកែប្រែមុខមាត់ប្រទេសជាតិធ្វើឱ្យប្រជាជនមានជីវភាពធូរធារជាបន្តបន្ទាប់។
ក្នុងនោះលោក សុខ សម្បត្តិ អភិបាលខណ្ឌព្រែកព្នៅបានបង្ហាញពីជំហរ គៀងគរនិងប្រមែប្រមូលសមាជិកបក្សឱ្យបានកាន់តែច្រើន ដើម្បីឱ្យការបោះឆ្នោតសកលនាពេលខាងមុខនេះ ទទួលបានជោគជ័យ ។ ជាមួយគ្នានោះក៏បានបង្ហាញពីគម្រោងផែនការ ក្នុងការចូលរួមអភិវឌ្ឍន៍ មូលដ្ឋាន ខណ្ឌព្រែកព្នៅ ជាមួយថ្នាក់ដឹកនាំ សប្បុរសជន ឱ្យកាន់តែរីកចំរើន ពិសេស ការអភិវឌ្ឍហេដ្ឋរចនាសម្ព័ន្ធ ដោយធ្វើការជួសជុល ផ្លូវ កសាងប្រព័ន្ធប្រឡាយ លូ ក្នុងមូលដ្ឋានឱ្យបានកាន់តែប្រសើរ ដើម្បីបញ្ជៀសនូវការលិចលង់ដោយជំនន់ទឹកកភ្លៀងក្នុងរដូវវស្សានេះ។
លោក អភិបាលខណ្ឌ បានអំពាវនាវឱ្យប្រជាពលរដ្ឋ គិតគូរពីជីវភាពប្រចាំថ្ងៃ ចៀសជាងស្តាប់ការនិយាយភូតភរ ពីអ្នកនយោបាយជ្រុលនិយមមួយចំនួនតូច ដែលមានបំណងបំបែកបំបាក់ សាមគ្គីជាតិ និងបង្ករអស្ថេរភាពសម្រាប់សង្គមជាតិ ដោយរួមគ្នាការពារផលប្រយោជន៍ជាតិ និងសេចក្តីសុខក្នុងការរស់នៅ ជាពិសេសទៅបោះឆ្នោតឱ្យបានគ្រប់ៗគ្នា ដើម្បីជ្រើសរើសមេដឹកនាំដែលខ្លួនពេញចិត្ត នឹងគិតថាដឹកនាំប្រទេសឱ្យមានការរីកចំរើនទៅថ្ងៃអនាគត៕ ដោយ ៖ បញ្ញាស័ក្តិ
