បន្ទាប់ពីចាប់ដៃរៀបការជាប្ដីប្រពន្ធអស់រយៈពេលច្រើនឆ្នាំ កន្លងមកនេះ តារាចម្រៀង អ្នកនាង យក់ ថិតរដ្ឋា និង លោក ឃុំ ប៉ុណ្ណាដែត បានបង្កើតចំណងដៃកូនៗដ៏គួរឱ្យស្រឡញ់ និងសាងគ្រួសារមួយប្រកបដោយសុភមង្គល និងកក់ក្ដៅបំផុត ខណៈដែលជីវភាពរបស់ពួកគាត់មានភាពធូរធារបំផុត ដោយក្រៅពីមានរថយន្តទំនើបៗ ក៏មានផ្ទះវីឡាធំស្កឹមស្កៃផងដែរ ។
បច្ចុប្បន្ននេះ ថ្វីបើគ្រួសារមានទ្រព្យសម្បត្តិច្រើនយ៉ាងណាក្ដី ក៏អ្នកនាង យក់ ថិតរដ្ឋា នៅតែបន្តអាជីពជាតារាចម្រៀងប្រចាំផលិតកម្មថោន បន្ទាប់ពីចាកចេញពីផលិតកម្មរស្មីហង្សមាស ហើយបើក្រឡេកមើលលោក ឃុំ ប៉ុណ្ណាដែត ដែលជាស្វាមីឯណោះវិញ លោកបានបោះបង់អាជីពជាតារាចម្រៀងមួយរយភាគរយហើយ ដោយផ្ដោតខ្លាំងទៅលើមុខជំនួញដែលគេដឹងថា លោកជាអ្នកជំនួញអចលនទ្រព្យដ៏ពូកែម្នាក់ ។
មិនខុសពីតារាឯទៀតឡើយ ដែលតែងតែបង្អួតភាពមានបានរបស់ខ្លួននៅលើបណ្ដាញសង្គមហ្វេសប៊ុក ដោយថ្មីៗនេះ ទាំងពីរនាក់ប្ដីប្រពន្ធខាងលើ ក៏បានបង្ហាញពីភាពរីករាយក្នុងរង្វង់គ្រួសារ ព្រមទាំងភាពមានបានរបស់ខ្លួននៅលើបណ្ដាញហ្វេសប៊ុកផងដែរ ដែលធ្វើឱ្យអ្នកគាំទ្រស្ញើចសរសើរមិនដាច់ពីមាត់ឡើយ ៕ សាវុធ
