នាយឧត្តមសេនីយ៍ ប៉ុល សារឿន បានសំណូមពរដល់ភាគីវៀតណាម បន្តជួយបណ្តុះបណ្តាលធនធានមនុស្សជំនាញ ជាពិសេស ជំនាញទ័ពពិសេស ដែលជាកងកម្លាំងអន្តរាគមន៍រហ័សដ៏មានសារសំខាន់ ដើម្បីពង្រឹង ពង្រីកនូវទំនាក់ទំនងមិត្តភាព។
នៅអគ្គបញ្ជាការដ្ឋាន ថ្ងៃទី២ ខែវិច្ឆិកា ឆ្នាំ២០១៧ លោកនាយឩត្តមសេនីយ៍ ប៉ុល សារឿន អគ្គមេបញ្ជាការនៃកងយោធពលខេមរភូមិន្ទ បានស្វាគមន៍យ៉ាងកក់ក្តៅចំពោះ គណៈប្រតិភូកងទ័ពប្រជាជនវៀតណាម ដឹកនាំដោយ លោកឧត្តមសេនីយ៍ត្រី ដូ ថាញ់ ប៊ិញ មេបញ្ជាការទ័ពពិសេសនៃកងទ័ពប្រជាជនវៀតណាម ដែលបានបំពេញទស្សនកិច្ចនៅព្រះរាជាណាចក្រកម្ពុជា ដើម្បីពង្រឹង ពង្រីកនូវទំនាក់ទំនងមិត្តភាព សាមគ្គីភាព និងកិច្ចសហប្រតិបត្តិការជាប្រពៃណី ដែលប្រទេសជាតិទាំងពីរ កម្ពុជា-វៀតណាម ធ្លាប់មានជាយូរលង់ណាស់មកហើយ ឱ្យកាន់តែរីកចម្រើនមួយកម្រិតថែមទៀត។
នាយឩត្តមសេនីយ៍ ប៉ុល សារឿន បានមានប្រសាសន៍ ថ្លែងអំណរគុណយ៉ាងជ្រាលជ្រៅបំផុតចំពោះកងទ័ពប្រជាជនវៀតណាម ដែលបានឧបត្ថម្ភសំណង់អគារ សម្ភារៈ ថវិកា និងជួយបណ្តុះបណ្តាលធនធានមនុស្សក្នុងកងយោធពលខេមរភូមិន្ទ លើគ្រប់ជំនាញ ដែលជាកត្តាគន្លឹះក្នុងការអភិវឌ្ឍកងទ័ពកម្ពុជា ឱ្យមានការរីកចម្រើនជាលំដាប់។
លោក ឧត្តមសេនីយ៍ត្រី ដូ ថាញ់ ប៊ិញ បានថ្លែងអំណរគុណ និងកោតសរសើរចំពោះដំណើរការអភិវឌ្ឍរបស់ប្រទេសកម្ពុជាលើគ្រប់វិស័យ។ កងទ័ពប្រជាជនវៀតណាមតែងបានផ្តោតការយកចិត្តទុកដាក់ចំពោះតម្រូវការនានារបស់កងយោធពលខេមរភូមិន្ទ និងបានប្រកាន់យកនូវជំហរក្នុងការជួយឧបត្ថម្ភគ្នាទៅវិញទៅមក។
លោក ឧត្តមសេនីយ៍ត្រី បានបន្ថែមថា “ទ័ពពិសេសនៃកងទ័ពប្រជាជនវៀតណាម នឹងខិតខំយកអស់សមត្ថភាព ក្នុងការជួយបណ្តុះបណ្តាលទ័ពពិសេសនៃកងយោធពលខេមរភូមិន្ទ ឱ្យកាន់តែមានសមត្ថភាពខ្ពស់” ៕ ដោយ៖បញ្ញាស័ក្តិ
