ភ្នំពេញ៖ ធនាគារជាតិនៃកម្ពុជា បានសហការជាមួយមូលនិធិរូបិវត្ថុអន្តរជាតិ (IMF) រៀបចំសិក្ខាសាលាស្ដីពី ទស្សនវិស័យសេដ្ឋកិច្ចតំបន់អាស៊ីប៉ាស៊ីហ្វិក – វេលាល្អ, វេលាមិនច្បាស់លាស់ ពេលដែលត្រូវត្រៀមលក្ខណៈ ដើម្បីបង្កើនការយល់ដឹងឲ្យកាន់តែទូលំទូលាយ ពីស្ថានភាពសេដ្ឋកិច្ចក្នុងតំបន់ នាព្រឹកថ្ងៃទី២២ ខែឧសភា ឆ្នាំ២០១៨ នៅធនាគារជាតិនៃកម្ពុជា។
ចំសិក្ខាសាលាធ្វើឡើង ក្រោមអធិបតីភាពលោកស្រី នាវ ច័ន្ទថាណា ទេសាភិបាលរង និងវត្តមានរបស់លោកស្រី Yong Sarah Zhou តំណាងមូលនិធិរូបិយវត្ថុអន្តរជាតិប្រចាំនៅកម្ពុជា និងថ្នាក់ដឹកនាំនិងមន្ត្រីជំនាញមកពីក្រសួង-ស្ថាប័នរាជរដ្ឋាភិបាល គ្រឹះស្ថានធនាគារនិងហិរញ្ញវត្ថុ និងដៃគូអភិវឌ្ឍន៍នានា សរុបប្រមាណ ១០០នាក់។
ខ្លឹមសារនៃសិក្ខាសាលានេះបានបង្ហាញថា តំបន់អាស៊ីប៉ាស៊ីហ្វិករក្សាបានកំណើនសេដ្ឋកិច្ច ៥,៦ភាគរយ នៅឆ្នាំ២០១៨-២០១៩ ដែលជាកម្រិតខ្ពស់ធៀបនឹងតំបន់ដទៃ និងបានរួមចំណែកប្រមាណពីរភាគបីនៃកំណើនសេដ្ឋកិច្ចពិភពលោក ស្របពេលដែលអតិផរណាបន្តមានកម្រិតទាប។
ទោះយ៉ាងណា តំបន់នេះក៏កំពុងប្រឈមនឹងភាពមិនប្រាកដប្រជាមួយចំនួន រួមមាន៖ ប្រក្រតីកម្មគោលនយោបាយរូបិយវត្ថុ ទស្សនវិស័យនៃពាណិជ្ជកម្មអន្តរជាតិ ឥទ្ធិពលនៃកំណែទម្រង់សារពើពន្ធរបស់សហរដ្ឋអាមេរិក និង ហានិភ័យផ្សេងៗទៀតដូចជា បញ្ហាភូមិសាស្ត្រនយោបាយ និងគ្រោះធម្មជាតិជាដើម។
ដើម្បីអភិវឌ្ឍសេដ្ឋកិច្ចឱ្យមានភាពធន់ និងកំណើនរឹងមាំ អ្នករៀបចំគោលនយោបាយត្រូវយកចិត្តទុកដាក់លើ៖ គោលនយោបាយសារពើពន្ធគួរផ្តោតលើការកសាងលំហសារពើពន្ធ គោលនយោបាយរូបិយវត្ថុគួរមានភាពម៉ឺងម៉ាត់ គោលនយោបាយម៉ាក្រូប្រុងប្រយ័ត្នកាន់តែមានសារសំខាន់នៅក្នុងសេដ្ឋកិច្ច និងគោលនយោបាយរចនាសម្ព័ន្ធគួរត្រូវបានអនុវត្តដើម្បីដោះស្រាយបញ្ហាអសកម្មនានា។
ជារួម សិក្ខាសាលានេះបានផ្តល់ជាវេទិកាពិភាក្សាពីទស្សនវិស័យសេដ្ឋកិច្ចក្នុងតំបន់ និងឥទ្ធិពលមកលើកម្ពុជា រវាងភាគីពាក់ព័ន្ធទាំងក្នុងវិស័យឯកជននិងវិស័យសារធារណៈ ដើម្បីបង្កើនការយល់ដឹងឱ្យកាន់តែទូលំទូលាយពីស្ថានភាពសេដ្ឋកិច្ចក្នុងតំបន់ និងផ្តល់ជាធាតុចូលទៅក្នុងការរៀបចំគោលនយោបាយនានា សម្រាប់ការអភិវឌ្ឍវិស័យសេដ្ឋកិច្ចនិងហិរញ្ញវត្ថុនៅកម្ពុជាប្រកបដោយចីរភាព៕ ដោយ៖បញ្ញាស័ក្តិ
