នាព្រឹកថ្ងៃទី ២៣ ខែឧសភា ឆ្នាំ ២០១៨ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានរៀបចំពិធីជួបសួរសុខទុក្ខសំណះសំណាលជាមួយកម្មករ-កម្មការិនី មកពីរោងចក្រសហគ្រាសចំនួន១៧ នៅក្នុងខេត្តកំពង់ស្ពឺ ហើយក្នុងឱកាសនោះ មហាជនបានចាប់អារម្មណ៍លើប្រសាសន៍របស់សម្ដេចដែលបានថ្លែងទាក់ទងនឹងរឿងអាស្រូវគ្រឿងញៀនរបស់តារាចម្រៀងម្ចាស់ពាន The Voice Cambodia រដូវកាលទី ១ លោក ប៊ុត សីហា ។
សម្ដេចតេជោ បានថ្លែងយ៉ាងដូច្នេះថា «ប្រសិនបើ ប៊ុត សីហា មានការបញ្ជាក់អះអាងថា ខ្លួនពុំបានជាប់ពាក់ព័ន្ធនឹងករណីគ្រឿងញៀនទេ ចាំបាច់អីរើសអើងគ្នាទៀត»? ខណៈដែលប្រសាសន៍ហាក់ដូចជាចាក់ដោតចំបេះដូងតារាចម្រៀង ប៊ុត សីហា ឱ្យក្ដុកក្ដួលចិត្ត ព្រមទាំងបានឆ្លើយតបតាមរយៈទំព័រហ្វេសប៊ុករបស់ខ្លួនថា «អរគុណសម្តេចដែលចាំឈ្មោះ សីហា ខ្ញុំករុណាពិតជារំភើបចិត្ត ដែលសម្តេចនាយករដ្ឋមន្ត្រីបានលើកឡើង និងលើកទឹកចិត្តខ្ញុំករុណា ឈ្មោះខ្ញុំពិតជាល្បីណាស់បានលឺដល់សម្តេច។សូមសម្តេចប្រកបដោយសុខភាពល្អនិងជាម្លប់ដល់កូនចៅ» ។
គួររំឭកផងដែរថា តារាចម្រៀង ប៊ុត សីហា ត្រូវបានប៉ូលិសចាប់ខ្លួន កាលពីថ្ងៃទី២១ ខែកុម្ភៈ ឆ្នាំ២០១៨ ពាក់ព័ន្ធនឹងករណីគ្រឿងញៀន ហើយលោកត្រូវបានគេដោះលែងវិញ នៅថ្ងៃបន្ទាប់ ដោយមានការធានាពីសំណាក់ក្រុមគ្រួសារ ហើយក្រោយមកតារាចម្រៀងម្ចាស់បទ «បេះដូងអ្នកចម្រៀង» រូបនេះបានអះអាងថា ខ្លួនពុំបានជាប់ពាក់ព័ន្ធនឹងករណីគ្រឿងញៀនឡើយ ពោលគ្រាន់តែប៉ូលិសចាប់ខ្លួនច្រឡំប៉ុណ្ណោះ ។
ក្រោយពីមានព័ត៌មានអាស្រូវនេះ ប៊ុត សីហា ត្រូវបានផលិតកម្មរស្មីហង្សមាសបញ្ឈប់មុនកុងត្រា ខណៈដែលផលិតកម្ម ព្រមទាំងស្ថានីយទូរទស្សន៍នានា មិនអើពើចំពោះរូបលោកឡើយ ដែលធ្វើឱ្យជីវិតរបស់លោកធ្លាក់កូដរហូតដើរច្រៀងតាមរោងការដូចជីវិតកាលមិនពាន់ឈ្នះពាន The Voice Cambodia ៕ សាវុធ 
