ភ្នំពេញ ៖ បុរសម្នាក់មិនទាន់ស្គាល់អត្តសញ្ញាណម្នាក់ បាបស្លាប់ភ្លាមៗនៅហ្នឹងកន្លែង ខណៈជិះម៉ូតូតាមផ្លូវក្នុងល្បឿនលឿន តែដោយសង្ស័យរវល់តែមើលស្រីស្អាតដែលគេរៀបជាជួរមុខហាង មិនបានមើលផ្លូវក៏ជ្រុលចង្កូតទៅបុកទ្រូងផ្លូវដួលបាក់កស្លាប់ភ្លាមៗតែម្តង។
ហេតុការណ៍នេះបានកើតឡើងកាលពីវេលាម៉ោង៩យប់ថ្ងៃទី២៤ ខែឧសភា ឆ្នាំ២០១៨ ស្ថិតនៅតាមផ្លូវ២០០៤ ម្តុំសម្បុក សំបូរហាងខារ៉ាអូខេ ទល់មុខKTV មានលាភ ភូមិត្រពាំងល្វា សង្កាត់កាកាប១ ខណ្ឌពោធិ សែនជ័យ ។
ជនរងគ្រោះ មិនទាន់ស្គាល់អត្តសញ្ញាណនីវឡើយទេ មានអាយុជាង២០ឆ្នាំ ជិះម៉ូតូមួយគ្រឿង ម៉ាកហុងដា សេ១២៥ សេរី២០១៧ ពាក់ស្លាកលេខ ភ្នំពេញ 1GC-0519 ។
សាក្សីនៅកន្លែងកើតហេតុបានឲ្យដឹងថា មុនកើតហេតុ គេឃើញជនរងគ្រោះ សង្ស័យបនរើប្រាស់ជាតិស្រវឹងផង បើកម៉ូតូល្បឿនលឿន បោះពួយតាមបណ្តោយផ្លូវ២០០៤ ពីកើតទៅលិច លុះដល់ចំណុចខាងលើ សំបូរដោយហាង KTV នៅឈរមុខហាងនិមួយៗ មានស្រីៗ ស្រស់ស្អាត ឈររន្ទឹងរងចាំទទួលភ្ញៀវ ស្របពេលដែលជនរងគ្រោះរវល់តែងាកមើលតាមមុខហាង ស្រាប់តែជ្រុលរេចង្កូតទៅបុកខឿនទ្រូងផ្លូវ បណ្តាលឲ្យដួលបោកនឹងស្លាកប៉ាណូ បែកក្បាលធ្លាយខួរ ស្លាប់ភ្លាមៗនៅកន្លែងតែម្តង ។
ក្រោយកើតហេតុ សមត្ថកិច្ចមូលដ្ឋានចុះទៅពិនិត្យផ្ទាល់ដល់កន្លែង ព្យាយាមរកអត្តសញ្ញាណ នៅតែមិនឃើញ ៕ ដោយ៖បញ្ញាស័ក្តិ
