ជារឿយៗគេឃើញកំពូលតារាចម្រៀង ព្រាប សុវត្ថិ បង្ហាញវត្តមានភរិយា នៅក្នុងកម្មពិធីនានា ប៉ុន្តែសម្រាប់ការបង្ហាញនេះ ក៏នៅតែមិនសូវមានអ្នកគាំទ្រដឹងថា តារាចម្រៀងជួរមុខរូបនេះរៀបការតាំងពីពេលណា ដឹងត្រឹមថាបច្ចុប្បន្នលោកមានកូនកំលោះរហូតដល់ទៅ ៣នាក់ និងកំពុងចាប់អាជីពជាតារាចម្រៀងក្នុងផលិតកម្មតែមួយជាមួយលោក ។
ទើបតែកាលពីម្សិលមិញនេះ មានអ្នកលេងហ្វេសប៊ុកជាច្រើនចាប់អារម្មណ៍យ៉ាងខ្លាំង បន្ទាប់ពីម្ដាយក្មេក លោក ព្រាប សុវត្ថិ បង្ហោះរូបថតពីរសន្លឹកបង្ហាញពីពិធីមង្គលការរបស់លោក ដែលសម្រាប់រូបថតនេះលោកស្រីបានឱ្យដឹងថា ថតក្នុងឆ្នាំ ១៩៩៧ មានន័យថា លោក ព្រាប សុវត្ថិ រៀបការតាំងពីឆ្នាំ ១៩៩៧ មកម្ល៉េះខណៈដែលមិនទាន់មានឈ្មោះបោះសំឡេងក្នុងវិថីសិល្បៈចម្រៀងនៅឡើយ ។
គួរបញ្ជាក់ថា លោក ព្រាប សុវត្ថិ មានវ័យ ៤២ឈានចូល៤៣ឆ្នាំហើយ ប៉ុន្តែរូបរាងរបស់លោកនៅតែសង្ហា និងនៅក្មេងជានិច្ច ។ តារាចម្រៀងធំដឹងក្ដីនៅខេត្តកណ្ដាលរូបនេះ បានប្រឡូកក្នុងសិល្បៈចម្រៀង ២៦ឆ្នាំមកហើយ ចាប់តាំងពីឆ្នាំ ១៩៩២ រហូតដល់បច្ចុប្បន្ន ៕ សាវុធ
