ធ្លាប់មានដំណឹងចចាមអារ៉ាមក្នុងសង្គមសិល្បៈថា តារាសម្ដែងស្រីដ៏ឆ្នើម អ្នកនាង ស្វែង សុជាតា ត្រូវបានផលិតករកូរ៉េខាងត្បូងចាប់អារម្មណ៍ ហើយនឹងអាចនាំតារាស្រីរូបនេះទៅចាប់ដៃគូសម្ដែងជាមួយលោក Rain និង Lee Minho ដែលខណៈនេះផលិតករកំពុងពិចារណាថាតើតារាទាំងពីរនាក់នេះ ម្នាក់ណាស័ក្ដសមជាមួយអ្នកនាង ស្វែង សុជាតា ។
ជុំវិញព័ត៌មានចចាមអារ៉ាមនេះ អ្នកនាង ស្វែង សុជាតា ផ្ទាល់បានឱ្យដឹងថា អ្នកនាងសប្បាយចិត្តណាស់ ប្រសិនបើមានឱកាសសម្ដែងជាមួយកំពូលតារាល្បីល្បាញរបស់កូរ៉េខាងត្បូងលោក Rain និង Lee Minho ប៉ុន្តែវាគ្រាន់តែជាពាក្យល្បីតគ្នាប៉ុណ្ណោះ ព្រោះកន្លងមកក៏មានព័ត៌មានផលិតករកូរ៉េចាប់អារម្មណ៍អ្នកនាងដែរ ប៉ុន្មានពុំឃើញមានអ្នកណាទាក់ទងមកសោះ ។
គួរបញ្ជាក់ដែរថា អ្នកនាង ស្វែង សុជាតា ជាតារាស្រីដ៏ឆ្នើមមួយរូបអាចសម្ដែងមានគ្រប់ទម្រង់ទាំងតួកាចឆ្នាស់ និងកំសត់ ដែលអ្នកនាងសម្ដែងបានយ៉ាងល្អឥតខ្ចោះ ជាក់ស្ដែងដូចជាកន្លងមកនេះ អ្នកនាងក៏ត្រូវបានជ្រើសជាអង្គសំខាន់បំផុតក្នុងរឿង Hollywood របស់អ្នកស្រី Angelina Jolie មានចំណងជើងថា «First They Killed My Father» ៕ សាវុធ
